دۆزی کۆبانێ، لە دادگای سزای قورسی ٢٢ هەمینی ئەنقەرە لە کەمپی زیندانی سینجان بەردەوام بوو. نوێنەری چەندین کەسێتی و نوێنەری پارت و ڕێکخراوەکان بەشداربوون.

سیاسەتمەدارانی زیندانیکراو سەباحەت تونجەل و ئاینور ئاشان و گونای کوبیلای و بوڵەنت پارماکسیز و عەلی ئورکوت و نەزمی گور لە هۆڵی دادگا ئامادەبوون، هەروەها سیاسەتمەدارانی زیندانەکانی تر لەڕێگەی سیستەمی دەنگ و ڕەنگەوە بەشداربوون.

سەڵاحەدین دەمیرتاش، سوپاسی ئەوانەی کرد بەهۆی مردنی باوکییەوە سەرەخۆشیان کردبوو، گوتی: "بەرگرییەکەی خۆم پێشکەشی باوکم وەستا تاهیر دەکەم، ئەو خوێندن و نووسینی نەدەزانی، بە ڕەنجی خۆی ٧ مناڵی پێگەیاند".

ئاماژەی بەوە کرد دەوڵەت بە زۆرەملێ خاک و زێدی ئێمەی داگیرکردووە، ئەوەی پەیمانی فەزیڵەت و چاکەکاری شێواندووە دەوڵەتە، ئەگەر لە تاوانبارێک دەگەڕێن، ئەوە ئێمە نین، ئێمە قوربانی دەستی ئێوەین.

دەمیرتاش ئاماژەی بەوە کرد داعش و ئەو گرووپە توندڕەوانەی ژیانیان لەسەر باوەڕی دۆگما پێکەوەژیانیان تێکداوە، هەروەها ئەوانەی تەنها دەیانەوێت سکی خۆیان تێربکەن و درێژە بە نەوەکانیان بدەن، هۆمۆ سایپێنسن، هیچ پەیوەندییەکان بە چاندەوە نییە، گوتی: "ئەگەر پەیمانی چاکەکاری تێکدراوە و دەرفەتی ژیانی هاوبەش نەماوە، ئەوە تاوانی ئێمە نییە".

گوتی: "ئێمە تەنها ناموس و ناسنامەی گەلەکەمان پاراست و مافی ژیانمان لەسەر خاکەکەمان پاراست. وڵاتی خۆمانە، خاکی خۆمانە، ڕەنجی خۆمانە. ئەنقەرەمان داگیر کردووە؟ هاتووین زمان و چاند و باوەڕی گەلان قەدەغە بکەین؟ تورک لە دژی داگیرکاری دەرکەوتن؟ یۆنانی، بیزەنتی، ئینگلیز هەبوون و تورکان دژی ئەوان بەرخۆدانیان کرد. کاتێک کورد بەرخۆدان دەکات بۆ پێی دەڵێن تیرۆریست؟".

پاشان دەمیرتاش تیشکی خستەسەر پەیوەندی مێژوویی نێوان کورد و تورک. دواتر گوتی: "ئێمە بەرخۆدان دەکەین، لە زیندان بەرخۆدان دەکەین، لە پەرلەمان بەرخۆدان دەکەین. بەرخۆدان دژی زوڵم ڕەوایە. ئێوە شەو و ڕۆژ بۆ غەززە بانگەوازی بەرخۆدان دەکەن. بانگی ناڕەزایەتی دەکەن. بۆچی ئەمە تاوان نییە، بۆچی داوای سەربەخۆیی دەکەنە تاوان! تاکە ڕێگەی چارەسەری پرسی کورد: قبووڵکردنی هەبوونی کوردە، ئێمە سەر نەوی ناکەین. ئێمە ئامادەین بۆ پێکەوەژیان، بەڵام تا کۆتایی دژی ئەم زیهنیەتە بەرخۆدان دەکەین".

دانیشتنەکە سبەی کاتژمێر ١٠:٠٠ بە بەرگری دەمیرتاش بەردەوام دەبێت.