ڕێبەری گەلی کورد عەبدوڵا ئۆجالان لە زیندانی ئیمراڵی لە گۆشەگیرییەکی توندە، ٣١ مانگە زانیاری لەبارەیەوە نادرێت. دەسپێکی پیلانگێڕی دژی ڕێبەری گەلی کورد عەبدوڵا ئۆجالان لە ٩ ی تشرینی یەکەم، لە کادیکۆی ئیستەنبوڵ شەرمەزار کرا. لەسەر بانگەوازی کۆنگرەی دیموکراتیکی گەلان (هەدەکە) و پارتی دیموکراتیکی گەلان (هەدەپە) و پارتی دیموکراتیکی هەرێمەکان (دەبەپە) و چەندین ڕێکخراو  و پارتی سیاسی، بە درووشـمی "ڕێپێوانی ئازادی" چالاکی ناڕەزایەتی بەڕێوەچوو.

پۆلیس هەموو خاڵەکانی ناوچەکەیان گەمارۆدا و چەند کەسێک گیران، لەوانە، هاووتەبێژی هەدەکە، ئەسینگوڵ دەمیر، دایکانی ئاشتی نارنجە ئاجار و حەنیفە گوموش. هەروەها ئەو پاسەی لە تەکیرداغەوە بۆ بەشداری لە چالاکییەکە هاتبووە ئیستەنبوڵ لە کادیکۆ لەلایەن پۆلیسەوە ڕاگیرا، کەسانی نێو پاسەکە هێشتا ڕاگیراون.

پەرلەمانتارانی پارتی چەپی سەوز، بورجگول چوبوک و چیچەک ئۆتلو لەلایەن پۆلیسەوە گەمارۆدران، بەڵام گوتیان: "سەرەڕای هەموو فشارەکان گۆشەگیری شەرمەزار دەکەین، تێکۆشانمان بۆ لەناوبردنی گۆشەگیری سەر عەبدوڵا ئۆجالان بەردەوام دەبێت". هاوکات هاووتەبێژی پارتی چەپی سەوز، چیدەم کلیچگون ئوچار و هاووتەبێژی هەدەکە جەنگیز چیچەک، لای پەیکەری بۆغا لەلایەن پۆلیسەوە گەمارۆدران. جەماوەر درووشمی "بژی بەرخۆدانی ڕۆژئاوا" و "بژی سەرۆک ئاپۆ" و "نا بۆ داگیرکاری، بەڵێ بۆ ئاشتی"یان بەرزکردەوە.

هاووتەبێژی هەدەکە جەنگیز چیچەک، گوتی: "لابردنی گۆشەگیری دامەزراندنی ئاشتی و ئازادییە. لە زیندانی ئیمرالی کام یاسا کاری پێدەکرێت؟ لە وەزیری داد دەپرسین؛ ئایا زیندانەکان لە دەرەوەی سنوورەکانی تورکیان؟ ئیمراڵی لە کوێیە؟ ڕێگە بە بنەماڵە و پارێزەرانی بەڕێز ئۆجالان بدە لەگەڵیدا کۆببنەوە".

چیچەک ناڕەزایەتی بەرامبەر ڕەفتاری پۆلیس دەربڕی و ڕایگەیاند، ئەمە درێژەی زیهنیەتی پیلانگێڕیی ٩ تشرینی یەکەمە، ئەو پیلانگێڕییەی دژی گەلانی تورکیا و گەلی کورد پێکهات. جەماوەر و پەرلەمانتاران دژی گۆشەگیری درووشمیان بەرزکردەوە و چوونە نێو بارەگای هەدەپە لە کادیکۆ.

ئەو کۆمەڵەیە لەنێویاندا چالاکوانانی تەڤگەری ژنانی ئازاد (تەژەئا) لە پارکی یۆگرتچو بە چەپڵە و هەلهەلە لێدان دەستیان بە ڕێپێوان کرد. لە میانی ڕێپێوانەکەدا دروشمی "سڵاو، سڵاو، هەزار سڵاو لە ئیمراڵی"، "بژی بەرخۆدانی زیندانەکان"، "بژی بەرخۆدانی ئیمراڵی" و "بژی سەرۆک ئاپۆ" بەرزکرایەوە.

ئەو چالاکوانانەی هاتبوونە بەردەم پەیکەری بۆغا لەلایەن پۆلیسەوە ڕووبەڕووی لێدان و دەستبەسەرکردن بوونەوە. لە کاتی دەستبەسەرکردنەکەدا، چالاکوانان دروشمی "کەرامەتی مرۆڤایەتی ئەشکەنجە دەشکێنێت"یان بەرزکردەوە. بەپێی زانیارییەکان هەندێک کەس کە لە کافێکان دانیشتبوون کەلەپچە و دەستبەسەرکراون".