قەرارە ٣٢ هەزار پەڕەییەکەو دەربارەو دۆزو کۆبانێ ئاشکرا کریا
قەرارەکې پېوەس بە دۆزو کۆبانێ کە چنەشەنە ١٠٨ سیاسەتمەدارې دادگایی مکریا، ئەرەیاۋېیا.
قەراری دماین پېوەس بە دۆزو کۆبانێ کە چنەشەنە هامسەرۆکو گرڎیی وەڵینو پارتو دیموکراتیکی گەلا (هەدەپە) سەڵاحەدین دەمیرتاش بە ٤٢ ساڵۍ و هامسەرۆکۊو گرڎیی وەڵینەو هەدەپەی فیگەن یوکسەکداغە بە ٣٠ ساڵې و ٣ مانگې سزاو زینانیشا سەرەرە سەپیا، دماو ساڵێوە ئاماڎەکریا. جە دۆزەکەنە ١٠٨ سیاسەتمەدار دادگایی کریێنې و ٢٤ کەسېچ سزاو زینانیکەردەیشا سەرەرە سەپیان. قەرارەکە جە ٣٢ هەزار پەڕا پێکمې.
قەرارەکە ڕا مکەرۊوە پەی ئانیشا چی قەزیەنە دادگایی مکریا کە تانەکاشا پێشکەش بە دادگاو لوایۊپۊرەی بکەرا.
سزاو بەشێوە جە سیاسەتمەدارا
جە دۆزەکەنە'قەزیەکە'نە، بە تۆمەتۊو "ئەندامیەتی ڕێکوستەی" ١٠ ساڵې سزاو زینانی سەرو هامسەرۆکو شارەوانی مێردینی ئەحمەد تورکیرە سەپیا، بەهەمان تۆمەت ١٢ ساڵۍ سزاو زینانی سەرو گوڵتان کشاناکۍ و سەباحەت تونجەلێرە سەپیا. هەرپاسە بە تۆمەتۊو "ئەندامیەتی ڕێکوستەی" ٩ ساڵې و ٩ مانگ سزاو زینانی سەرو پەرلەمانتارەی وەڵینەو هەدەپەی ئایلا ئاکاتێرە سەپیا، بەهەمان تۆمەت ١٠ ساڵۍ سەرو ئەمینە ئاینایرە سەپیا، هەرپاسە ٩ ساڵې سزاو زینانی سەرو ئەندامەی وەڵینۊو ئەنجوومەنو هەدەپەی ئایشە ئاگیجۍ و ٩ ساڵۍ سزاو زینانی سەرو ئاینور ئاشانێرە سەپیا.
