٣٤ مانگە زانیاری دەربارەی ڕێبەری گەلی کورد عەبدوڵا ئۆجالان دەست ناکەوێت، ئێشکگریی دادپەروەری لە ئامەد و وان و ئیستەنبوڵ و ئەدەنە و مێرسین و بەم دواییانەش لە مێرسین لە چوارچێوەی کەمپەینی نێونەتەوەیی "ئازادی بۆ عەبدوڵا ئۆجالان، چارەسەری دیموکراتیک بۆ پرسی کورد" بەردەوامە.

لە چالاکییەکەی ئامەد، چەندین کەسایەتی و لایەن لە شوێنە جیاوازەکانەوە سەردانیان کرد، پشتیوانی خۆیان بۆ چالاکوانان و خزمی زیندانیان دووپاتکردەوە، تیشکیان خستەسەر گرنگی ئازادی جەستەیی ڕێبەری گەلی کورد عەبدوڵا ئۆجالان، چونکە بە گۆشەگیری وی، گەلی کوردیش لە گۆشەگیریدایە.

چالاکوانان داوایان کرد پشتیوانی لە چالاکییەکە زیاتر بکرێت و بۆ ئەم مەبەستە بانگەوازیان لە هەمووان کرد بەشداری بکەن.  

لە چالاکییەکەی ئەدەنە، یەکێک لە چالاکوانان، جەواهیر تەمەل، دووپاتی کردەوە وەک دایکێک نایەوێت گەنجی کورد و تورک بمرن، ڕایگەیاند کلیلی ئاشتی لە دەستی ڕێبەری گەلی کورد عەبدوڵا ئۆجالانە و داوای کرد سەرەڕای هەموو هەلومەرجەکان ڕێبەری گەلی کورد عەبدوڵا ئۆجالان ئازاد بکرێت.

لە چالاکییەکەی مێرسین هاوسەرۆکی کۆمەڵەی پشتیوانی بنەماڵەی زیندانیان و حکومدراوانی چوکرۆڤا، ئەرگین ئاڵتونتاش ڕایگەیاند، پەیامی چالاکوانان ڕوونە، پێویستە گۆشەگیری سەر ڕێبەری گەلی کورد عەبدوڵا ئۆجالان و زیندانیانی سیاسی کۆتایی بێت و پرسی کورد بە ڕێگەی دیموکراتیک چارەسەر بکرێت.

یەکێک لە دایکی زیندانیان، ساڵیحە ئومێد، گوتی: "ڕێبەرمان لە زیندانە، با گۆشەگیری سەر ڕێبەرمان و زیندانیان هەڵبگیرێت. با ئەم ستەمە کۆتایی بێت. بانگی من بۆ هەموو دایکانە. با هەمووان پشتیوانمان بن. با ئەم گۆشەگیریە هەڵبگیرێت و ئاشتی بێتەدی".

لە چالاکییەکەی ئیستەنبوڵ، قومری ئاکگوڵ، گوتی: "با ببینە دەنگی زیندانیان، ببینە وەڵامێک بۆ داخوازی زیندانیان. پێویستە هەمووان تێکۆشان مەزنتر بکەن".

چالاکییەکەی وان، ٢٩ ڕۆژە بەردەوامە، پەرلەمانتارانی دەم پارتی لە وان، گوڵدەرەن ڤارلی و زوڵکوف ئوچار و چەندین کەسی تر سەردانی چالاکییەکەیان کرد، چەندین جار درووشمی "بژی بەرخۆدانی زیندان" بەرزکرایەوە.