فەرماندەیی قەرارگەو ناوەندیی یەژا ستاری ئەرەیاوناێوەش بارەو گەشمەرڎەبییە فەرماندە لەیلا سورخوێن (هامیەت یاڵچین کایا)یوە وەلا کەرڎۊ دلێشنە ئامان:  

"ئەندامەو کۊمیتەی ناوەندیی پەکەکەی و ئەندامەو مەجلیسوو پاژاکی و ئەندامەو دەسەو فەرماندەیی هەپەگەی و یەژا ستاری، فەرماندۍ هێژێما لەیلا سۊرخوێن (هامیەت یاڵچین کایا)، کە جە ئامەدنە جە بنەیانێوە وەڵاتپارێزنە و نیشتمانپەروەرەو داکۊکیکارە جە ئشناسنامەو کورڎی پەیڎۍ بیۍ و گەورەۍ و پەروەرڎی بیێبۍ، پا سروشت و جەوهەرۊ فرە ساد، سروشتی، قارەمانانە، فیڎاکارانە و ئازایانە خەبات و کۊشیای ۳۱ ساڵەو وێش کەردش و پا کۊشیایە هەڵوێستوو ژەنۍ ئازادێش جە کەسایەتیی وێشنە بەرجەستە کرد، جە ئۊپەراسیۊنوو دوژمنینە جە ۲۲ و ۲۳ۍ کانوونوو دووەموو ۲۰۲۳ جە بەستانە چەنی ٦ هامڕا ژەنانە دوو ڕوۍ قارەمانانە وەرگێری و جەنگشا کەرد و گەشمەرڎی بیۍ.   

بە نامۍ فەرماندەیی قەرارگەو ناوەندیی یەژاستاریوە، سەرەوەشی هامخەمیی وێما پەی بنەیانە وەڵاتپارێزن و نیشتمانپەروەرە هێژاکەیشا بەروزمۍ و بە خەڵکوو ئامەدی، کە فرەو ڕۊڵاو وێش پەی وەڵاتی و ژیوای ئازادی بەخشێنۍ، ماچمۍ جە کەسایەتییشانە سەرەوەشی جە گردوو گەلەکەیما کەرمۍ. ئێمە پێسە هامڕایاش بە ڕێز و پەنەزانایۊ یاڎوو هامڕا لەیلا سورخوێنۍ و گەشمەرڎاو بەستای و گردوو گەشمەرڎەکاما کەرمێوە. جە کەسایەتیی لەیلا ئامەدۍ و گەشمەرڎاو بەستاینە وەعدوو وێما پەی بەدیئارڎەی ئامانجوو گەشمەرڎاو شۊڕشی و کوردسانی ئازادی مدەیمێوە، کە پەیئانەیچ کۊشیای و خەباتوو وێما گەورەتەر و بەقوەتتەر کەرمۍ.

 ئشناسنامەو هامڕا لەیلا سورخوێن-ۍ پێسنەن:

ئشناسنامێ: لەیلا سورخوێن

نامۍ و دمانامێ: هامیەت پاڵچین کایا

شۊنەو جەئەڎابییەی: ئامەد

نامۍ ئەڎۍ و تاتەی: گوڵۍ - قادر

وەخت و شۊنەو گەشمەرڎەبییەی: ۲۳ۍ کانوونوو دووەموو ۲۰۲۳ / بەستا

فەرماندۍ هێژێما لەیلا سورخوێنە جە بنەیانێوە وەڵاتپارێزنی ئامەدنە پەیدۍ بیێنە و بە هەستوو ئەرەپڕایۊ جە گەنجینە بە کۊشیای ئازادی ئاشنۍ بیێنە، جە ساڵەو ١٩٩٣ێنە بەشدارەو ڕیزەکاو حیزبەکەیما بییە.

لە ئامەد، بۊتان، زاگرۊس و گارەنە بەچالاکانە بەشدارییش جە کۊشیاینە کەرد و پەی وەڵێوەبەرڎەی جەنگاوەری و ژەنۍ شۊڕشگێڕڵنۍ دیموکراتیکۍ ئیکۊلۊژیکەو ڕابەرایەتی، پەی وەڵیوەبەرڎەی بەسوپاکەرڎەی ژەنا، جە دژوو گرد عەقڵییەتێوە مرڎاوە و جە کەسایەتیی وێشنە هەڵوێستوو ژەنۍ ئازاد-ێش خولقنا.

وەراوەروو پیلانگێڵنیی میاننەتەوەیی ساڵەو ١٩٩٩، کە جە دژوو ڕێبەرایەتیما کریا و وەراوەروو خەتەو خیات – پاکتاوکاری، بە هەڵوێستی یارایانە و قارەمانانەو وێش هەڵوێستێوە بەقوەتش نیشانە دا و بەقووڵی و جەوهەری جە پارادیگماو ڕابەرایەتی نزیکە بیۊ.

بە ڕەنج و هەڵوێست و پیمەرەکاش، بە وەشەسیایش پەی ژەنا و ئینسانەکا، بە ئازایەتی و پەرۊشی و جەنگەوانییش، دایمە ژیواینە ڕانیشاندەرەو هامڕایەکاش بۍ، بییە بە فەرماندێوە پەی پەروەرڎەکەرڎەی و ئارڎەیرەی هامڕایەکاش و بە کۊشیای ٣١ ساڵەش بییە بە یووە جە فەرماندە سەرمەشقەکاو خەتەو فیڎایی. بە هۊشمەندیی ڕێکوستەی ئیکۊلۊژیکی دایمە دژوو عەقڵییەت و نزیکایەتیی بەدەر جە پارتی کۊشیا، بیێبۍ بە سەرچەمو و بڕوۍ پەی هامرایەکاش.       

بەشدارییش جە هەڵمەتەو ١وو حوزەیرانینە کەرد و بییە سەرمەشقەو جەنگوو گەلی شۊڕشگێڵنی.

دماو ئانەیە فەرماندەی هێژا دەلال ئامەد جە ساڵەو ٢٠١٧ گەشمەرڎە بی، هامڕێما لەیلا بەدڵسۊزی و بەقوەتیی وێش پەی هامڕا دەلالی و گەشمەرڎا لوا پەی بۊتانی.

ساڵەهای ساڵ بە ئیرادە  و تووڕەیێوە فرەوە دژوو دوژمنی کۊشیا و بە عەشق و وەشەسیاێوە فرەوە،  جەنگش پەی ئازادیی کەرد و چندین چالاکیێش دژوو دوژمنی کەرڎی. دماین جار جە بەستانە جەنگنە چەنی ٦ هامڕایاش قارەمانانە جەنگشا کەرد و گورزی قورسشا شانا  سوپای فاشیستی و کۊنترا خیانتەکارەکا و تا دماهەناسە جەنگ و وەرەنگارییشا کەرد و ئازایەتی و چەمنەتەرسیی ژەنەو کورڎیشا جارێوە تەر سەلەمناوە و جە لووتەو ئازایەتی و فیڎاکارینە گەشمەرڎی بیۍ.

جە کەسایەتیی فەرماندۍ قارەمانۍ و هێژێمانە لەیلا سورخوێنە و ٦ هامڕایاشنە بە ڕێز و پەنەزانایۊ، یاڎوو گردوو گەشمەرڎا کەرمۍ و وەعد مدەیمێوە، کە داکۊکی جە ئامانج و یاڎ و ویریشا کەرمۍ و هەقەشا سانمێوە و وەرمەکاشا بارمۍ دی".

س.ز