ناوه‌ندی ڕاگه‌یاندنی هێزه‌كانی سووریای دیموكراتیك (قه‌سه‌ده) ئاماری شه‌ڕی ١٥ ڕۆژی ڕابردووی هه‌ڵمه‌تی گه‌رده‌لوولی جزیری ڕاگه‌یاند كه له چوارچێوه‌ی «شه‌ڕی نه‌هێشتنی تێرۆر»دا له دێره‌زۆر به‌ڕێوه‌ده‌چێت.
ناوه‌ندی ڕاگه‌یاندنی قه‌سه‌ده ڕاگه‌یه‌نراوێكی بڵاوكرده‌وه و ئاشكرای كرد، له ماوه‌ی ١٥ ڕۆژی ڕابردوودا ٧٩ چه‌ته‌ی داعش كوژراون. قه‌سه‌ده ئاماژه‌ی بۆ ئه‌وه كردووه، داعش سوودی له ڕه‌شه‌با وه‌رگرتووه و به چه‌كی قورس هێرشی كردووه‌ته‌وه سه‌ر هێزه‌كانی قه‌سه‌ده، به‌ڵام شه‌ڕڤانان هێرشه‌كانیان تێكشكاندووه.
ده‌قی ڕاگه‌یه‌نراوه‌كه:
ڕێكخراوی تێرۆریستی له ماوه‌ی ١٥ ڕۆژی ڕابردوودا سوودی له ڕه‌شه‌با و تۆز وه‌رگرت كه له ناوچه‌كه هه‌ڵی كردووه، له‌ناكاو له هه‌موو لایه‌كه‌وه هێرشی كرده سه‌ر شه‌ڕڤانانی قه‌سه‌ده. تێرۆریستان له هێرشه‌كه‌یاندا چه‌كی جۆراوجۆری قورس و سووكیان به‌كارهێنا. هه‌روه‌ها ئۆتۆمبێلی بۆمبڕێژكراویان به‌كارهێنا و هێرشی خۆكوژییان ئه‌نجام دا. تێرۆریستان توانیبوویان چه‌ند خاڵێك به‌ده‌ستبێنن. له شارۆچكه‌ی سووسه شه‌رێكی سه‌خت ڕوویدا و چه‌ته‌كان ده‌ربازی چه‌ند گه‌ڕه‌كێكی شارۆچكه‌كه بوون و شه‌ڕ به‌شێوه‌یه‌كی دژوار درێژه‌ی كێشا. تێرۆریستان نه‌یانتوانی باڵاده‌ستی خۆیان به‌سه‌ر شارۆچكه‌كه‌دا بسه‌پێنن. سه‌ره‌ڕای سه‌ختبوونی شه‌ڕ، شه‌ڕڤانانی ئێمه تێرۆریستانیان ناچار كرد پاشه‌كشه بكه‌ن و زیانی گه‌وره‌شیان لێ دان.
له لای به‌ره‌ی باغۆز، ڕێكخراوی تێرۆریستی له ٣ قۆڵه‌وه به‌یانیی ئه‌مڕۆ هێرشیان كرد و شه‌ڕێكی سه‌خت تا نیوه‌ڕۆ له‌نێوان شه‌ڕڤانان و تێرۆریستاندا ڕوویدا. تێرۆریستان هه‌وڵیان دا ٤ ئۆتۆمبێلی بۆمبڕێژكراو له‌نێو شه‌ڕڤاناندا بته‌قێننه‌وه، به‌ڵام شه‌ڕڤانان ڕێوشوێنی خۆیان به‌باشی گرته‌به‌ر و به‌ر له‌وه‌ی ئۆتۆمبێله‌كان بگه‌نه ئامانجی خۆیان، ته‌قێنرانه‌وه. له شه‌ڕدا زیاتر له ٣٦ تێرۆریست كوژران و ته‌رمه‌كانیشیان له مه‌یدانی شه‌ڕدا ماونه‌ته‌وه.
له لایه‌كی دیكه‌وه، شه‌ڕڤانانی ئێمه ٢ ئۆتۆمبێلی دۆشكه‌له‌سه‌ر و ٢ ئۆتۆمبێلی هه‌مه‌ر كه چه‌كی ئاڕ بی جی-یان له‌سه‌ر بوو، ته‌قانده‌وه. له‌م شه‌ڕه‌دا ٤٣ تێرۆریست كوژران و ته‌رمی ٢٠ تێرۆریستیش كه‌وتنه ده‌ستی شه‌ڕڤانان.
به‌یانیی ئه‌مڕۆ، ڕێكخراوی تێرۆریستی داعش ویستی به ئۆتۆمبێلێكی بۆمبڕێژكراو تۆڵه‌ی خۆی بكاته‌وه و هه‌وڵی دا هێڵه‌كانی پێشه‌وه‌ی شه‌ڕڤانان بشكێنێت. شه‌ڕڤانان ئۆتۆمبێله‌كه‌یان ته‌قانده‌وه به‌ر له‌وه‌ی بگاته ئامانج.
گرووپێكی دیكه‌ی تێرۆریستان ویستیان شه‌ڕڤانان گه‌مارۆ بده‌ن، به‌ڵام به‌ئاگایی شه‌ڕڤانان هێرشی تێرۆریستانی تێكشكاند. شه‌ڕێكی سه‌خت ڕوویدا و چه‌ندین تێرۆریست كوژران، ئه‌وانی دیكه‌ش ناچار بوون هه‌ڵبێن.
ئامار
- ژماره‌ی كوژراوه‌كانی تێرۆریستان: ٧٩ تێرۆریست
- ژماره‌ی هێرشه ئاسمانییه‌كانی هاوپه‌یمانه‌تیی نێونه‌ته‌وه‌یی: ١٨ هێرشی ئاسمانی
- ژماره‌ی ئه‌و مووشه‌كانه‌ی له دژی بنكه‌كانی تێرۆریستان هاویشتران: ٨ مووشه‌ك
- زیانه‌كانی تێرۆریستان: ٥ ئۆتۆمبێلی بۆمبڕێژكراو، ٢ ئۆتۆمبێلی هه‌مه‌ر و ٣ ئۆتۆمبێلی دۆشكه‌له‌سه‌ر ته‌قێنرانه‌وه. ١٨ خانوو ڕووخێنران كه تێرۆریستان خۆیان تیایاندا ده‌پاراست.
- ژماره‌ی شه‌ڕڤانه شه‌هیده‌كانی ئێمه: ٢١ شه‌هید، چه‌ند شه‌ڕڤانێكی دیكه‌ش بریندار بوون.
s.m
