زلار ستێرکە ئاماژەش پانەی دا ئانۍ کە سەدێوەن سیاسەتو نکۆڵی و دلېنەبەردەی سەپنانە ۋوەرو ئیرادەو پەکەکەی کۊتۍ و واتش: "بە حیچ جۆرێ نمەتاویۆ ئەوەکۊشای ئازادی کوردەسانی سەرکوت بکریۆ، ئیرادێوە هەمیشەییا."
جە ٥-٧ـو ئایارینە پەکەکە ١٢ـەمین کۆنگرەو ۋێش جە هەرێمەکاو پارېزنای مەدیاینە بینا، دماتەر جە ١٢و ئایارینە قەرارە هۊرگیریێکێش پەی ڕای گرڎینی وەڵۍ کەردێوە، زلار ستێرکە ئەندامەو کۆنگرەکەی، جە کۆنگرەکەنە ئی هۊرسەنگنایشە کەرڎ:
"جە پارادایمو ڕابەر ئاپۆی، پېسە ئانەی کە پەنەوازبۍ نەیاوایمێنە و فرە قوڵۍ نەبیەیمېوە چنەش. بەڵام هامکاتو ئینەی جە ماوەو ٢٦ ساڵا دماینە چڼین وەڵێکۊتەیۍ جە ئەوەکۊشایمانە بەرۍ کۊتۍ. جە ڕوو سەروازی، سیاسی، دیبلۆماسی، گلېرگەیی و پارادایمو ئایدۆلۆژییوە شێوە وەڵێکۊتەیۍ جەماوەری ئاما ئاراوە. بەڵام جە ڕوانگێوە تەرۆ کریۍ وەڵێکۊتەی فرەتەر بەدیئامابیۍ.
ئەوەکۊشای ئازادی کوردەسانی بەحیچ جۆرێ سەرکووت نمەکریۆ و دلېنە نمەشۆ. جە ماوەو ٢٦ ساڵا دماینە هێزی شکسنەواردەو ۋێش سەلەمنا. پیلانگێڵنی مېیاننەتەوەیی پەرەش پنەدریا، جە دلېینەنە پەرە بە تەسفییەکاری دریا، جە بوارو جەنگینە گرڎ وەڵێکۊتەیۍ ناتۆی سەرو مېڎانو گەریلای تاقی کریاوە، ویستەکە دلێنەبەردەی گەریلای بۍ. بەڵام چێش ڕووەشدا، بەتەمامی سەلەمیا ئی جمېیەرە دلێنە نمەشۆ.
حەرچڼە ئێمەیچ بەتەمامی دژمنما نەماڕان، هەڤاڵ جەمال ئینەش وات، 'پات'. یانی سەرەڕاو گرڎو هرووژمەکا پېسە تەڤگەرو پەکەکەی سەرو پەیاوە مردایمېوە و شکسما نەوارد. گرڎو جەهانی بی بە شایەتو ئینەی. هێزە مېیاننەتەوەییەکایچ موینمۍ. دۊڵەتو تورکیچ موینۊش. یانی ئانەی دژما سیاسەتو سەڎ ساڵەو نکۆڵی و دلېنەبەردەی سەپنۆنە، لوتەش مەڕیێنە پی ئیرادە جە بن نامایە."
