کۆمیتەی خەڵاتی جەمال نەبەزی بەرلین ڕایگەیاند، یەکەمین خەڵاتی جەمال نەبەزیان داوە بە مامۆستای کورد، زارا موحەمەدی، کە لە شاری سنەی ڕۆژهەڵاتی کورستان زمانی کوردی دەپارێزێت.

کۆمیتەی خەڵاتی جەمال نەبەز لە ٧ کوردی چوارپارچەی کوردستان پێکدێت.

کانی موحەمەدی بەناوی زارای خوشکییەوە خەڵاتەکەی وەرگرت.

کۆمیتەکە دەربارەی خەڵاتکردنی زارا موحەمەدی دەڵێت: "خەڵاتکردنی زارا موحەمەدی ڕێزێکە لە هەوڵ و تێکۆشانی بێوچان و خۆبەخشانەی لە پێناو فێرکاریی زمانی کوردی، داکۆکیکردن لە مافی بنەڕەتیی زمانی دایکی، و بەرەنگاربوونەوەی لە دژی نکۆڵیکردنی ناسنامەی کوردی. زارا لەم ڕێبازەدا لە بارودۆخی دژواری کوردستاندا، کە زمان و ناسنامەکەی ڕێبەند کراون، بە ساڵانێک بەردەوام بووە. ئەو هەر بە هەوڵی تاکەکەسیی خۆی نەوەستاوە و بە هاوڕێیی ڕێکخراوەی  ناحکومی نۆژین و بەهەرەوەزی پەرەی بە خەباتەکەی داوە.
زارا، سەرەڕای زەبروزەنگی زۆر و حوکمی ناڕەوا و زیندانیکردنی، بەئاشکرا و لە پانتایی گشتیی کۆمەڵگادا ئازایانە دەنگی لە دژی نادادپەروەریی زمانی و ناسنامەیی هەڵبڕیوە. بەم چەشنەش، ڕۆڵێکی گرینگی لە هۆشیارکردنەوەی ناوخۆ و دەرەوەی کوردستان لەمەڕ ئەو نادادپەروەرییە هەبووە. ئەم خەباتەشی کاریگەریی مەزنی هەبووە؛ بە جۆرێک کە بووەتە هێما و ئیلهامبەخشی زۆرێک لە گەنجان و ژنان".

ئەندامی کۆمیسیۆنی چاندی و جڤاکی کۆمەڵەی نوژینی شاری سنەی ڕۆژهەڵاتی کوردستان، زارا موحەمەدی، لە شوباتی ٢٠٢٠ لەبەر فێرکردنی زمانی کوردی، لەلایەن دادگای شۆڕشی سنەوە ٥ ساڵ سزای زیندنای بەسەردا سەپێنرا.

زارا مانگی شوباتی پێشوو ئازدکرا. ئەوکات لە پەیامێکی ڤیدیۆیی گوتی: "بەبێ ئاگاداری خۆم و بنەماڵەکەم و ئەندامانی کۆمەڵەی نوژین و پارێزەرەکەم، هەروەها بەبێ ئەوەی لەلایەن خۆم یان پارێزەرەکەمەوە داوای لێبوردن پێشکەش بکرێت، بەپەلە ئازادکرام".

دووپاتی کردەوە: "من پێشتر لەڕێی پارێزەرەکەمەوە بە بەرپرسانی دادوەریم گوتبوو، هەرگیز داوای لێبووردن ناکەم".