عیشق هەرمانەو دڵینە، دڵیچ گێڵای گێڵۊ شۊنیشەرە عەشقەکەش هەرشۊنۍ بۊ مشناسۊشۊ

هەرچنڎە عەقڵ ڕانەڎۊ گنۊ شۊنەو ئا عەشقیرە هەکە گومش کەرڎەن وەلۍ واڎەش ئاما دڵ ئاویر گێرۊو گرڎوو ئا بەربەستە عەقڵی و ئایدۊلۊجیایا ماڕۊو هەکە وەرگیری جە دڵی کەرا.

جەژنەو نەورۊزی جەژنێوە نەتەوەییەو کورڎینەو بێجگە کورڎی هیچ نەتەوێوەتەر ئەننەو کورڎی عەشقش پەی نەورۊزی نییا، تەنانەت نەورۊز یۊن چا چێوا گرڎوو کورڎی جە هەرچوارپارچەو کورڎەسانینە کۊکا سەرش، ئاوازەکەو "حەسەن زیرەک"ی بە تەمامی تەعبیر چا عەشقەیە کەرۊ هەکە کورڎەکۍ دلۍ دڵیشانە ورشا گێرتەن.

ویس ساڵۍ چێوەڵی ئایدۊلۊجیایێوە ئیسلامی واچێنۍ هەرکەس ئاویر کەرۊوە ڕۊو قیامەتینە چەنی ئاویرپەرسا حەشر کریۊ، هەرچنڎە من باوەڕم پا فتوۍ بۍ کە واچۍ ئاویرپەرس نەورۊز کەرۊ، بەڵام وەختۍ تەماشەو دڵیم کەرێنۍ چەنی بیروباوەڕەکەیم یۊ نەگێرێوە و بڵێسەو ئاویرەکەی دلۍ دڵیمەنە گڕە سانۍ، دماتەر زانام دڵم ڕاسماچۊ چوون بە ڕۊح و بە گیان ئینانۍ چەنی نەورۊزی.

جە ڕووە تارێخیەکێچۊ بەحسۍ فرۍ بێنۍ پەی ئانەی سەلەمناش نەورۊز حیچ پەیوەندیش بە کورڎیوە نیا، کورڎ حەر جەوێشۊ بە جەژنەو وێش زانۊش، وەلۍ پیرەمێردی شاعیر جارێوە تەر تاواش ئانەی زینڎە کەرۊوە هەکە نەورۊز پەی کورڎی عیشقا و مەلۊ چێروو حوکموو نویستێوە وشکی و ڕەقوتەقیوە، هیچ هێزێوە عەقڵی و ئەکادیمی و ئایدۊلۊجی مەتاوۊ وەرگیرییش چەنە کەرۊ و لاو کورڎاوە بیزنۊش.

ئەگەرتەماشەو ئی نەورۊزەیە کەری هەرچنڎە واران وارا و کەشوهەوا ڕا نەدۍ خەڵک بلۊ یاڎوو نەورۊزی کەرۊوە، بەڵام چەنی یۊ عەشقوو کناچێوە دڵشنە بۊ و ڕاگیریش چەنە کەرا یاوۊش پەنە، ئاڎیچ وەرانوەرنە هەزار تەسەڕوفاتۍ ناعەقڵانیۍ گێرۊنە وەر پەی ئانەی سەلەمنۊش عەشقەکەش گەرەکشا و بۊ یاگۍ مەخسەرەو خەڵکیچ، نەورۊزو ئێساڵیچنە خەڵک پاسەش کەرد.

س.ز