مەجلیسی گەنجانی پارتی یەکسانی و دیموکراسی گەلان (دەم پارتی) لە وان، لە چوارچێوەی کەمپەینی "١٠٠٠ نامە بۆ ئیمراڵی" نامەیان بۆ ڕێبەری گەلی کورد عەبدوڵا ئۆجالان نارد.

گەنجان لەبەردەم بینای دەم پارتی کۆبوونەوە و کۆنفرانسی ڕۆژنامەوانیان بەست. ئەنجامی مەجلیسەکە یەکبوون سافالی لەسەر ناوی گەنجان گوتی: " وەک دەزانرێت سیاسەتی گۆشەگیری بەرامبەر ڕێبەری گەلی کورد عەبدوڵا ئۆجالان بە هەموو تورکیادا بڵاوبووەتەوە و بە شێوەیکی جدی بەردەوامە. داخستنی سەرجەم ڕێگەکانی پەیوەندی لەگەڵ بەڕێز ئۆجالان لەم قۆناغەدا، هەناسەدان بۆ گەلانی کوردستان و تورکیا قورس دەکات. بەتایبەت گەنجان و ژنان، هەموو جڤاک لەڕێگەی سیاسەتی گۆشەگیریەوە بەرەو کارەسات پەلکێش دەکرێت".

سافالی گوتی: "تاکە ئایدیاڵی گەنجان و ژنان و مناڵان ئەوەیە، لەڕێگەی چارەسەری پرسی کوردەوە ئاشتییەکی شکۆدار و ئازادی بەڕێز ئۆجالان بێتەدی".

سافالی ڕایگەیاند کەمپەینی "١٠٠٠ نامە بۆ ئیمراڵی" کە لەنێووان ١-١٥ ی شوبات دەستیان پێ کرد، لە جیهاندا دەنگدانەوەی مەزنی هەبووە و لە کوردستان و تورکیاوە هەزاران نامە بۆ ڕێبەری گەلی کورد عەبدوڵا ئۆجالان نێردراوە، گوتی: "گەلەکەمان سەلماندی پێداگرە لەسەر تێکۆشان بۆ ئازادی بەڕێز ئۆجالان، ئەو نامانەی نێردراون کۆی دەکەینەوە و دەینێرین بۆ ئیمراڵی. بەم بۆنەیەوە، بانگەواز لە هەموو دیموکراسیخوازان و ئازادیخوازان دەکەین گۆشەگیری بشکێنن و دیموکراسییەکی پێکەوەیی مسۆگەر بکەن".

پاشان گەنجان ڕێپێوانیان کرد و نامەکانیان لەڕێگەی پۆستەخانەوە نارد.