ڕەژاک: "لە کەسایەتی شەهید (زیلان) و شەهیدانی مانگی حوزەیران دا، هەموو شەهیدانی ژن بە بیر دێنینەوە کە بە خوێنیان مانیفێستۆی ئازادی و بە ڕەنج و تێکۆشانیان، بناغەی ئایندەیەکی ڕۆشنیان بۆ ئێمەی ژن ئافراندووە".
کاتژمێر ٤:٤٥ خولەکی ئێوارەی دوێنێ هەینی لە بارەگای کەرکوکی ڕێکخراوی ژنانی ئازادی کوردستان(ڕەژاک) لە گەرەکی ڕەحیماوای شارەکە، بە ئامادەبووانی ژمارەیەکی بەرچاو لە خەڵکی شارەکە لە ژنان و گەنجان و تەواوی چین و توێژەکان، مەراسێمكی بیرهێناوە بۆ شەهید زیلان و تەواوی شەهیدانی مانگی حوزەیران بەرێوەچوو.
جێگای باسە، چالاکییەکە بە دەستپێشخەری ڕێکخراوی ژنانی ئازادی کوردستان(ڕەژاک) وە بە هاوکاری کۆمەڵەی گەنجانی وولاتپارێزی کوردستان و تەفگەری ئازادی ڕێکخرا.
سەرەتای مەراسێمەكە بە خۆلەكێك وەستان بۆ گیانی پاکی شەهیدانی رێگای ئازادی و دیموكراسی دەستی پێكرد و پاشان بەخێرهاتنی بەشداربووانی مەراسێمەكە کرا بۆ بەشداری کردنیان لە مەڕاسیمی بەبیرهێنانەوەی هەموو شەهیدانی ژن لە کەسایەتی شەهید زیلان و تەواوی شەهیدانی مانگی حوزەیران دا.
جێگای باسە لە مەڕاسیمەکەدا پێشەنگایەکی تایبەت بە وێنەی شەهیدانی مانگی حوزەیران ئامادەکرابوو کە تیدا وێنەی شەهیدانی ژن نمایش کران.
پاشان بەیاننامەی ڕێکخراوی ژنانی ئازادی کوردستان(ڕەژاک) بۆ ئامادەبووانی مەراسیمەکە خوێندرایەوە کە تیدا هاتبوو:-
" لاپەڕەکانی مێژووی خەبات و تێکۆشانی گەلەکەمان لە پێناو ئازادی و و بەدەستهێنانەوەی مافە ڕەواکانمان، پڕە لە داستانی نەبەردی و قارەمانی، کە ئاوێنەی تایبەتمەندی کەسێتی تاکی کوردن.
هەموو ئەو داستان و نەبەردیانەش بە ڕۆڵی قارەمانێتی کچان و کوڕانی گەلەکەمان تۆمارکراون، بێ گومان ژنانی کورد لەم ڕۆڵانەدا نەک تەنیا بێ بەش نین، بەڵکو لە بەشێکیاندا خاوەن ڕۆڵی سەرەکی بوونە و پێشەنگایەتی تێکۆشانیان کردووە، بەمەش جیاوازی ڕەگەزییان لە بەشداری خەباتدا کاڵ کردۆتەوە.
ئەگەر مانگی حوزەیران/جۆزەردان بە نموونە وەربگرین، ئەوا چەندین نموونەی باڵای ژنی پێشەنگ دێنە پێشەوە، وەک ( زەینەب کناجی ) بە ناسناو ( زیلان )، کە ٢٧ ساڵ پێش ئێستا لە چالاکییەکی کەم وێنەدا گیانی بەخت کرد، بەم چالاکییە، شەهید ( زیلان ) ویستی وەڵامی فاشیزمی تورکیا بداتەوە، کە سیاسەتەکەی بەهەموو پێوەرێک سیاسەتێکی ستەمکارانەی قڕکردن و تواندنەوەی گەلی کوردبوو لەو قۆناغەدا کە هاوشێوەی زۆرێک لە قۆناغە مێژووییەکانی تربوو، پرسی کورد لەهەموو ڕوویەکەوە ( زمان، کلتور، هونەر، ناسنامە و هەبوون ) ڕوو بە ڕووی قەەغە و تواندنەوە بووبوویەوە، لەهەمووشی بەکاریگەرتر لەسەر دەروونی تاکی کورد و مەترسیدارتر لەسەر هەبوونی کورد نکوڵی کردنی بوو وەک نەتەوە و گەلێکی خاوەن جوگرافیا، وێڕای هەموو ئەمانەش هەوڵی تیرۆرکردنی ڕێبەری کوردان ڕێزدار ( عەبدوڵا ئۆجەلان ) لەو ساڵەدا ( ١٩٩٦)لە شام ، خواستی شەهید ( زیلان )ی بۆ ئەنجامدانی ئەم چالاکییە گیانفیداییە ڕژدتر و ئەوی بە بڕیارتر کرد، دوای نووسینی نامەیەک و جێهێشتنی بۆ دوای خۆی، کە تیایدا هۆکاری ئەنجامدان و ئامانجی چالاکییەکەی تیادا خستۆتەڕوو، بڕیار دەدات کە بەم چالاکییە گورزێکی گیانی زۆر و بەکاریگەر لە دوژمن بدات، هەر بۆیە کاتی کۆبوونەوەیەکی سەربازی لە مەیدانێکی سەربازیدا هەڵدەبژێرێت و بە گیان و جەستەی قەرزە نیشتیمانییەکەی ئەداتەوە، بۆ هەمیشە دەبێتە نموونەی فیداکاری و سەر دانەنەواندن، نموونەی ژنی بوێر و بەئیرادە بۆ هەر کەسێک، کە داگیرکاری خاکەکەی و هێڵی خیانەتی پێ قەبوڵ نییە.
لە مێژووی بزووتنەوەی ڕزگاریمان زۆرن هاوشێوەکانی زیلان، کە بە چالاکی هاوشێوە و هەمان ئەو هۆکارانەی باسکران، ناویان بە نەمری لە مێژوودا تۆمارکراوە، وەک ( سەما یوجە، ڕەهشان دەمیڕەل، زەکییە ئالکان، ئاڤێستا خابوور، ئارین میرکان، ڤیان سۆران و دەیانی تر).
هەر لەم مانگەشدا کە مانگی حوزەیرانە چەندین ژنی تر کە لەسەر هێڵی تێکۆشان تا دواین ساتەکانی ژیانیان تێکۆشاون، بە پلەی شەهادەت گەیشتوون لەوانە ( بەرفین ڕێباز، ڕاپەڕین ئامەد، دەلال شۆڕش، بێریڤان زیلان و.....هتد) بوونە سیمبۆل و ئاوێنەی ڕاستینەی پێشەنگایەتی ژن لە مەودای خەبات و تێکۆشان و هەڵبژاردنی ژیانێکی شەڕەفمەندانە، لەسەر بنەمای فکر و فەلسەفەی ئازادی و خۆبوونی ژندا، کە بونیادنەرەکەی ڕێبەر ئۆجەلانە، پێویستە ژنی کۆمەڵگە ژێردەستەکان، بەتایبەتیش ژنی کورد، ڕێبازی خەبات و شێوازی ژیانکردنی ئەوان بە بنەما وەربگرێت، لە بەرامبەر هەموو جۆرە ستەم و نادادییەک، پەرە بە خەباتی کۆمەڵایەتی، نەتەوایەتی و نەهێشتنی جیاکاری ڕەگەزی بدات.
لە ڕۆژی ئەمڕۆشدا ژنانی کورد لەهەر چوارپارچەی کوردستان و دنیای دەرەوەشدا، چاوکراوانە بۆ چەسپاندنی ماف و ئازادییەکانیان لەسەر پێ و مەیدانەکانن، هەروەها بۆ تێکشکاندنی هەوڵە داگیرکارییەکان کە بەردەوامن لەسەر کوردستان، هاوشانی پیاوان بەشدارن لە ڕیزەکانی خەباتدا، بەمەش سەرنجی دنیای دەرەوەیان بۆخۆیان ڕاکێشاوە و جیهانیان بەخۆیان سەرسامکردووە، نموونەی ئەم ڕاستتیەش بەشداری شەڕڤانانی ژنە لە ڕۆژئاوای کوردستان دژبە هەموو هێزە تاریک پەرستەکان.
هەر پەیوەست بە ڕۆڵی ژنان لە تێکۆشاندا، نموونەیەکی زیندووی وەک شۆڕشی (ژینا ئەمینی ) یاخود ( ژن ژیان ئازادی ) مان هەیە لە ئێران و ڕۆژهەڵاتی کوردستان، ئێمە لێرەدا هەموو ژنان بانگهێشتی هەڵمەتی پاڵپشتی و پشتگیری لەم شۆڕشە دەکەین، داوا دەکەین بە ڕۆحێکی بەرپرسیارانە خاوەنداری لە نرخ و بەهاکانی ئەم شۆڕشە بکەن، کە لە دژی بن پێ کردن و خواردنی هەموومافێکی ژنان بەرپا بووە، جا لەژێر هەر ناو و پاساوێکدا بێت.
لە کۆتاییدا لە کەسایەتی شەهید ( زیلان ) و شەهیدانی مانگی حوزەیران/جۆزەردان دا، هەموو شەهیدانی ژن، کە بە خوێنیان مانیفێستۆی ئازادی و بە ڕەنج و تێکۆشانیان، بناغەی ئایندەیەکی ڕۆشنیان بۆ ژیان لە وڵاتێکی ئازاد و ژیانێکی بەهادار بۆ ئێمەی ژن ئافراندووە، بە ڕێزداری بە بیر دێنینەوە.
جارێکی تریش ژنان بانگهێشتی هەڵمەتی بەشداری و پشتگیری لە شۆڕشی ( ژن ، ژیان، ئازادی ) دەکەین، و هیواخوازین بە ڕۆحێکی بەرپرسیارانە و خاوەنداری کردن لەم شۆڕشە، کە شۆڕشی خۆڕسکی ژنە، بەدەم بانگهێشتکردن و داواکارییەکەمانەوە بێن".
پاش خوێندنەوەی بەیاننامەکەی ڕێکخراوی ژنانی ئازادی کوردستان(ڕەژاک) سینەفزیونێك لەسەر ژیاننامە و خەباتی شەهیدانی ژن بەتایبەتی شەهیدانی مانگی حوزەیران بۆ ئامادەبووانی مەڕاسیمەکە نمایش کرا.
پاش تەواوبوونی سینەفزیۆنەکە لەسەر ژیاننامەی شەهیدانی مانگی حوزەیران، دروشمەکانی(شەهید نامرن، ژن ژیان ئازادی، بژی ڕێبەر ئاپۆ) لەلایەن ئامادەبووانەوە ووترایەوە و بەم شیوەیە کۆتایی بە مەراسیمی بەبیرهێنانەوەکە هات.
هـ . ب
