یەکینەکاو ژەنا شەنگالی (یەژەشە) جە ئەرەیاۋنێوەنە ئاماژەش پانەی کەردەن کە بە شداری جە کەمپینوو ' دژوو قڕکەردەی ژەنا بە بە دەنگوو ۋۍ پارێزنای'نە کەرۆ، کە ٨و ئاداری جە تەرەفوو جمیەروو ژەنا ئێزدی (تاژێ)وە ئەرەیاۋییا.

جە سەرەتاو ئەرەیاۋناکەینە سڵام جە کەمپینەکەو تاژێ کریان و ئاماژە بە دەوروو ژەنا جە پارێزنای کولتوری، ئەندێشە و باوەڕی گلێرگەکانە دریان.

یەژەشە ئەرەیاۋناش، کە دوژمن ئا هەڵوێسە شکۆدارەو ژەناش حەجگیز قبوڵ نەکەردەن، حەرپۊکەی گرڎ وەختۍ هجووم کەرۆنە سەرشا.

جە ئەرەیاۋناکەینە قڕکاری ٣ ئابی جە شەنگالەنە یاڎ وزیانۆ و ئانە وزیان ڕووە، "هێزی ژەناو ئێزدیی، ئارۊیچ ژەنی ئەفغانستانی و فەلەستینی رووبەڕوو ئا راسیەو پیای سەردەسی بیێوە. بەڵام دوژمناو گرڎوو ژەنا پێسەنۍ یۊی. لاو گردیشاوە ژەنی ئامێرێوە بەکارئاردەینە و متاویۆ کوشیا، دەسدرێژیشا بکریۆنە سەر. ئارۊیچەنە بە هەمان شێوە باڵادەسەکۍ بە شێوێوە نائەخلاقی هجووم کەرا سەروو ژەنا و ئیراڎەو ژەنا".

یەژەشە ئانەیچش وست ڕووە کە تەرسەو دەسەڵاڎدارا جە هێزی و کۊشیای ژەنا پی جۆرەنە، ئەرەیاۋنانش، "ۋەروو ئانەی دوژمنوو ژەنا ۋێچشا موینا کە ژەنی خاوەن ئیراڎێنۍ و ئا چارەنوویسەی سەرشارە سەپیان قبوڵش مەکەرا، دژوو ئانەی مرداوە".

بەتایبەتیچ ئاماژە بە هەڵوێسوو ژەنا ئێزدی دریان کە جە ڕەوڕەوەو تاریخینە حەجگیز سەرەشا ۋەرا ۋەر بە زۆرداری نەنامنانەرە.

سەبارەت بە ئامانجوو کەمپینەکەیچ ئی زانیاریۍ وزیێنۍ ڕووە:

"جە بنەڕەتەنە ئامانجوو کەمپینەکەی ئانەنە کە گرڎوو ژەنا جە ۋەرا ۋەروو گرڎ جۆرە هجوومێوەنە مرداوە، یۊبیەی ژەنا بارانە کایۆ و ستەمی هەنوکەیی جە ڕێخۆ هۊرتەکنا. سەروو ئا بنەمایانە ئێمە پێسە یەژەشەی بەشداریما جە کەمپینوو ' دژوو قڕکەردەی ژەنا بە بە دەنگوو ۋۍ پارێزنای'نە ئەرەیاۋنمۍ".

جە دمادمایی ئەرەیاۋناکەینە ئامان، کە ئاڎۍ ئامادێنۍ جە گرڎ شۊنێوەنە جە ۋەرا ۋەروو گرڎ جۆرە هجوومێوەنە دژوو ژەنا جوابوو نەیارا ژەنا بڎەیمێوە.

یەژەشە ئەرەیاۋنانیچش، "ئێمە قەناعەتما چانەن کە جە ڕاو ئی کەمپینەیۆ ئێمە گرڎوو هجوومەکا ماڕمێنە و ئازاڎیی گرڎوو ژەنا مسۆگەر کەرمۍ".