داواکارو گرڎی کۊمارو ئیستەنبوڵی ۋنەپەرسایۊش دەسپنەکەرڎەن. جە چوارچێوەو ۋنەپەرسایۊکەینە پۊلیسەکۍ جە مەنتیقەکا "باشاکشەهیر، ئەسەنیورت، ئارناڤۊتکۊی و کوچوکچەکمەجە"ی و فرەو مەنتیقا تەرینە ھورشاکوا سەرو یانا. پۊلیسەکۍ جە یانەکانە گېڵا و ۋشکنایشا ئەنجامدان و ڕاۋەبەرا و ئەنڎاما پارتو دیموکراتیکی گەلانی و کۊنگرەی دیموکراتیکی گەلان (هەدەکە)ی و ئەنڎاما ئەنجومەنو جوۋانا پارتو چەپی سەوزیچ دلېشانە ، لانیکەم ١٧ کەسېشا گېرتۍ.

بەھانۍ گېرتەیشا نەزانیان و ئاڎېشا فاڕێنۍ پۍ ڕاوەبەرایەتی پۊلیسو ئیستەنبوڵی کە جە جاڎەو وەتەنەی. زانیا کە قەرارو سنووردارکەرڎە و قەڎەغەی دیڎاری ٢٤ سەعاتی گیریاکا و پارێزنەراشا بەرکریان. حەرپاسە ئەرەیاۋیا کە قەرارو بە نهێنی ئاستەیۊ جەبارەو دۊسیەکەیشاوە بەرکریان.

نامۍ گیریاکا پی جۊرەنە: "دەڤین دۊغا ئایاز، هولیا ئیلیاس، سەرکان شەنگول، ئەیلەم تاشدەمیر، مستەفا شیشمان، سەرحەد تۊکوش، عەرەفات ئەکمەکچیلەری، توفان ئەکمەکچیلەری، ئەرکان ئۊزمان، جەودەت بیچەر، یونوس ئاسلان، بەرفین کۊچاک، هێڤیدار ئۊزدەمیر، عومەر گولسول، مەروان بەیرەت، ئادەم ئۊزگان، ئۊنور ئیلبارس".

هـ . ش