پەرلەمانتارو دەم پارتی عومەر ئۆجالان، دماین دیداری بنەیانەیش چنی ڕابەر ئاپۆی کە جە ئیمراڵینە ئەنجامش دابێ، پەی ڕۆنامەو یەنی ئۆزگووری گێڵنانۆ.

سەرەتاو قسەکا عومەر ئۆجالانی بە باسکەردەی سڵام گیاناو ڕابەر ئاپۆی پەی گەلی دەسش پنەکەرد. عومەر ئۆجالان گێڵنانشۆ کە ڕابەر ئاپۆ ئینەس واتەن؛ "لوایدێ حەر یاگێ سڵامو من یاوندێ بە گەلی" و عومەر ئۆجالان جەخت چانەیە مکەرۆوە کە ئی دیدارە دیدارێوە بنەیانەییا. دەستنیشانش کەردەن مەبۆنە پێسەو سەردانیکەردەو شاندو سیاسی یا پارێزنەرا نریۆرە، مافوو گرڏ زینانی کەرێوەن و مشۆم بنەیانە تاوۆنە بە جوانی دیدارو وێش ئەنجام دۆنە. جەختش چانەیش کەردۆ کە مەبۆنە سەردانو بنەیانەی بە مەڵامەتو سیاسی ئاستەنگ کریۆنە.

عومەر ئۆجالان واتش: "دیدارو ٣١و ئادارو ئیمراڵی، جە چوارچێوەو سەردانیکەردەو بنەیانەیش ئەنجامش دان، وە دووەم ڕۆو جەژنێ بییەن."

یادەوەرییەکێش چنی جەمیل بایکی

عومەر ئۆجالان گفتوگۆیێ سەرنج ڕاکێشو بەینو عومەر ئۆجالانو تاتەیش و ڕابەر ئاپۆیی مامۆش گێڵناوە و واتش: "جە دماین دیدارو ئیمراڵیینە، کە جە چوارچێوەو دیدارس بنەیانەینە بێ، تاتەم یادەوەرییێ ٥٠ ساڵەش گێڵناوە و سەرۆکیچ بەشداری یادەوەرییەکەی بی. بە بۆنۆو ٤و نیسانیۆ گێڵنایۆ ئا یادەوەرییە فرە مانادار و سەنگینا. سەرنج راکێش بێ. تاتەم یادەوەرییێ سەرەتاو ساڵەکا ١٩٧٦-١٩٧٧ گێڵناوە و واتش، 'تۆو جەمیل بایک ئامێبێندێ پەی یانەیما. ئەڏیاما واردەش پەی وەش کەردبینمێ. کاتو نان واردەینە، تاتەم دلێ بەرەکەینە مدرابێ وە پنەش واتیدێ، شمە ئەوەکۆشای پەی کۆمەنیزمی و سۆسیالزمی بەردێ ڕاوە. جە ئیسەیشەنە پنەتا ماچانە پەی کورد و کوردەسانی دەستا پنەکەردەن. ئەوەکۆشای کوردایەتی و کوردەستنی جە ئەوەکۆشای کۆمەنیزمی فرە گرنگتەرا. شمە فرە مانییەیدێ'. چاکاتەنە سەرۆکیچ واتش 'یاڏمێو. تاتەم چێوێ جا جۆرەش وات، 'شمە سەرقاڵێ بییەندێ بە دۆزو کوردایەتییۆ، شێخ سەعیدیچ پی ڕێرە ویەرد. شێخ سەعیدیچ قوربانی فرەش دا. هۆزش بێ، بنەیانەو و دەوروبەرش بێ. شمە کەسێتا نییا، هۆزێتا نییا. چی دۆزەنە سەختی فرە ویندێ'.جە دماو ئی قسا، حەقیقەتو گەلوو کوردی خوڵقیا و یاوا ملیۆنان ئینسانێ. ئەر کەسەکێ جە کەسێتی ئێژا ئۆجالانینە وێشا ویناوە، مشۆم ئینە پێسەو ژیوایۆ گەلێ بە ئەوەکۆشای ٥٢ ساڵە وینریۆ. ئێژا ئۆجالان ئینا تەمەنو ٧٦ ساڵیینە. گرڏو تەمەنیش بە مڏرامانو، بە ئەوەکۆشای ویەرنان. ڕۆڵەو چنین خێزانی بێ. چێوە بەرکەوت، چنی هەڤاڵاش، بە گرووپ بە گێڵای دلێ گەلی، دلێ دەگا و شارەکانە، بە ٦ کەسێوە دەسشا پنەکەرد و چارۆنە فاڕیێنێ پەی ملیۆنان کەسا و جە گرڏو جەهانینە دەنگشا داوە. جە پەیامو ٢٧ی شوباتینە وینریا، نەتەوە یۆگێرتەکێ، ئەمریکای، ئەورووپای، ڕووسیای، چین گرڏشا بە ئەرێنیۆ نزیکێ پرۆسەکەی باوە، پەشتگیری وێشا نیشانە دا. جە بێ کەسییۆ فاڕییا پەی خاوەنو ملیۆنان کەسا. ڕوانگە پێشکەش بە وەرکەوتوو دلێڕاسەی مکەرۆ. مۆدێلو ژیوایش پێشکەش بە وەرکەوتوو دلێڕسەی مکەرۆ. دەربارەو باسو گەلی پی جۆرە قسێشا کەردە."

پەنەوازا دیڎارو ئیمراڵی بە رێکوپێکی ئەنجام بڎریۆ

عومەر ئۆجالان دەربارەو دەرفەتەکاو ڕابەر ئاپۆی پېوەس بە شۊنیرەلوای رۆژەڤیوە واتش، "ئېژا ئۆجالان بە دەرفەتێوە کەمۆ، تەماشەو بڕۍ جە کەناڵە تورکیەکا مکەرۆ. چاوە بڕۍ چێو موانۊوە، هۊرسەنگنۆ. دیدارو بنەیانەیما نزیکەو سەعات و نیمێوەش خواینا. سەر ۋنەدایۍ بنەیانەیی بۍ. چنی ئانەی سەردایۍ بنەیانەیچ بۍ سەرو فرەو چێوا قسۍ کریا. ۋەرو ئانەی شمە چنی ئېژا ئۆجالانی چەمپنەکۊتەی مکەردۍ. سەردای بنەیانەیی گرنگا. گەرەکمانە مافو بنەیانەیی پارېزیۆ. جە یاسا و دەستووری بنەڕەتیینە چێش سەپیان و دیاری کریان مشۊم پەی ئېژا ئۆجالانی، حامیلی یەڵدرمی، وەیسی ئاکتاشی و عومەر خەیریچ جابەجێ بکریۆ، کە چنی ئېژا ئۆجالانی ئینۍ زینانەنە و مشۊم مافەکێشا پارېزیا. هەروێش دیدارو پارێزنەرا ئاستەنگ مکریۆ. ساڵانێوەن دیڎار ئەنجام نەدریان. مشۊم دیڎارەکۍ بە ڕێکوپێکی ئەنجام بڎریا."

مێزەو ئیمراڵی کارا و زیڼەن

عومەر ئۆجالان پېوەس بە هۊرسەنگنایە سیاسیەکا ڕابەر ئاپۆیۆ ئینەش وات: "ئا پارادایمەی کە ئېژا ئۆجالان دیاریش کەردەن، هۊرگیرو ڕوانگێوەن کە متاوۆ سەدێوە ڕاوەبەر بکەرۆ. پەنەوازا گرڎ کەسۍ پی جۊرە ڕوانگەکا بوینا. بێگومان جە سیاسەتەنە جە ۋەرکۊتوو مېیامینینە، جە تورکیانە سیاسەت سەرو پشێوی ڕاوەبەر مکریۆ. جیاوازی ئەتنیکی و باوەڕداریی ئەنجام مڎریۆ و ئینسانەکۍ ۋەرو شناسنامەی و باوەڕیەکاشەنە دلۍ کەتیگۆرییەکانە منریارە. ئېژا ئۆجالان گرڎو ئی نزیکایەتیا وزۆنە لاوە. سیستەمێوە تازەی جەهانی، سیستەمێوە تازەی ڕاوەبەری پێشکەش مکەرۆ. یانی عەلەوی چنی متاوۆ چنی سونەی بژیۋۆ، سوریان چنی چەنی ئەرەمەنی، ئەرمەنی چنی چەنی موسڵمانی، کورد چنی چەنی تورکی، عەرەب چنی چەنی فارسی متاوۆ بەشێوێوە مرۆڤانە بژیۋۆ؟ پارادایمەکۍ ئېژا ئۆجالانی ئینیشا گرڎ دەسنیشان مکەرۆ. فۆرمەلەو ئینیشا گرڎی جە لایەنو ئېژا ئۆجالانیوە نویسیانۆ. مشۊم دۊڵەت، دەسەڵاتداری و ۋەرپەرسا بە جددیەتۆ نزیکېش باوە. وەشکەردەی چارەسەری، بنیاڎنیای ئاشتی و نیایرەو پەیوەندی گرنگا. موینمۍ ئی مێزۍ جە ئیمراڵیینە زیڼۍ و کارانە. بە چەمۍ ۋێما دیما جە پێگېوە پا جۊرەنە کاتێ پەنەوازیشا پنەش بۆ، هەڵوێسو ۋێش نیشانە مڎۆ، کاتێ پەنەوازیشا پنەش بۆ فرە بە نەرمی و ئەرێنیوە نزیک بۊوە. حەقیقەتو ۋەرکۊتوو مېیامینیش شیکاری کەرد. جە نزیکۆ جە ڕووەدایەکا سووریای، عێراق، ئێرانی ئاگاڎارا و هۊرسەنگنۆ. ئینیشا گرڎ بە ۋەرفراوانیۆ هۊرسەنگنۆ و ئاگاڎارا.

پەیامو سیاسەتی دیموکراتیکی

عومەر ئۆجالان دەسنیشانش کەرڎ ڕابەر ئاپۆ پەیامی گرنگش سەرو سیاسەتی دیموکراتیکی بیەن و ئینەش وات: "جە لېوە فرە بە عالی ئاگاڎارو ئی ڕووەینە، جە لېوەتەرۆ فرە عال ئاگاڎارو رۆژەڤەکان و سەروەرا. چێگەنە مشۊم میکانیزمەکۍ دۊڵەتی پی جددیاتۆ نزیکو پرۆسەکەی بۊوە. شێونای ئاسانا، وەشکەردەی گران و زەحمەتا. سەرۆک واتش، 'سۆسیالیزم بە ماناو کۆمەڵایەتیبیەی مۍ، کۆمەڵایەتیبیەیچ بەماناو هەنگامنیای چنی گەلی، هەرمانکەردەی چنی گەلی مۍ. مشۊم ئینە وەش بکریۆ. جە سیاسەتەنە یاگۍ پەی مردای و بەتاڵی نییا.' هیواڎارێنمۍ ئاشتی بێ دلۍ ئی جوگرافیایۆ کە ساڵانێوەن ئینایمۍ حەسرەتشەنە. پېوەرە ژیۋای وەشکەرمۍ. ژیۋای دیموکراتیک، گلېرگەی دیموکراتیک ئاوا کەرمۍ. ئی ڕۍ زەحمەتەنە. پەنەوازش بە هەرمانێوە فرەینە. چێیچەنە مشۊم تا متاومۍ هامکارۍ بیمۍ."

باسو هەمڕاکا کاتو زاوڵەیش کەرڎ

عومەر ئۆجالان ئاماژەش پانەی دا ڕابەر ئاپۆ هەم باسو هەمڕا نزیکەکاو ۋێش کەرد جە دەگانە و هەمیچ باسو هەمڕاکا کاتو زاوڵەیش کەرد، سڵامی تایبەتی ۋێش پەی بڕێشا کیاست و واتش: "ئېژا ئۆجالان سەرۆکێوە پا جۊرەنە کە گرنگی مڎۆ بە مەعنەویاتی. باسو هەمڕایا ۋێش کەرڎ کە جە ۋەننگە و دەگانە هەمڕۍ زاوڵەیی بیێنۍ. سڵامش پەی فرێوە جە هەمڕایاش کیاست. دەگاو چیبنێ دەگێوە تورکمانییەنە، ئېژا ئۆجالان پەنج ساڵۍ ۋەنای قۆناغو سەرەتاییش چا ۋەنا. چا دەگێنە حۊت-هەشت هەڤاڵۍ سەرۆکی بێنۍ. باسو ئاڎیشاش کەرد، باسو بنەیانەکەیشا کەردش. باسو ولە زەرداش کەرڎ، باسو باڵداری و بازەکاش کەرۍ. باسو دەگاو ئەراهیش کەرد، باسو ئارامیش کەرڎ. باسش جە حەلوان تا مێردینی کەرد. یادەوەرییەکۍ ۋێش گێڵنێوە. سڵامش بۍ، ئێمەیچ ئی سڵامێما یاونۍ بە کەسا پەیوەندیداری."

نیگەرانی و گومانەکۍ گەلی حەقێنۍ

عومەر ئۆجالان ئاماژەش پانەی دا ڕابەر ئاپۆ جوابو نیگەرانییەکاو گەلیش پېوەس بە پرۆسەکەی دانۆ و واتش، "پېوەرە ئی مژارەما هۊرسەنگنا. باوەڕی گەلو کوردی بە ئېژا ئۆجالانی فرە ڕۊشنا. حیچ گرفتێوە چینەینە نییا، بەڵام بڕۍ نیگەرانیشا هەن. ئی نیگەرانیێچە چا ڕوانگۆ نیەنۍ. ئی نیگەرانیۍ بە مەڵامەتو ڕووەدایەکا پرۆسەو چارەسەری ٢٠١٥، جە ڕووەدایەکا ٢٠٠٩ ڕووەشا دا، جە ڕووەدایەکا ١٩٩٣ېنە ڕووەشا دا. نیگەرانییەکۍ جە دۊڵەت و دەسەڵاتدارییا. پېوەس پینەیچۆ ئېژا ئۆجالان واتش، 'گەل مافدارا، ئینا سەرو حەقی، ویرکەردەیۊکێش درووسێنۍ، بەڵام من پارێزگاری جە هیواکام مکەرو. پەی لوای ڕاوەو ئی پرۆسەیچە ئانەی جە دەسم بۍ مکەروش."

ۋێتا بەڕێکوستەی بکەردۍ

جە دما دماینە عومەر ئۆجالان باسش چانەی کەرڎ ڕابەر ئاپۆ ئاماژەش بە گرنگی ڕێکوستەی کەردەن و ئینەش وات، "سەرۆک گوتی، 'من چا جۊرە کەسانا کە ملو هەر یاگۍ ۋێم بەڕێکوستەی مکەرو. جە زاوڵەیۆ ۋێم بە ڕێکوستەی مکەرو. زاوڵە بێنا جەمێوە نما کەردەیم بۍ، جە ۋەننگەیچەنە جەمۍ هەمڕێم بێنۍ.' ئاماژەش پانەی دا کە گرنگیێوە فرە مڎۆ بە ڕێکوستەی. دەسنیشانش کەرد جە هەر یاگێنە نزیک و دەوروبەرش بۍ، کۊشش مکەرۆ هەرمانە بکەرۆ، بەڕێکوستەی بکەرۆ."