کۊمیتەو ڕاوەبەری جمیەروو شۊڕشوو یۊگێرتەو گەلا (هەبەدەهە) جە ساڵیادوو بەرخودانوو گەزی-نە ئەرەیاوناێوەش وەڵا کەرڎۊ.

جە ئەرەیاوناکەینە ئامان، "دە ساڵۍ وەڵی ئیسەینە سەرەورڎاێوە تازە و شکۊدار جە تاریخوو کۊشیای چەوسیاوەکانە ئارانە بۍ. ئی جارە ملوێنان کەسۍ تورکیا-سەرنیشتوو کوردسانینە بە دروشموو 'ئینە هەڵای ئەوەڵا، کۊشیای بەرڎەوام بۊ' مەیدانۍ و جادەکێشا کۊنتڕۊڵۍ کەرڎۍ. هاواروو سەرەورڎای گەلا  گەزی-وە دەسش پەنە کەرد و تا هاتای، ئەنقەرە، ئیزمیر، دێرسم، ئامەد پێڕ پێڕ وەڵا بیۊ. چالاکیی یۊگێرتەو ئەرەپڕایا دژوو ستەمی، تەرسەو دەسەڵاتداراش فرۍ کەرد، بییە بە هومێد پەی گەلاو جیهانی.  دژوو فشار، سەرکوتی و قۊرخکەرڎەی بە مەبەسوو تەرسنای لاو فاشیزمیوە، تووڕەیی کەڵەکەبییەو دلۍ جەماوەری، جە ڕاو گەزی-وە فاڕیا پەی مدرامانێوە بێهامتای. داواکاری و وەرموو بندەس و چەوسیاوەکا پەی جیهانێوە جیاوازی، بە وێنیشاندای بندەسا ئشناسیا.

جە ڕاو مدرامانوو گەزی-وە وینیا، کە دەسوەڵیوستەی و ئارڎەینەی جەماوەری متاوۊ چ سەرکەوتەێوە بەدەس بارۊ؛ کۊمۊن دروسۍ کرێۍ، ئەنجوومەنوو گەڕەکەکان، فوروم و کۊڕبەندوو گەڕەکەکا بابەتێوە گرنگوو ڕێکوستەیش خولقنا. گەزی گرنگی و پەنەوازیی جەنگی شۊڕشگێڵنییش پەی دلێنەبەرڎەی سیستمی سەرڎەمیی جارێوە تەر وست وەروو چەما. جە وەڵیوەبەرڎەی جەنگی شۊڕشگێڵنی و گەورەکەرڎەی ئانەینە سەرڎەمیانە بۍ.

گرنگیی پەنەوازییش بە شۊڕشی یۊگێرتەی، وێنیشانەدای شۊڕشی یۊگێرتەو گەلاش نیشانە دا و هەرمانەش دا ملوو سەرمەشقەکاو شۊڕشیرە. حەوڵێش دۍ جوابدەرەوەو داواکارییەکاو جەماوەری و پەنەوازییەکاو شۊڕشی بۊ. مدرامانوو گەزی بی بە هەنگامێوە گرنگە جە ڕاو ڕزگاریی هەبەدەهەیۊ، جمیەروو شۊڕشی یۊگێرتەیچ  بە پاو داواکارییەکا شۊڕشوو گەلا جووڵیاووە. نەک دە ساڵۍ بەڵکوم ئەگەر دەیان ساڵێچش سەرەرە لوابۊ، گەزی وانۍ فرە گرنگێش پشکەشۍ کەرڎۍ، کە متاویۊ ئەزموونش چۊوە ورگیریۊ.

گەزی جە یادوو ١٠ ساڵەیشنە لاو فاشیزمیوە پێسە ١٠ ساڵا وەڵۍ ئیسەینە تەرسی زیاد کەرۊ. دەسەڵاتداری فاشیست جە کەسایەتیی دۊسیەو دادگاییکەرڎەی گەزی-نە حەوڵۍ مڎۊ ملوێنان ئینسانۍ سەرکوت کەرۊ و تەرسنۊشا. وەلێم سەرباروو گردوو حەوڵەکاش، سیاسەتوو فشاری و تەرسنای، بە دەیان کۊکوشیێچ، حیچ دەستکەوتش نەبییەن. پێسە جەنی بە کۊکوشی و هجوومی دژوار نەتاویا وەر بە سەرەورڎای گەزی گیریۊ، ئارۊ مەتاویۊ وەڵۍ بە حەزی یۊگێرتانە پەی ئەرەپڕای گێریۊ.

وەروو ئانەی ئا خەڵکە ئاورایی و فەقیرییشا ملەرە سەپیان، ئا ژەنۍ ڕوانە کوشیا، ئشناسنامەی ڕەگەزیی بندەسان کە مافوو ژیوای ئادیشا بەڕسمی مەشناسیۊ، نەتەوەو کوردی کە کریۊ ئامانجوو کۊیکوش، شۊنکەوتۍ ئایینە جیاجیاکا، گەنجا، رەنجدەرا و کرێکارا هەڵای مدرامانوو گەزییشا ویرنەشییەنۊ. ویریچشا مەشۊوە، کە ئا وەختە یۊشا گێرت، وەختۍ ورێستێوە سەروو پایا، وێگیرییشا کەرد، با بە چە هێزێوە. ویرش ماراوە و جە دژوو ستەمی هاربییەی بێدەنگۍ مەبا ، تووڕەیی وێشا بە مەبەسوو بەدەسئارڎەی ئایندەی میاونا مەیدانەکا، دژوو فاشیزمی بەیۊگێرتەیی میاوناش سەرکەوتەی.

گەزی وەراوەروو کۊلۊنیالیزم، گوشار، ئەشکەنجە، ئەرەگیری و قۊرخی گردلایەنەو فاشیزمی بانگەوازا پەی جەنگی شۊڕشگێڵنی، رێکوستەی، کۊشیای یۊگێرتەی، مدرامان و وێنیشانەدای. گەزی ئیرادە و قەرارڎاین پەی دەسوستەی ئایندێوە ئازادی. مشۊم بانگەوازوو گەزی ئاڕۊ فرە خاستەر هەستش پەنە کریۊو جواب دریۊوە. ڕای سەرەکییەو ئانەیچ وەڵیوەبەرڎەی کۊشیای شۊڕشگێڵنیین، گەورەکەرڎەی جەنگی شۊڕشگێڵنین. بە کۊشیای دلۍ حدوودەکاو سیستمینە ئا سیستمە ورمەشنیۊوە، ڕزگاری گەلا بەدەس نمۍ. بە بۍ بەخشای قوربانی ئایندە بەدەس نمۍ. ئا کۊشیای و مدرامانە گەزینە و دماو ئانەیە کریا و ئا قوربانیۍ کە بەخشیۍ، بەڵگۍ ڕۊشنۍ و وەرەچەمێنۍ پەی ئانەیە".

جە ئا شەهیدانییروو ئەرەیاوناکەیۊ نورحەق و مدرامانوو گەزی بە ڕێزۊ یاد کریانۊ و ئانە وزیان ڕووە،  کە پەی یادکەرڎەیۊ گەشمەرڎا کۊشیای شۊڕشی یۊگێرتە فراوان کەرا، ئاویروو ئەرەپڕای میاونا سەرکەوتەی، قەڵاکاو فاشیزمی وڕنا".

س.ز