میتحات سانجار ناڕه‌زایه‌تی به‌رامبه‌ر به پارته‌كه‌یان ده‌ربڕی و سه‌رنجی راكێشا بۆ سه‌ر به‌رخودانی كۆبانێ كه داعشی شكستدا و وتی، "ئه‌وه بۆ ده‌سه‌ڵات بووه‌ته برینێك كه تائێستاش ساڕێژ نه‌بووه".
هاوسه‌رۆكی گشتیی هه‌ده‌په میتحات سانجار له ناوه‌ندی گشتیی هه‌ده‌په له ئه‌نقه‌ره كۆنفرانسێكی رۆژنامه‌وانی ساز كرد. له كۆنفرانسه‌كه‌دا هاوسه‌رۆكانی پارته‌كه له به‌ش و پێكهاته‌كانی هه‌ده‌په ئاماده‌بوون.
هاوسه‌رۆكی هه‌ده‌په میتحات سانجار سه‌رنجی راكێشا بۆ سه‌ر شه‌پۆلی نوێی گوشار كه به درێژایی هه‌فته‌كه له ژێر ناوی 'لێپرسینه‌وه‌ی كۆبانێ'دا له دژی ئه‌ندامانی پارته‌كه‌یان ده‌ستیپێكردووه. سانجار وتی، "هێرشه‌كانی ده‌سه‌ڵات له دژی پارته‌كه‌مان، گه‌له‌كه‌مان و هێزه دیموكراسیه‌كان زیادی كردووه. دۆسیه‌ی داخستن كه له دژی پارته‌كه‌مان كراوه‌ته‌وه، دۆسیه‌ی ساخته و فرت و فێڵی كۆبانێ كه له ئه‌نجامیدا هاوسه‌رۆكانی پێشوومان و ئه‌ندامانی ده‌سته‌ی به‌ڕێوه‌به‌ریمان له به‌ر ئه‌وه به‌دیل گیراون، به‌رده‌وامه. له دۆخێكی به‌و جۆره‌دا به‌ر له دوو رۆژ له ژێر ناوی ئۆپراسیۆنی شه‌پۆلی دوه‌می كۆبانێ ده‌سه‌ڵاتداری ده‌ستی به شه‌پۆلێكی نوێی هێرش كردووه. ئه‌و هێرشانه‌ی به تۆمه‌تی هاریكاری مرۆیی بۆ كۆبانێ ئه‌نجام ده‌درێن. ئێمه جارێكی تر جه‌خت ده‌كه‌ینه‌وه، ئه‌م ده‌سه‌ڵاته هاوكاری داعشی كرد، ئێمه‌ش هاوكاری گه‌لی كۆبانێمان كرد كه له دژی داعش خۆڕاگری ده‌كرد. داعش شكستیهێنا و گه‌لی كۆبانێ سه‌ركه‌وت.
'برینێكی كراوه‌یه، به‌دوای تۆڵه‌سه‌ندنه‌وه‌یه'
له چوار لای جیهان هه‌م هاوكاری هه‌م پشتیوانی گه‌یشت. به‌ڵام تاكه هێزێك كه پشتیوانی داعشی كرد ئه‌م ده‌سه‌ڵاته بوو. له‌به‌ر ئه‌وه بۆ ئه‌م ده‌سه‌ڵاته هێشتا برینێكی ساڕێژنه‌بووه. ئه‌م دۆسیه و ئۆپراسیۆنه ئه‌نجامی گه‌ڕانێكه به دوای تۆڵه‌سه‌ندنه‌وه‌ی ده‌سه‌ڵات كه توڕه‌یی خۆی له‌به‌ر ئه‌و كاته كۆتایی نایات. ناتوانن هیچ ئه‌نجامێك له‌وه به‌ده‌ستبهێنن. له‌به‌ر ئه‌وه‌ی ناتوانن مێژوو بۆ دواوه بگێڕنه‌وه. ده‌سه‌ڵات شانسێكی له‌و جۆره‌ی نییه. هه‌ر وه‌ها ئێمه باش ده‌زانین كه ئامانجی ئه‌و هێرشانه سیاسین. ده‌سه‌ڵاتداری به شێوه‌یه‌كی سیاسی ناتوانێت ده‌ره‌قه‌تی ئێمه و هه‌ده‌په بێت وه‌ك تاكه به‌ربه‌ستی به‌رده‌م فاشیزم.
ناهه‌قیان نییه، له‌به‌ر ئه‌وه‌ی تا ئێمه هه‌بین ناهێڵین فاشیزم له‌م وڵاته جێگه‌ی خۆش بكات، ئێمه رێگه به رژێمی تاكڕه‌وی و دوژمنایه‌تی ناده‌ین. ئێمه رێگری له‌وه ده‌كه‌ین. به‌پێی پێویست هێزمان هه‌یه كه رێگری لێبكه‌ین. تائێمه هه‌بین هیوا و چاره‌سه‌ریش ده‌بێت".
'ئێمه گوڕ به تێكۆشان ده‌به‌خشین، دۆسیه‌كه پوچه‌ڵ ده‌كه‌ینه‌وه'
میتحات سانجار باسی له‌وه‌كرد كه ئه‌و هێرشانه‌ی ده‌كرێنه سه‌ر پارته‌كه‌یان نایاسایین، دژه دیموكراسین و هیچ ره‌وایه‌تییه‌كیان نییه.
سانجار باسی له‌وه‌كرد، كه زۆر جار وتوویانه، كه داواكارینامه‌ی داخستن چۆن و له كوێ ئاماده‌كراوه و وتی، "ئه‌و داواكارینامه‌یه له ناوه‌ندی گشتیی مه‌هه‌په ئاماده‌كرا و له كۆشكیش ته‌واو كرا. به ده‌ستی داواكاری گشتیی كۆماری له دادگای باڵا راده‌ستی دادگای ده‌ستوری هه‌میشه‌یی كرا. دادگای ده‌ستوری هه‌میشه‌ییش به شێوه‌یه‌كی ئاشكرا رایگه‌یاند، كه له داواكارینامه‌كه‌دا به‌ڵگه بوونی نییه، به‌ڵگه‌یه‌كی فرت و فێڵه و داواكارینامه‌كه‌ی گه‌ڕانده‌وه. به‌ڵام دۆسیه‌كه به‌رده‌وام بوو. لێره‌دا ده‌یسه‌پێنن. گوشار ده‌خرێته سه‌ر دادگای باڵای ده‌ستوری هه‌میشه‌یی. دادگای باڵای ده‌ستوری هه‌میشه‌ییش له‌به‌رده‌م تاقیكردنه‌وه‌یه‌كی مێژووییدایه. ئێمه به‌رده‌وام بڕوای خۆمان به ئه‌ندامه خاوه‌ن ویژدانه‌كانی دادگای باڵای ده‌ستوری هه‌میشه‌یی دوپات كردووه‌ته‌وه. جارێكی تریش دوپاتی ده‌كه‌ینه‌وه".
میتحات سانجار جه‌ختی كرده‌وه كه دۆسیه‌كه له گۆڕه‌پانی سیاسیدا ده‌گاته ئه‌نجام و وتی، "ئێمه تا له‌ده‌ستمان بێت په‌ره به تێكۆشانمان ده‌ده‌ین و ئه‌و دۆسیه پوچه‌ڵ ده‌كه‌ینه‌وه".
هـ . ب
