دوای ١٠ ساڵ ئاوارەیی ئیتر گەلی شەنگال پۆل پۆل دەگەڕێنەوە بۆ سەر ماڵ و حاڵ و زێدی خۆیان. لەگەڵ نزیکبوونەوەی دەیەمین ساڵیادی فەرمانی ٢٠١٤ کۆمەڵگەی ئێزدی دەیەوێت دۆسیەی ئاوارەیی و کۆچبەری بە تەواوەتی دابخات و بگەڕێتەوە سەر ماڵ و حاڵی خۆی و سەرلەنوێ دەست بە ژیانی ئاسایی خۆی بکاتەوە.

لە ماوەی رابردوودا وەزارەتی کۆچ و کۆچبەرانی عێراق بڕیاریدابوو کە دەرگای سەرجەم کەمپەکانی ئاوارەکان دابخات و ئەو کۆچبەرانە بگەڕێنەوە بۆ زێدی خۆیان، بەڵام بە هۆی دەستوەردانی پەدەکە ئەو کاتەی دیاریکرابوو، درێژکرایەوە و بڕیاردرا تا ٣٠ تەمووز کەمپەکان بە تەواوەتی دابخرێن.

ئەو ١٣٠ بنەماڵەیەی ئەمڕۆ گەڕانەوە، خەڵکی گوند و کۆمەڵگەکانی شەنگالن و لەوێ نیشتەجێ دەبنەوە و ئیدارەی خۆبەڕێوەبەریی شەنگالیش بە هەموو هێزی خۆیەوە لەپێناو دابینکردنی پێداویستیەکانیان کەوتووەتە ئامادەباشییەوە.

دوای ئەوەی پارێزگای سلێمانی لە ئاوارەکانی شەنگال چۆڵ کرا، ئاوارەکانی شەنگال لە دهۆکیش دەستیان بە گەڕانەوە کرد و تەنیا ئەمڕۆ ١٣٠ بنەماڵە گەڕانەوە و زیاتر لە ٦٠٠ بنەماڵەی دیکەش لەماوەی دوو رۆژی داهاتوودا دەگەڕێنەوە.

بە گوێرەی زانیارییەکان ئەگەر دەستوبرد بکرێت لە ئامادەکردنی دۆسیە و پەڕاوی گەڕانەوەی ئاوارەکان، بەر لە ساڵیادی فەرمان (٣ی ئاب) سەرجەم کەمپەکان چۆڵ دەبن، بەڵام پەدەکە لەمپەر و بەربەستی زۆر دروستدەکات بۆ ئەوەی بەشێکی بەرچاو لە ئاوارەکان لە ناو کەمپەکاندا بهێڵێتەوە.

هـ. ب