بۆتان ئەم تەمەن ٢٥ ساڵ بەڕێوەبەری رێکخستنەکانی پارتی دیموکراتیکی گەلان (هەدەپە) لە ناوچەی جزیر لە پارێزگای شرنەخ بە پاساوی ئەوەى سەیری کاروانی ئۆتۆمبێلەکانی قەیومە داسەپێنراوەکەى ئاکەپەی بەسەر شارەوانیی ناوچەکەیاندا و قائیمقامی جزیر محەمەد تونچ کردووە دەستگیرکرا.

 پۆلیسی سەر بە تیمە تایبەتەکانی دەوڵەتی تورک بۆتان ئەم-یان بە پاساوی سەیرکردنی کاروانی ئۆتۆمبێلەکانی قەیومە داسەپێنراوەکەى دەوڵەتی تورک دەستگیر کرد و بردیان بۆ بەڕێوەبەرایەتی پۆلیسی جزیر و وتەیان لێوەرگرت.

ئەم رایگەیاند، دوێنێ بەیانی کاتێک لەسەر شەقامی ئۆرهان دۆغان دا بووە کاروانی ئۆتۆمبێلەکانی قەیووم بەو شەقامەدا تێپەڕیوە و ئەویش سەیری کردووە، لەبەر ئەوە پۆلیسی تیمە تایبەتەکان دەستگیریان کردووە.

 راشیگەیاند، سەرباری ئەوەى نەوەستاوە و ئەو بە رێگای خۆیدا رۆیشتووە ، بەڵام دوای ئەوەی کاروانەکە نزیکەی ١٠٠ بۆ ١٥٠ مەتر دوور کەوتووەتەوە، پۆلیسی تیمە تایبەتەکان لە پشتەوە هاتن و رووی چەکیان تێکردم و  دەستیان بە پشکنینم کرد.

ئەم ئەوەشی راگەیاند، پۆلیس بە پاڵپێوەنان بردوویانە بۆ قائیمقامیەت و لەوێی پۆلیسەکان لێیان پرسیوە "بۆچی سەیری کاروانەکەت کردووە؟"

ئەم باسی ئەوەشیکرد، پۆلیس بە زۆر و بە سیفەتی "گومان لێکراو" خستویانەتە ناو زرێپۆشێکەوە و بردویانە بۆ بەڕێوەبەرایەتیی پۆلیس و وەک "تاوانبار" مامەڵەیان لەگەڵ دا کردووە و پۆلیس لە بەڕێوبەرایەتییەکە گوشاریان خستووەتە سەر.

بۆتان ئەم ئاماژەی بەوەشکرد، دوای ئەو گوشار و تۆمەتانە و هەروەها دوای وەرگرتنی وتە لێی ئازاد کراوە و راشیگەیاند، پۆلیسی جزیر تەنها لە دژی ئەو بەو شێوەیە هەڵسوکەوت ناکەن، بەڵکو لە دژی هەموو هاوڵاتییان بەو شێوەیە هەڵسوکەوت دەکەن.

ژ.ت