پارێزەرانی ڕێبەری گەلی کورد عەبدوڵا ئۆجالان بۆ بینینی موەکیلەکەیان کە لەژێر هەلومەرجێکی گرانی گۆشەگیرییدا لە زیندانی ئاسایشی بڵندی جۆری F ی ئیمراڵی ڕاگیراوە و ٣٤ مانگە هیچ زانیارییەک لەبارەیەوە نییە، داواکارییەکی نوێیان پێشکەشی سەرۆکایەتی داواکاری گشتی کۆماری بۆرسا و بەڕێوەبەرایەتی سزا و جێبەجێکردنی ئیمراڵی کرد. داواکارییەکە لەلایەن پارێزەرانی نووسینگەی یاسایی سەدە. ڕازیە ئۆزتورک و ئیبراهیم بیلمەز و عیمران ئەمەکچی و جەنگیز یوراکلی بەرزکرایەوە.

پارێزەران بۆ موەکیلەکانی دیکەشیان لە ئیمراڵی، عومەر خەیری کۆنار و حامیلی یەڵدرم و وەیسی ئاکتاش، بەهەمانشێوە داواکارییان کرد.

داواکاری چاوپێکەوتن لەگەڵ ڕێبەری گەلی کورد عەبدوڵا ئۆجالان و سێ زیندانییەکەی دیکەی ئیمراڵی بە پاساوی "سزای دیسپلین" ئاستەنگ دەکرێت. دادگا ژمارەی دۆسیەکە دەربارەی سزای دیسپلین ئاشکرا ناکات.