ڕۆیتەرز: ملیشیاکا سەر بە ئێرانی جە عێراقەنە ئامادێنی چەک بنیارە
ڕۆیتەرز جە زوانو وەرپرسا عێراقیۆ ئەرەیاونانش، گروپە ملیشیاکا سەر بە ئێرانی بە مەبەسوو دوورکەوتەیۆ جە هەرجۆرە جەنگێوە ڕاستەوخۆی چنی ئەمریکای، ئامادێنێ چەکەکاشا بنیارە.
ئەرەیاویان ئی قەرارە دماو هۆشداریی وەرپرسا ئەمەریکای کە جە بەغایۆ دریان کە جە ئەگەرو چەک نیارەیشا، هرووژمی ئاسمانی کریۆنە سەر ئا گروپا.
وچیۆ ئەرەنیشتەیرەو بەینوو محەمەد شیاع سودانی سەرۆک وەزیرانی عێراقی و گروپەکا پێسەو کەتایب حیزبوڵا، نەجەبا، کەتایب سەید شوهەدا، ئەنساروڵای ئەوفیە یاوان قۆناغێوە پنەیاوا.
عیزەت ئەلشابەندەر، سیاسەتمەدارو شیعەی ئەرەیاوناش، ئا گرووپێ ئامادەیی وێشا نیشاندان پەی جابەجێ کەردەو داواکارییەکا ئەمریکای.
یۆ جە فەرماندەکا کەتایب حیزبوڵای بە ئاژانسو ڕۆیتەرزیش ئەرەیاونا: "ترامپ ئامادەو جەنگیا چنی ئێمە، ئێمەچ گەرەکمانە وێما جە سیناریۆەکاش بەدوور گێرمێنە. هەرپاسە ئەرەیاونانش کە سپاو پاسدارا ئێرانیچ ئیزنشا به ملیشیاکا دان که وێشا جە هەرجۆرە ململانێوە به دوور گێرانە.
ئی گروپێ کە فەرماندەیی نزیکەو ٥٠هەزار چەکداراشا ئینا ئەستۆنە جە عێراقەنە، جە سەرەتاو دەس پنەکەردەو جەنگو غەززەیۆ، چنین هرووژمێشا پەی سەرو مەرامەکا ئەمریکای و ئیسرائیلی ئەنجامدێنی. بەڵام چی دماییا بەشێ چا گروپا بارەگاکێشا چۆڵێ کەردێنێ و بییەو وێشا جە ناوچەکا پێسەو موسڵی و ئەنباری کەمکەردەنۆو هەتا نەبانە ئامانجو هرووژمە ئاسمانیەکا.
ئەمریکا واوەیش مکەرۆوە کە مشۆم ملیشیاکێ سەر بە سوپاو عێراقی بانە نەک ئێرانی. بەڵام واشنتۆن پاگیرا جە ماڵارەو هەمیشەیی چەکی جەلایەنو ئا هێزاوە.
هەرپاسە عێراق هەوڵمڏۆنە هامسەنگی بەینو هامپەیمانەکا ئەمریکای و ئێرانی بەرقەراربکەرۆ.
