لە چوارچێوەی هەڵمەتەکەدا، بزووتنەوەی ژنانی کوردی ئەوروپا (تەژەکە-ئە) هەڵمەتێکی نامە ناردنی بۆ سی پی تی دەستپێکردووە و داوای هەڵگرتنی بەرپرسیارێتی کردووە. ئەمڕۆ لە شاری باسلی سویسرا هەڵمەتەکە دەستیپێکرد.

ئەنجوومەنی ژنان کە لە ژێر چەتری یەکیەتیی ژنانی کوردی سویسرا (یەژەکە-س) درێژە بە چالاکییەکانیان دەدەن، لە سەرەتای ئەم هەفتەیەوە بە هەزاران نامەیان کە لە شارەکانی لۆزان، سیۆن، زوریخ و ژنێڤ کۆکردبووەوە بۆ سی پی تی نارد.

ئەندامانی ئەنجومەنی ژنانی ڕووناهی لەبەردەم پۆستەخانەی کلاراپلاتز کۆبوونەوە و ١٣٠٠ نامەکەیان بۆ سی پی تی هەنارد. پێش ناردنی نامەکان، نیکلا کلیچ بە ناوی ئەنجومەنی ژنانی ڕۆناهیەوە بەیاننامەیەکی خوێندەوە.

' لە ئیمرالی کردەوەی نامرۆڤانە دەکرێت'

نیکلا کلیچ ڕایگەیاند کە گەلی کورد و دۆستەکانیان ساڵانێکە بە بەردەوامی بۆ ئەوەی سی پی تی ئەرکی خۆی بەجێ بهێنێت هەڵمەتی جیاواز بەڕێوە دەبەن و وتی: "وەک کوردستانیانی باسل، ئەمڕۆ لە چوارچێوەی هەڵمەتێکەدا نامە بۆ سی پی تی دەنێرین و جارێکی دیکە دەمانەوێت سی پی تی ئەرکەکانی خۆی لەبیر نەکات. ئەمڕۆ کردەوەی نامرۆڤانە لە دژی ڕێبەرایەتیمان دەکرێت. جارێکی تر بیرتان دەخەینەوە کە ئەم هەڵوێست و بێدەنگیەی سی پی تی قبوڵ ناکەین. تا ڕێبەرایەتیمان ئازاد نەبێت، وەک ژنانی کورد لە هەموو بوارەکاندا درێژە بە چالاکییەکانمان دەدەین."

دوای وتارەکە ١٣٠٠ نامەی واژۆکراو بۆ سی پی تی نێردران.