کۆمیتەی پاراستنی رۆژنامەنووسان (سی پی جەی) رایگەیاند، ھەرێمی کوردستان لە ریزی ئەو وڵاتانەدایە کە تیایاندا تۆمەتی تیرۆر و دژە دەوڵەتبوون دەخرێتە باڵ رۆژنامەنووسان.
بەپێی راپۆرتێکی کۆمیتەی پاراستنی ڕۆژنامەنووسان (سی پی جەی)، ھەرێمی کوردستان ھاوشێوەی میسر، سعودیە، مەغریب لەم ساڵانەی دواییدا تۆمەتی بڵاوکردنەوەی ھەواڵی ناڕاست، تیرۆر و تۆمەتی دژە دەوڵەتی لە دژی رۆژنامەنووسان فراوانتر کردووە.
ئاماژە بەوەشکراوە، لەسەر ئاستی رۆژھەڵاتی ناوەڕاست میسر خراپترین وڵاتە بۆ زیندانیکردنی ڕۆژنامەنووسان و ھاوشێوەی تورکیا، پلەی ھەشتەمی لە جیھاندا گرتووە بە دەستگیرکردنی ١٣ رۆژنامەنووس و سعودیە لە ریزبەندی نۆیەمدایە بە دەستگیرکردنی ١٠ رۆژنامەنووس.
ئەوەشخراوەتەڕوو، کە لە بەحرەین و سوریا پێنج رۆژنامەنووس لە زیندانن، لە مەغریب و جەزائیر هیچ حاڵەتێکی نوێی زیندانی کردنی رۆژنامەنووسان تۆمار نەکراوە و لە هەرێمی کوردستانیش چوار رۆژنامەنووس لە زیندانن، کە یەک حاڵەتیان نوێیە.
لەئێستادا هەریەک لە رۆژنامەنووسان شێروان شێروانی، گوهدار زێباری و قارەمان شوکری بە تۆمەتی جیاجیا لە زینداندان و ماوەی نزیکەی سێ مانگیشە سلێمان ئەحمەد لەلایەن پەدەکەوە رفێندراوە و بێسەروشوێنکراوە.
لەماوەی چوارساڵی رابردوودا گوشارەکانی پەدەکە بۆ سەر رۆژنامەنووسانو چالاکوانان هەڵکشاوە و بەدەیان کەس بە هۆی رەخنەگرتن لە دەسەڵاتی ئەو حزبە لە هەولێر و دهۆک دەستگیرکراون.
گوشار و هێرشەکانی پەدەکە بۆ سەر ئازادی رادەربڕین و ئازادی رۆژنامەنووسی لە لایەن زۆر رێکخراو و دامەزراوەی نێونەتەوەییەوە رووبەڕووی رەخنەی توند بووەتەوە.
هـ. ب
