لە چوارچێوەی پیرۆزباییەکانی ٢٧ی تشرینی دووەم کە ٤٦ەمین ساڵیادی دامەزراندنی پەکەکەیە لە شەنگال بە پێشەنگایەتی یەکێتی گەنجانی ئێزدی، یەکێتی ژنانی گەنجی شەنگال و دەستپێشخەری گەنجانی عەرەب مەراسیمێکی پیرۆزبایی سازکرا.

مەراسیمەکە لە پارکی سەرۆکایەتی لە دۆڵی کەرسێ بەڕێوەچوو، لەسەرەتادا بەشداربووان بە خولەکێک بێدەنگی رێزیان لە یادی شەهیدانی ئێزدخان و کوردستان گرت.

حەمۆ شەنگالی لەسەر ناوی گەنجان وتارێکی پێشکەش کرد و رایگەیاند، "ئێمە دەڵێین ئەم ساڵ دەبێتە ساڵی کۆتایی گۆشەگیری لە ئیمراڵی و دوایین ساڵی فاشیزمی دەوڵەتی تورک.شەرڤانانی ئازادی کە فیدایی رێبەر ئاپۆن بە بەرخودان و تێکۆشانی گەورەیان مێژوو دەنوسنەوە. ئێمە ٢٧ی تشرینی دووەم لەوان پیرۆز دەکەین و سڵاو لە بەرخودانی ئەوان دەکەین."

لەسەر ناوی دەستپێشخەری گەنجانی عەرەبیش جەمشید عەرەب قسەی کرد و باسی لەوەکرد، کە لەسایەی ئەندێشە و فەلسەفەی رێبەر ئاپۆ پێکهاتەکانی شەنگال لەپێناو ژیانێکی هاوبەشدا تێدەکۆشن.

دوای وتارەکان گروپی چیای شەنگالی سەر بە ناوەندی کولتور و هونەری شەنگال گۆرانی پێشکەش کرد و مەراسیمەکە بە هەڵپەڕکێ کۆتایی هات.