ئەو ڕێپێوانەی لە پاریس لە شەقامی لا فایەت کە نووسینگەی زانیاری کوردستانی لێیە و ساڵی ٢٠١٣ تێیدا ٣ ژنی شۆڕشگێڕی کورد شەهیدکران، دەستی پێ کرد، بە بەشدارییەکی پڕ جۆش و فراوان تا وێستگەی نەیشن بەردەوام بوو.

لە سەرانسەری ڕێگەکەدا بڵاوکراوەکان دەربارەی کرۆنۆلۆژیای بەرخۆدانی ٢٥ ساڵەی ئیمراڵی دابەشکرا؛ دۆسیەکان پێشکەشی ڕادیۆ و تیڤی و گرووپ و پارتە سیاسییەکان و سەندیکاکان کران. جەماوەر بەردەوام درووشمیان بەرزدەکردەوە و پۆستەریان بە داواکاری ئازادی ڕێبەری گەلی کورد عەبدوڵا ئۆجالان هەڵگرت.

٥ هەزار بڵاوکراوە دابەشکران

لە ڕێپێوانەکەدا بڵاوکراوەکان بە زمانی فەرەنسی دەربارەی بەرخۆدانی ٢٥ ساڵەی ڕێبەری گەلی کورد عەبدوڵا ئۆجالان دابەشکران. لە بڵاوکراوەکان تیشکخراوەتە سەر گۆشەگیری توندی ئیمراڵی و ئاماژە بەوە کراوە وەرنەگرتنی زانیاری دەربارەی ڕەوشی ڕێبەری گەلی کورد عەبدوڵا ئۆجالان و هەڤاڵەکانی لە ئیمراڵی، خەم و نیگەرانی دەربارەی ڕەوشی تەندروستیان زیاتر کردووە.

هەروەها باس لەوە کراوە هەوڵی سەردانی بنەماڵە و پارێزەران بێ وەڵام ماوەتەوە، گۆشەگیری تەنها بە تێکۆشانی هاوبەش دەشکێنرێت.

کۆبوونەوە و وتوێژ دەربارەی گۆشەگیری

پاشان لە ناوەندی چاندی کوردی ئەحمەد کایا، سینڤزیۆنێک دەربارەی بەرخۆدانی ئیمراڵی تەماشاکرا، دواتر دەربارەی کۆبوونەوە و وتوێژێک دەربارەی گۆشەگیری ئەنجامدرا. لە وتوێژەکاندا ئاماژە بەوە کرا پێویستە چی بکرێت دژی گۆشەگیری. پاش پێشنیار و بۆچوونەکان، کۆبوونەوەکە دوور لە چاوی میدیاکان بەردەوام بوو.

کۆمیتەی ئامادەکاری چالاکییەکە دەستنیشانی کرد کە بەشداربوونی بەهێزی گەل بۆ قۆناغی ئینڤالدەس-ڕیپەبلیک کە سبەی وەک یەکەم ڕۆژ ئەنجام دەدرێت، زۆر گرنگە و سوپاسی هەموو بەشداربووانی کرد.