ئیسرائیل دۊروبەرو دیمەشقیس بۊمبۋاران کەرڎ
ئیسرائیل هجومش کەرڎ سەرو سوریای و ئەرەیاۋیا کە، بارەگېکۍ حیزبوڵای بۊمبۋاران کریېنۍ و ٥ کەسۍ زامڎارۍ بیېنۍ.
ڕێکوزیاو چەمڎاری مافەکا مرۊڤی جە سوریا (SOHR) ئەرەیاۋناش، هجومەکەو ئیسرائیلی شەوەو یەکشەممەی ئەنجامدریان.
ئەرەیاۋیا، هجومەکە جە دژوو بارەگاکا هێزی وەرگیریی ئاسمانی سوریای ئەنجامدریان، کە هێزەکۍ حیزبوڵایش چنە بېنۍ.
وەزارەتو وەرگیریی سوریای ئەرەیاۋناش، دۊروبەرو دیمەشقی بۊمبۋاران کریان و دەنگو ئەرەتەقایۊکا جە پایتەختەنە ژنەۋیېنۍ. وەزارەتەکە ئەرەیاۋنانش، سیستمو وەرگیریی ئاسمانی چالاککریان و چنڎین موشەکېش وستېنېرە وار، بەڵام زانیاری زیاتەرش چا بارۊ ۋەڵا نەکەرڎەنۊ.
بەپاو یاۋنەریەکەو ڕێکوزیاو مافو مرۊڤی جە سوریا چا هجومەنە ٥ کەسۍ زامڎارۍ بیېنۍ. ئیسرائیل جە ٢ ۍ ئایارینە هجومش کەرڎ سەرو فڕگەخانەو حەلەبی. چا هجومەنە سەروازێوە سوپاو سوریای کوشیا و هەرمانەکۍ فڕگەخانەکەی پۍ چن ڕوۋېوە مرڎۍ.
هـ . ش
