هاوسەرۆكی كۆمەڵگەی ئازاد و دیموكراتیكی رۆژهەڵاتی كوردستان"كۆدار"، فواد بێریتان بەبۆنەی هاتنی جەژنی نەتەوەیی نەورۆزەوە رایگەیاند؛ نەورۆز جەژنی ئازادی گەلی كوردە. جەژنی بۆنیادنان و سازانی یەكێتی نەتەوەیی و پتەوكردنی ریزەكانی گەل و هێز و لایەنە سیاسیەكانی كوردستان و پێكەوەژیانی دڵخوازانە و ئاشتیانەی گەلانە.

نەورۆز؛ رۆژی یەكگرتنی هێزەكانی بەرخۆدانە، لەدژی زۆڵم و ستەم و ناعەدالەتی. رۆژی دامەزراندنی سیستەمی كۆمەڵایەتی هاوچەرخە كە هەموو كۆمەڵگە، چین و نەتەوە جیاوازەكان، گەلان و چاند و باوەڕیە فرەرەنگیەكان لەكەشێكی یەكسان و ئازاددا بەیەكەوە بژین. بۆیەش نەرۆز؛ رۆژی یەكگرتن و راپەڕینە بەرووی نەیارانی ئازادی و دیموكراسیدا. هەر بۆیەش نەورۆز؛ رۆژی نوێ كردنەوەی پەیمان و سۆز و بەڵێن و بەجێهێنانی هیوا و ئامانجەكانە، بەتایبەتی ئامانج و هیوای شەهیدانی رێگای ئازادی و ئەندازیاری ئازادییە. بۆیەش پێش هەر كەس، جەژنە نەورۆزەی ساڵی 2723ی كوردی لەدامەزرێنەری رێبەری ئازادی و مرۆڤایەتی و نەورۆز؛ رێبەر ئاپۆ، بنەماڵە سەربەرزەكانی شەهیدان و كەس و كاریان و زیندانیانی سیاسی و تێكۆشەرانی رێگای ئازادیخوازی گەلی كوردستان"گەریلاكانی ئازادی كوردستان" كە بەرۆحی نەورۆز لەنێو تێكۆشانن و ئازادیخوازان و دیموكراسیخوازانی رۆژهەڵاتی ناوین و جیهان و لەوانەش جەژنە پیرۆزە لە سەركاروانانی شۆڕشی ژن، ژیان، ئازادی دەكەم كە شەش مانگە بەهەموو توانا و هێزیانەوە سەرچۆپی ئازادی دەگێڕن و بەبێ سڵكردنەوە و دوودڵی لەبەرامبەر بە رژێمی داگیركەری سەركۆت و سێدارە و دەوڵەتی فاشیستی تورك"زۆحاكانی هاوچەرخ، ئەردۆغان و خامنەیی" لەگۆڕەپانەكانی خەبات و خۆڕاگرین و رۆژ بەرۆژ شۆڕشەكە بەگیان و دڵیان دەگەشێننەوە.

هاوسەرۆكی كۆدار؛ لەزمانی رێبەر ئاپۆوە وتیشی؛ گەلی كورد، گەلی نەورۆزە. ئەو گەلەیە كە هەمیشە بەدوای نوێ بوون و وەرچەرخانە لەژیاندا. ئەو گەلەیە كە خاوەن چاندنێكی بەرخۆدانڤانیە و هێزی خۆی لەكولتوری زاگرۆس نشینی خۆیەوە وەردەگرێت. نەورۆز كولتوری بەرخۆدانیە لەدژی ناعەداڵەتی و تواندنەوە و سڕینەوە، نەورۆز كولتوری هاوبەشی ئەو گەلانەیە كە كەوانەی زاگرۆس نیشتەجێن و خاوەن رۆحێكی بەرخۆدانین. دەوڵەت ـ نەتەوەكانی كاپیتالیزم بۆ ئەوەی بەردەوامی بەبوونی خۆیان و سیستەمەكەیان بدەن، دەبێت ئەو كولتور و چاندەی گەلانی زاگرۆس تێكبشێكنن، بۆیەش نەورۆز هێزی بەرخۆدانی سیستەمی مۆدێرنیتەی دیموكراتی گەلانی ئازادیخوازە كە پێداگرن لەبوون و شۆناسی راستەقینەی خۆیان و ژیانی ئازاد. بۆ گەلی كوردیش، نەورۆز، سیمبۆلی ناسنامە و شۆناس و بوونە.

فواد ئەوەشی راگەیاند كە؛ شۆڕشی ژن، ژیان، ئازادی پەنجاهەمین ساڵرۆژی لەدایكبوونیەتی و بەناسنامەی ئیلاهەبوونی ژنانی زاگرۆس نشین و رۆحی نەورۆز ئەمڕۆكە لەگۆڕەپانەكانی خەباتدان، شۆڕشەكە بووەتە هیوا و ئاواتێك بۆ هەموو گەلانی جیهان و ژنان.

مەزلووم دۆغان؛ ناسنامەی كاوەی هاوچەرخ و زیندووكەرەوەی بەرخۆدان ژیانەیە

لەبەرنامەیەكی تایبەت بەهاتنی نەورۆز كە لەتەلەفزیۆنی ئارین تیڤیدا بڵاو دەكرێتەوە؛ هاوسەرۆكی كۆدار؛"فواد بێریتان"؛ جەژنی نەورۆزی لەرەهەندە جیاوازەكانەوە هەڵسەنگاند و رایگەیاند؛ ئەوەی بۆ گەلەكەمان لەبۆنە نیشتیمانی و نەتەوەییە گرنگ و جێ بایەخە، پتەوكردنی ریزەكانی گەلەكەمان و هێز و لایەنە سیاسیەكان و دامەزراوە نیشتیمانیەكان و چین و توێژەكانی گەلەكەمان لەسەر هێڵی ئازادی و قەبوڵكردنی جیاوازیەكان و پێكەوە كاركردن لەدژی نەیاران و ناحەزانی گەل و نیشتمانە.

كاتێك دەوڵەتی داگیركەری تورك ویستیان كۆتایی بەكولتوری نەورۆز بهێنن؛ هەڤاڵ مەزلووم دۆغان لەزیندانی دیاربەكر بەسێ دەنكە شقارتە و بەچالاكی گیانبازانەی و بەدروشمی"بەرخۆدان، ژیانە"، نەورۆزی ژیاندەوە و هاوشێوەی كاوە ئاسنگەر؛ نازناوی كاوەی هاوچەرخی پێ بەخشرا. ئەوە ئەو رۆحەكەی كە هەمیشە لەناخی تاكی كورددا. هەڤاڵ مەزلووم، رۆحی بەرخۆدانڤانی نەورۆزی هاوچەرخە لەمێژوویی نوێ گەلەكەماندا، دەبێت ئەو رۆحە هەمیشە بەزیندوویی بهێڵینەوە و بەرز و پیرۆزی رابگرین. رێبەر ئاپۆ؛ وەڵامی هاواری بەرخۆدان ژیانەی هەڤاڵ مەزلووم؛ كاوەی هاوچەرخی ئەمڕۆكە گەیاندوەتە هەموو كوردستان و رۆژهەڵاتی ناوین و جیهان و گەریلا سەربەرزەكانی كوردستان، گەریلاكانی رۆژهەڵاتی كوردستانیش جارێكی تر ئەو رۆحەیان بۆژاندەوە و لەدەریای رەشەوە بگرە تا لۆڕستان بەدرێژایی زەنجیرە چیاكانی زاگرۆس ئاگری بەرخۆدانیان گەیشتاندۆتەوە. بۆیەش نەورۆز، رۆح، هەستە، سۆز، ئەوین و توڵە و بەرخۆدانە.

نەورۆز، كاڕنەواڵێكە و گۆڕەپانی دەربڕینی ویست و داخوازیەكانی گەلەكەمان و گەلانی ئازادیخوازە

بێریتان، تیشكیشی خستە سەر ئەوەی كە نەرۆز تەنیا داب و نەریتێكی كولتوری و چاندنی نییە؛ بەڵكو لەهەمانكاتدا، نەورۆز خاوەن رەهەندێكی سیاسییە. بەتایبەتی لەمێژووی هاوچەرخ و ئەم پەنجا ساڵەی بەپێشەنگایەتی گەلەكەمان لەباكوری كوردستان و خۆراگری شۆڕشگێڕان لەزیندانەكانی دەوڵەتی فاشیستی تورك؛ ئێدی نەورۆز رەنگ و بۆنێكی سیاسیی بەخۆیەوە گرت. ئێدی ئەو قۆناخەی كە نەورۆز تەنیا وەكو سەیرانێك و خۆانێكی خۆش و بەسەركردنەوەی دەرو دراوسێ بەكۆتا هاتووە و نەورۆز شێوەیەكی تر و قۆناخێكی دیكەی بەخۆیەوە گرتووە. گەلەكەمان لەباكوری كوردستان نیشانیاندا كە ئێدی نەورۆز كاڕنەواڵێكە، گۆڕەپانێكی خەبات و تێكۆشان و ئەو ویست و ئامانجانەیە كە بتوانین بەشێوەیەكی ئازادانە و بەجەماوەری دەریانببڕین. لەرۆژهەڵاتی كوردستانیش هاوشێوەی گەلەكەمان لەباكوری؛ ئەوانیش لەم چەند ساڵەی دواییدا؛ خەڵك بەفۆرمە راستەقینەكەی خۆی و بەجەماوەری و گەرم و گوڕیەوە پیرۆز دەكرێت. و پەیامی ئەوە دەدەن كە وەكو نەتەوە پێداگرن لەسەر نرخ و بەها نیشتیمانی و نەتەوەییەكانی خۆیان. لەشەهیدان و بنەماڵەكانیان لەو رووناكیەكەی بەهەڵكردنی ئاگری نەورۆز گەرم و گوڕی دەكەن. پەیامی بوون و ناسنامە و شۆناسی خۆیان دەدەن. ئەم هەنگاوەی گەلەكەمان جێگای رێز و پێزانینە. تەنانەت نەتەوەكانی تریش وەكو فارس و ئازەری و بەلووچ و عەرەب و ... بۆ ئەوەی لەواتای راستەقینەی نەورۆز تێبگەن لەجەژنی نەورۆزدا دێنە كوردستان و بەشداری بۆنەكانی پیرۆز بایی دەكەن. ئەوەیە كە نەورۆز جەژنی یەكگرتن و پێكەوەیی بوونی گەلانە.

پەیامی ئەوە بەدەوڵەتە ستاتۆپارێز و داگیركەرەكانی سەر كوردستان و سیستەمی مۆدێرنیتەی كاپیتالیزم دەدەن كە ئێمەی گەلانیش بوونمان هەیە و خاوەن كەلتور و چاند و هەبوونی تایبەت بەخۆمانین، ئێوە ناتوانن بەبێ پەسەندكردنی ئێرادەی ئازادانەی ئێمە، برەو بە تەمەنی دەسەڵاتداریەتی خۆتان بدەن. ئەمەش پەیامێكی سیاسی، كۆمەڵایەتی گەلانی ئازادیخواز كە لەنەورۆزدا بەگوێ سیستەم دسپۆت و زۆڵمكاردا دەیدەنەوە.

گەلەكەمان لەنەورۆزدا، پەیامی یەكگرتوویی و پێكەوەیی دەدەن و ئەمەش پەیامێكی سیاسییە

ئەگەر ئەمڕۆ گەلەكەمان بەبێ جیاوازی جۆگرافی و زاراوە و باوەڕی دەست لەنێودەست و شانبەشان یەكدی لەگۆڕەپانی نەورۆزدا لەرۆژهەڵات و رۆژئاوا و باكور و باشور، گۆڤەند و رەشبەڵەكی ئازادی دەگرن و بەبێ ترس و دوودڵی رووبەرووی نەیاران پەیامی یەكگرتووویی دەدەن، پەیامی ئەوە دەدەن كە ئەوان یەكیان گرتووە و ئێدی نۆرەی ئێمەیە. ئەو پەیامە لەئامەد، لەكەركوك و كۆبانی دەدرێت، دەبێت ئێدی ئێمەش وەكو هێز و لایەنە سیاسیەكان یەكبگرین و پەیامی ئەوە بەهەموو هێزە داگیركەرە هەرێمی و جیهانیەكان بدەین كە بەبێ چارەسەركردنی پرسی كورد و گوێدان بۆ داخوازیەكانی گەلی كورد، ناتوانن پەرە بەتەمەن و سیستەم و سەپاندنی پرۆژەكانیان بدەن. ئەمە پەیامێكە لەئاستێكی هەرە بڵنددا، سیاسییە.

شۆڕشی ژن، ژیان، ئازادی لەپەنجاهەمین ساڵڕۆژی لەدایكبوونیدا بەرەو لووتكە هەنگاو دەنێت

 شۆڕشی، ژن، ژیان، ئازادی وەكو كاروانێكە كە بەرەو لووتكە رێگای گرتووە و بەكەس بەربەست ناكرێت. شۆڕشێكە بەسێ وشەی ئەفسوونئاویی"ژن، ژیان، ئازادی"هەموو كۆمەڵگەی خستووەتە جمۆجووڵەوە، بۆیەش كاتێك باس لەشۆڕشی ژن، ژیان، ئازادی دەكرێت، مرۆڤ جۆش و خرۆش و هەیەجان سەراپای وجوودی دێنێتە خرۆشانەوە. ئەو شۆڕشەی بەپێشەنگایەتی ژنان بەرپا بووە، گەنجان و خوێندكاران و هەموو چین و توێژەكانی هێناوەتە نێو گۆڕەپانی خەبات و تێكۆشانەوە. مرۆڤ دەتوانێت بڵێ كە شۆڕشی ژن، ژیان، ئازادی بووەتە رۆحێك بۆ ئەو جیهانە بێ رۆح و بێ هەست و سۆزەی سیستەمی مۆدێرنیتەی سەرمایەداری خۆلقاندۆیەتی. ئەو شۆڕشەیە كە لەدژی عەقڵیەتی سەردەستی پیاو و كوێلایەتی ژنە. شوڕشێكە لەدژی چەوساندنەوە و ژێردەستەیی و پەیامێكە لەدژی رەگەزگەرایی و نەتەوەپەرەستی و دینپەرەستی و مەزهەبگەرایی و نیشانی هەموو لایەكیاندا كە شۆڕشێكی هەمەلایەنەی ئازادییە.

ئازادی وڵات لەئازادی ژنانەوە تێپەڕ دەبێت

شۆڕشی ژن، ژیان، ئازادی پەنجاهەمین ساڵڕۆژی خۆی تێپەڕكردوە. شۆڕشی ژن، ژیان، ئازادی لەو رۆژەوەی دەستی پێكردوە كە پەكەكە لەگوندی فیس بەفەلسەفی ژیانی ئازادی لەلایەن رێبەر ئاپۆ و فەلسەفەی ژنی ئازاد و بەوتنەوەی شۆڕشێك كە ژن پێشەنگی نەبێت مسۆگەر ناگاتە ئازادی دەستی پێكردوە، هەر بۆیەش شۆڕشی ژن، ژیان، ئازادی پەنجاهەمین ساڵەی خۆی تێپەڕاندوە و هاوشێوەی شەپۆلەكانی دەریا هەرچی دەچێت، بەرینتر و بەرفراوانتر دەبێت. بەرۆژان و مانگان و ساڵانە لەچیا سەركەشەكانی كوردستان ژنان و لاوان هەر رۆژ لەپێناو سەرخستنی ئەو شۆڕشە شەهید دەدەن، بەتایبەتی ژنان، ئەمڕۆكە بەو تێكۆشانەی لەو هەلومەرجە نالەبارەی دنیای بێ رەحم و زاڵمەی سەرمایەداری بوونەتە خاوەن ناسنامەیەكی ئیلاهەبوون. ئێستاكەش ئەو كچ و ژن و لاوانەی لەنێو شەقام و كوڵانەكانی رۆژهەڵات و ئێراندا لەبەرامبەر بە هێزە سەركۆتكارەكان سینەیان دەكەنە قەڵغان ئەو رۆحەی ژنانی ئیلاهەیە كە یەكیان گرتووەتەوە و بوونەتە هێز. هێزی یەكگرتوویی ژنانی زاگرۆس نشینە و ئەو ژنانە بەرۆحی نەورۆزەوە لەنێو تێكۆشاندان. شۆڕشی ژن، ژیان، ئازادی بەرهەمی زانستی ژنۆلۆژییە.

شۆڕشی ژن، ژیان، ئازادی بەبەرخۆدانی نەورۆز، پەیامی دا پیاوانیش كە ئازادی وڵات لەئازادی ژنانەوە تێپەڕ دەبێت. بۆیەش دەبێت پیاوان لەبەرامبەر بە شۆڕشەكە نەبنە ئاستەنگ و شۆڕشی ژن، ژیان، ئازادی وەكو دەرەتانێك بۆ ئازادی خۆیان ببینن و خاوەنداری لێبكەن. شۆڕشی ژن، ژیان، ئازادی شۆڕشێكی هاوچەرخە كە ئازادی كۆمەڵگە بەتەواوەتی كردۆتە ئامانجی خۆی.

پاراستنی ژینگە؛ پاراستنی وڵاتە

هاوسەرۆكی كۆمەڵگەی ئازاد و دیموكراتیكی رۆژهەڵاتی كوردستان"كۆدار"فواد بێریتان، لەسەر رەهەندی ئیكۆلۆژی نەورۆزیش ئاخاوت و رایگەیاند؛ پاراستنی ژینگە و پاك و خاوێن، نیشانەی پاراستنی وڵاتە. مرۆڤێك كە نەتوانێت ژینگەی خۆی بپارێزێت، ناتوانێت وڵاتی خۆشی بپارێزێت. مرۆڤێك كە ژینگەی وڵات نەپارێزێت، ناتوانێت باس لەوڵاتپارێزی بكات. یەكێك لەو هۆكارانەی گەلی كورد، پەیوەستە بەخاكەوە، لەنزیكبوونەوەی بۆ ئیكۆلۆژیەوە سەرچاوە دەگرێت. چەندە نەیاران ویستوویانە بەئاگر و ئاسن كوردان لەواری باو و باپیرانیان وەدەرنێن، بەڵام سەرەڕای هەموو زۆری و زەحمەتیەكان جارێكی تر تاكی كورد و نەتەوەكەمان روویان لەگوند و چیا و كەژ و كێوە، ئەوەش ئەو رۆحەیە كە نزیكە لەسرۆشت و بەرخۆدانی سرۆشتی ژیان. گەلی كورد، گەلێكی سرۆشت و ژینگەیە، هەر بۆیە رەهەندێكی دیكە و ئەساسی نەورۆز؛ ژینگەپارێزییە.

گەلی كورد؛ گەلێك بەرۆژ، رۆژ و شەوی دەپێوێت. رووی لەرووناكی و پشت لەتاریكی، كە چاو دەكاتەوە، بەپانتایی هەموو دنیا تەماشا دەكات و كە چاویشی دەگرێت بەقووڵایی تاریكی، شەو پێشوازی دەكات. بۆیەش گەلی كورد؛ گەلێكی نەورۆزی و گەلێكی سرۆشت و ژینگەیە. داگیركەران بەو هێرشە سیاسەی لەسەر گەلی كورد بەرێوەی دەبەن، تاك و كۆمەڵگەی كوردی لەشوێنی نیشتەجێ بوونی دادەبڕن، واتا سیاسەتی قڕكردنی جەستەیی، یا خود چاندی بەتەنیا پەیڕەو ناكەن، بەڵكو لەهەمانكاتدا سیاسەتی قڕكردنی ژینگەیش لەسەر كوردان بەرێوە دەبەن. نەیاران دەزانن بۆ ئەوەی تاكی كورد لەنێو مەنگەنەی سیاسەتی دژە مرۆڤیی خۆیاندا بتوێننەوە، دەبێت لەگوند و شوێنی نیشتەجێ بوونی داببڕن، ئەمەش ئەو چەكەیە لەبەرامبەر بەكۆمەڵگەی كورد گرتوویانەتە بەر.

ژینگەپارێزی، فەلسەفەی بەرخۆدان و پاراستن و بوونە. ئەم نزیكبوونەوەیە لەدێر زەمانەوە لەبەرامبەر بەگەلەكەمان لەچیرۆك و داستان و ئەفسانە كوردیەكانی گیلگامێش بەئاشكرا بەدی دەكرێت. یەكێك دەیەوێت بەرەو بەفەلسەفەی ژیان و دەرمانی جاودانگی هەمیشەیی ژیان بدات و یەكێكی تریش دەیەوێت لەپێناو گەیشتن بەدەسەڵات هەموو چەشنە بەكرێگیراویەتی و نۆكەریەتی و تەسلیمیەت قەبوڵ دەكات.

نەورۆز قەڵای ژینگەپارێزییە

دەوڵەتانی داگیركەر، ئەمڕۆ لەكوردستان بەهێرشێكی هەمەلایەنەی درۆستكردنی بەنداو، وشككردنی سەرچاوە ئاویەكان، خستنە ژێر ئاوی شوێنەوارە مێژووییەكان و سیاسەتی دژە كەلتور و چاند، بەراگۆاستن و تواندنەوە و چوڵكردنی گوندەكان، پەلاماری بوون و شۆناسی كوردان دەدەن، ئەمە داگیركەری و زۆردارییەكی سیستەماتیكە. هێرشێكی بیودەسەڵات لەبەرامبەر بەگەلەكەمان پەیڕەو دەكەن. لەسەر ئەم بنەمایەیە كە ئێمە باوەڕمان وایە، ئەگەر گوند نەبێ، شاریش ناتوانێت بژیت. بوونی شار، بەبوونی گوندەكانەوە گرێدراوە. لەنەورۆزدا دەبێت هەر تاكێكی كورد، دارێك بڕوێنێت. دەبێت هەموو كەژ و كێو و دۆڵ و دەشت و چیا بكەینە دارستان و سەرسەوزیان بكەین. دەبێت لەبەرامبەر بەتاڵانكردنی ژینگەی كوردستان ببینە قەڵغان، سەیركەن، دەوڵەتی داگیركەر و فاشیستی تورك بەهاوكاری بارزانیەكان ئەمڕۆكە لەبادینان دارستانەكانی كوردستان دەبڕنەوە و ژینگەكەمان وێران دەكەن. ئەوانە هیچ جیاوازیەكیان لەگەڵ چەتەكانی داعش نییە كە لەعەفرین دارە زەیتوونەكان دەبڕننەوەو تاڵانیان دەكەن. دەیانەوێت بەتاڵانكردنی ژینگەی كوردستان، تاكی كورد وشك و بێ رۆح كەن. دەبێتە بەشێك لەپەیامەكانی گۆڕەپانی نەورۆزمان لەسەر پاراستنی ژینگە و سرۆشتی كوردستان بێت و نەورۆز بكەینە، سەكۆ و قەڵای ژینگەپارێزی.

دەوڵەتی تورك لەچیا و رژێمی ئێرانیش لەخوێندنگاكاندا گازی ژەهراوی بەكاردێنن

فواد بێریتان، هاوسەرۆكی كۆدار لەبەشێكی تری ئاخاوتنەكانیدا، ئاماژەی بە هێرش و پەلامارەكانی رژێمی داگیركەری ئێران بۆ سەر كچان و ژنان و خوێندنگاكان و ووتی؛ ژەهرخواردكردنی كچان و ژنان و خوێندنگاكان، هێرشێكی ئایدئۆلۆژیكیە. ئەوە هێرشێكە لەبەرامبەر بە ژنی ئازاد، هێرشێكە لەبەرامبەر بەو كچ و ژنانە پێشەنگەی كە ئەمڕۆكە لەئێران و رۆژهەڵاتی كوردستان پێشەنگایەتی شۆڕشی، ژن، ژیان، ئازادی دەكەن. هیچ جیاوازیەك لەنێوان داگیركەراندا نییە، دەوڵەتی توركی داگیركەری لەچیاكانی كوردستان بۆمبی كیمیایی لەبەرامبەر بەگەریلاكانی ئازادی كوردستان بەكاردێنێ، رژێمی فاشیست و داگیركەری ئێرانیش هەمان كار لەبەرامبەر بەكچان و ژنان و خوێندكاران و خوێندنگاكان و پێشەنگانی شۆڕشی ژن بەكاردێنێت. نایانەوێت ئەو كەلتورە بەرخۆدانیە لەكۆمەڵگەدا تەشنە بستێنێ، بۆیەش دەیانەوێت بەهەر نرخێك بووە ئەو شۆڕشە كۆتایی پێ بهێنن. لەنێوان داگیركەراندا مرۆڤ ناتوانێت هیچ جیاوازیەك ببینێت.

نەورۆز پەیامێكە لەبەرامبەر بە دۆژمن كە دەڵێت؛ ئێدی بەسە!! دەبێت گەلانی ئێران لەم نەورۆزدا، قسەی كۆتایی خۆیان و ویست و داواكاریە راستەقینەكانیان لەبەرامبەر رژێمی داگیركەر بەئاشكرا بەیان كەن. و بەو هیوایەن ساڵی نوێ گەلەكەمان و گەلانی ئێران ببێتە ساڵی سەركەوتنی شۆڕشی ژن، ژیان، ئازادی و بۆیەش دەڵێت، نەسرەوتن تا سەركەوتن و نەورۆزتان پیرۆز بێت و هەر رۆژتان نەورۆز بێت. 

ژ.ت