پەی ئازادی ڕابەر ئاپۆی ١٢ ساڵێن جە ستراسبۆرگەنە چالاکی ئێشکگیری بەردەواما. جە حەفتەو ٦٤٩ ەمینینە گرووپێوە ئاراوی ئێشکگیرییەکەشا هۆرگێرت و واتشا: "تا ڕابەرایەتیما ئازاڎ بۆنە، مڎرامان جە گرڎ شۆنێنە بەردەوام بۆنە".
بە سەرماشقایەتی دەسوەڵێوستەی ئازادی پەی ئۆجالانی بە مەراموو هۆرگێرتەی گۆشەگیری سەرو ڕابەر ئاپۆی و مسۆگەرکەردەی ئازادی جەسەیی، جە ٢٥ و حوزەیرانو ٢٠١٢ یوە چالاکی "ئێشکگیری ئازادی" ئەنجام مڎریۆ. هەر حەفتێوە جە وڵاتێوە جیاوازۆ گرووپێوە چالاکییەکەی هۆرگێرانە، جە حەفتەو ٦٤٩ ەمینینە گرووپێوە جە شارو ئاراوی سویسرای چالاکییەکەشا هۆرگێرت.
گرووپەکەو ئاراوی جە ئەنداماو مېیانوو جەمەو کوردی دیموکراتیکی بازلی، مەعسوم ئۆزەر و سەرحەد کانات و حەسەن حوسەین شاهینی پێکمۍ، ئێشکگیری ئی حەفتەیشا گێرت ئەستۆ.
مەعسوم ئۆزەر بە نامۍ گرووپەکەیۆ قسێش کەردۍ، گۆشەگیری ٢٦ ساڵەو سەرو رابەر ئاپۆی شەرمەزار کەردو، واتش: "داوا جە ڕێکوزیا مېیاننەتەوەییەکا مکەرمۍ کە بانگەشەو پارێزنای مافەکا مرۆڤی مکەرا، بەتایبەت داوا جە سی پی تی (کۆمیتەو ڕاگێرتەی جە ئەشکەنجە)ی و کۆنسەو ئۆروپای، یاساکاو ۋێتا جابەجێ بکەردۍ. داواتا ۋنە مکەرمۍ، دژو دڕندەیی سەرو گەلوو کوردی و کوردەسانی، دژو دەسسەرەرەگێرتەو شارەوانییەکاما، دژو گێرتەو ٢٦ ساڵەو ڕابەرەکەیما، مردێوە و دەنگتا هۆربڕدۍ. پېسە کوردا تاراوگەی و کوردەسانی، پەنەوازا ڕابەریما پارێزنمۍ. ئازادی جەسەیی ڕابەریمان راسەوخۆ پێوەسا بە ئازادی ۋێماوە. گۆشەگیری سەرو ڕابەر ئاپۆی، بێگومان گۆشەگیرییا سەرو تەمامو گەلوو کوردی. داوا جە گرڎ لایۍ مکەرمۍ، دژو فشاری و گۆشەگیری دەسەڵاتو فاشیستی ئاکەپەی مرداوە و دەنگ هۆربڕا. مڎرامانما هەمیشە بەردەوام مەبۆ. هەتا ڕابەرایەتیما ئازاد مەبۆ، جە گرڎ یاگێنە چالاکی و ئێشکگیری بەردەوام مکەرمۍ".
