لاو کۊمیتەەو ٢٠٢٣ۍ لۊزانیوە جە چوارچێووەو زنجیرە پانێلەکانە، کە جە مانگەو نیسانیوە دەسشا پەنە کرابۍ، کۊشکەو رومینیەینە کە پەیمانوو لۊزانییش دلێنە ئیمزا کریابۍ، چێروو ناموونیشانوو "لای سەریی پەیمانوو لۊزانیوە، ئینسان تاوۊ چ چارەسەرێوە ئاشتییانە پەی جەنگی وزۊ ڕووە" پانێلێوە ساز کرا.

پەرلەمانتاروو تیکۊنۊ کانتۊی سویسڕی د. بیپ ساڤاری پانێلەکەش ڕاوە بەرڎ. سیاسەتمەداروو کورڎی خەتیب دیجلە، جە زانکۊو گرازوو نەمسا پ. بیلگین ئایاتا، جە زانکۊو سلێمانی پ. پشکۊ حەمەتایەر و ئەکادیمی پ. عەباس وەلی سمینارشا پێشکەش کەرڎ.

حەمەتایەر: کورڎ جە لۊزانۊ تا ئارۊ درێژەش بە کۊشیای دان

پ. پشکۊ هەمەتایەر باسش جە قۊناغی تاریخیی نزیکبییەیۊ پەیمانوو لۊزانی کەرڎ و واتش، گەلوو کورڎی جە لۊزانۊ تا ئارۊ جە چوار پارچەو کورڎسانینە کۊشیای ئازادییش درێژە پەنە دان.

ئایاتا: شۊڕشوو وەرنیشتی کریۊ پەی مەنتێقەکەی جە ئایندەنە بۊ بە مۊدێلوو چارەسەری

بیلگین ئایاتا باسش جە ئەرەمەرزنای دەوڵەتوو تورکی جە ڕاو پەیمانوو لۊزانیوە کەرڎ و واتش، کۊدوو ئا ئا دەوڵەتە تازەیە کە مەرزیارە سەروو بنەماو یەک کەسایەتی مەرزیارە. پ. ئایاتا باسش جە ئەنجامە دژوارەکاو پەیمانوو لۊزانی کەرڎ و پێسەش وات: "ئارۊ جە نەهەو ئا سیستمینە جە وەرنیشتنە مەرزیانرە، ژەنی بەشدارێنۍ. ئا سیستمە کە بە وەڵیوەبییەی ژەنا ئەرەمەرزیان، کریۊ جە ئایندەنە پەی مەنتێقەکەی بۊ بە نموونێوە چارەسەری".

دیجلە: چارەسەر ئینا جە پارادیگماو مۊدێرنیتەو دیموکراتیکینە

سیاسەتمەداروو کورڎی خەتیب دیجلە پەی ناستەی چەنەکەوتە دژوارەکا و قۊرتەکاو مەنتێقەکەی ئاماژەش بە پاڕادیگماو مۊدێرنیتەو دیموکراتیکوو ڕابەروو گەلوو کورڎی عەبدوڵڵا ئۊجالانی کەرڎ.

دیجلە جە درێژەو سمینارەکەیشنە بەوەرفراوانی باسش جە پڕۊژەو کۊنفیدڕاڵیزموو دیموکراتیکی کەرڎ، کە ئەندازیارەکەش ڕابەروو گەلوو کورڎی عەبدوڵڵا ئۊجالانا.

عەباس وەلی: چارەسەر ئینا جە ئەرەمەرزنای سیستمێوە فرەئشناسنامەیینە

سیاسەتمەدار و ئەکادیمی کورڎی عەباس وەلی، کە بەئۊنلاین بەشدارییش پانێلەکەنە کەرڎ واتش، کە سیستمی فرەئشناسنامە و فرەکولتووری ئەرەمەرزندۍ و پەی ئانەیچە ئاماژەش بە گرنگیی پاڕادیگماو کۊنفیدڕاڵیزمی دیموکراتیکوو عەبدوڵڵا ئۊجالانی کەرڎ.

س.ز