ئیمام‌ئۆغلو: مشۊم کۆمیسیۆن جە پەرلەمانەنە پێکبۍ
ئەکرەم ئیمام‌ئۆغلو دەربارەو سەرۋنەدای هامسەرۆکا دەم پارتی ئەرەیاۋنێوەش وەڵاکەرڎۆ، ئەرەیاۋناش پەی ئاشتی و چارەسەرێوە درێژخایەنی مشۊم جە پەرلەمانەنە کۆمیسیۆن پێکبۍ.
سەرۆک شارەوانی گۊرە شارو ئیستەنبوڵی ئەکرەم ئیمام‌ئۆغلو جە زینانو مەڕمەڕەینە، دەربارەو سەرۋنەدای ١٩و حوزەیرانو دەم پارتی ئەرەیاۋنێوە نویسیاش وەڵاکەرڎۆ.
ئەکرەم ئیمام‌ئۆغلو ئەرەیاۋناش سەرۋنەدای هامسەرۆکاو دەم پارتی تولای حاتەم ئۆغۆللاریۍ و تونجەر باقرخانی گرنگ و قیمەتدار بۍ، جە بارەو پرۆسەو چارەسەری پرسو کوردی و هەنگامە پەنەوازیەکا ئاشتی و قەرارەکا کۆنگرەو پەکەکەی و چڼین مژارۍ تەریۆ گفتوگۆشا کەرڎەن.
ئەکرەم ئیمام‌ئۆغلو، واتش: "بەپەیلواو من، پەی چارەسەری دیموکراتیکی پرسو کوردی، مشۊم هەنگامەی دەمودەسیە بنریۆ و کۆمیسیۆن جە پەرلەمانەنە پێکبۍ.
چنی گرڎو هاموڵاتیا تورک و کوردی بە واڵەو_برایەتی و پەشتیوانی، ۋېیەردەی جە دماو وێماوە جیامازمۍ و ئایندێوە هامبەش بنیاڎ منیەیمۍ. پی بۆنۆ، سوپاسو هامسەرۆکاو دەم پارتی مەکەرو کە سەرشا ۋنەدانی و پەیلوا گرنگەکۍ ۋێشا چنی هامبەش کەرڎا".
