جەژنەو نەورۆزی مەیدانو ئەمەکسز ئوستو باتاڵگازینە سەربارو کەشوهەوای سەردی، بەجۆشۆ کریا و بەشداریێوە فرە ئاهەنگەکەنە کریا. ئاهەنگەکەنە ڕسمو کەماڵ کورکوتی ورواسیابێ، کە ساڵەو ٢٠١٧ نەورۆزو شارو ئامەدینە پۆلیسو تورکی کوشت. مەیدانەکە بە عەلەمەو دەم پارتی خەمڵیابێ و سەما و شادی کریا.

 میانەو ئاهەنگەکەینە دروشمو "کەماڵ کورکوت نمەمرۆ"، "نەورۆز مەبارەک بۆ" و "ژەنی، ژیوای، ئازادی"ی وچیێوە.

ئاهەنگەکەنە پەیامو سیاسەتمەداری زیندانیکریا سەبەحات تونجەلی سەبارەت بە نەورۆزی ونیاوە، کە ئاماژەش کەردەبێ، نەورۆز نامێش مدرامان، ژیوایۆ و هۆشیاریین.

سەرۆک فراکسیونو دەم پارتی گوڵستانە، واتش: "دمایی بە گۆشەگیری باردێ. پەی چارەسەرو پەرسەو کوردی، چەنی بەڕێز عەبدوڵڵا ئۆجالانی کوێ بیدێ. پەی چارەسەرو پەرسەو کوردی، بەڕێز ئۆجالان ئا کەسەنە، کە مشۆم پەی چارەسەری بە موخاتەب ورگێریۆ."

هایمانا

هەرپاسە ئاهەنگو نەورۆزی هایماناو ئەنقەرەینە کریا، ئاهەنگەکەنە دروشمو "بژیوۆ نەورۆز" و "نەورۆز مەبارەک" وچیێوە. مەحموود باشاران کاندیدو هایمانای پەی هامسەرۆکایەتیی شارەوانی دەم پارتی-نە، سەبارەت بە ورچنیەی وتارێوەش پێشکەش کەرد.

هەرپاسە ئەندام پەرلەمانو دەم پارتیی شارو ڕحای، فەریت شەنیاشار واتش: "مشۆم ئاشتییێوە شەرەفمەندانە پەی ئی وەڵاتەیە بێ ئاراوە و داواکارییەکێما مشۆم بەردەوامێ با. موخاتەبەو چارەسەرو کیشەکەی ڕۆشنا کێن، گۆشەگیریێوی تند ئیمرالیینە مکریۆ. مشۆم بەرەکاو ئیمرالی بکریاوە، مێزەو چارەسەری تازێ بکریۆوە."

ئاهەنگەکە بە دروشمێ و زەماوندە دماییش ئاما.