لە ناوچەی سلۆپی شەرناخ بۆ شەرمەزارکردنی کوشتنی گوڵیزار یەڵدز ڕێپێوانێکی جەماوەری ئەنجامدرا. پەرلەمانتارانی دەم پارتی بێریتان گونەش و جۆرج ئاسڵان، هاوسەرۆکی شارەوانی مێردین دەڤریم دەمیر، ئەندامانی پارت و ڕێکخراوەکان بەشداربوون.

پاش ڕێپێوانەکە، هاوسەرۆکی کۆمەڵەی مافەکانی مرۆڤ (ئیهەدە)ـی شەرناخ، ئەسین یەڵماز ڕاگەیاندراوێکی خوێندەوە، ڕایگەیاند ساڵانێکە لە شەرناخ لەلایەن دەوڵەت و پیاوانەوە ژن دەکوژرێن، گوتی: "بۆ ئەوەی ژیانی ژنان بپارێزرێت، پێویستە قورسترین سزا بەسەر بکوژانی ژناندا بسەپێنرێت. هەموومان گوڵیزارین".

ئەندامی تەژەئا، عەدالەت فیدان، گوتی: "شێوازی کوشتنی گوڵیزار لە شێوەی داعش بوو، ئەم شێوازە شەرمەزار دەکەین".

پەرلەمانتاری دەم پارتی بێریتان گونەش ڕایگەیاند کاتی ڕاپەڕینی ژنانە بۆ ڕێگرتن لە توندوتیژی، گوتی: "چۆن لە ڕۆژئاوا دژی داعش بەرخۆدانمان کرد، ئەمڕۆش لێرە بەرخۆدان دەکەین. توندوتیژی دژی ژنان شتێکی سیستەماتیکە و بەدەستی دەوڵەت ئەنجام دەدرێت".

پاشان دایک و خوشکی گوڵیزار قسەیان کرد و داوایان کرد گەورەترین سزا بەسەر بکوژدا بسەپێنرێت، دووپاتیان کردەوە تا کۆتایی بەدواداچوون بۆ دۆزی گوڵیزار دەکەن.

چالاکییەکە بە درووشمی "ژن ژیان ئازادی" کۆتایی هات.