بەم دواییە، ئاسایشی پەدەکە شاڵاوێکی ڕەشبگیریی چالاکوانان و سیاسەتمەدارانی لە هەولێر و دهۆک دەستپێکرد، لە ناویاندا ٢٠ هاوڵاتیی کامپی پەنابەرانی شەهید ڕۆستەم جودی- مەخمور، لە ماوەی نزیکەی مانگێکدا دەستگیرکران.

بەپێی زانیارییەکان، تا ئێستا تەنیا چوار کەس لەو دەستگیرکراوانە سەربەست کراون و چارەنووسی ١٦ کەسی دیکەیان نادیارە و نازاندرێت لە کوێ ڕاگیراون.

ئەو کەسانەی سەربەست کراون، ئاماژەیان بەوەداوە کە لە زیندانەکانی پەدەکەدا، قسەی ناشرین، بێڕێزیی و سووکایەتییان بەرامبەر کراوە و لەو شوێنانە زیندانیی کراون، کە چەتەکانی داعش تێدابوون و هەندێک جاریش خراونەتە ژووری تاکەکەسییەوە.

پێشتر کۆمیتەی پەیوەندییەکانی کامپی مەخمور، ئەو کەسانەی دەستگیرکراون، ١٥ـیان کرێکار و پێنجی دیکەشیان خوێندکاران، کە لە ڕۆژی جیاوازدا دەستگیرکراون، لە کۆی ئەو ٢٠ کەسەش پێنجیان ژنن، کە هەندێکیان لە کاتی ڕۆشتنیان بۆ هەولێر و هەندێکیشیان لە شوێنی مانەوەیان لەناو شار دەستگیرکراون.

پەیوەندیدار بە بابەتەکەوە، کۆمیتەی پەیوەندییەکانی کامپەکە، پەیوەندییان بە خاچی سووری نێودەوڵەتییەوە کردبوو، بەڵام ناوەندی خاچی سوور ڕایانگەیاندبوو، کە ئاگایان لە بابەتەکە نییە و لەو بارەوە لێکۆڵینەوە دەکەن.

خانەوادەی ئەو دەستگیرکراوانەش، ڕۆژانە بۆ ئەوەی زانیارییەک لە منداڵەکانیان وەرگرن، لە هەوڵداندان و تا ئێستا هیچ ئەنجام و زانیارییەکیان لەسەر چارەنووسی ڕۆڵەکانیان دەستنەکەوتووە.

ناوی ئەو کەسانەی دەستگیرکراون بەم شێوەیەیە:

١- حاجی یڵدرم

٢- ئایجان چەلەبی

٣- سەعید کارا عەبدوڵا

٤- عەبدولکەریم کارا یوسف

٥- سادق بولوت ئەحمەد

٦- ئایدن ئاپایدن

٧- ئورهان بلوت

٨- ڕوکەن ئوستون

٩- کارۆش ڕۆستەم

١٠- شڤان محەمەد

١١- زیلان سالح

١٢- قەدەر سالح

١٣- غوربەت تونچ

١٤- ڕوبار سادق

١٥- ئیحسان شێخ سلێمان

١٦- ناوەکەی نەزاندراوە

ز.ش