ڕابەرو گەلوو کوردی عەبدوڵا ئۆجالان ماوەو ٢٦ ساڵان بە پیلانگێڵنیێوە مېیاننەتەوەیی گیریان و ئینا گێرتەخانەو دورگەو ئیمراڵینە. ماوەو ٤٣ مانگان وزییان چېرو گۆشەگیریێوە سەختی و گرڎ عیلاقێوەش چنی جبەری پڕچیان.

جە ١٠و ئارگا (ئۆکتۆبەر)ی و ٢٠٢٣ێوە هەڵمەتەی مېیاننەتەوەیی 'ئازادی پەی عەبدوڵا ئۆجالانی، چارەسەری سیاسی پەی پەرسوو کوردی' پەی ئازادی جەسەیی ئاڎیی دەسشپنەکریان. چا بارۆ ئەندامو ئەنجومەنو کۆنسەو ئەوروپای و سیناتۆر جە پارتو شین فینی، پاوڵ گاڤان جە ساڵوەگەڕو یووەم و هەڵمەتەو ئازادینە پەی ئاژانسیما قسێش کەردۍ و دواکاری ۋێش و پارتەکەیش یاڎ ئاوردۆ و واتش: "داواو من و پارتەکەیم فرە ڕۆشنا. مشۆم حکومەتو تورکیای، عەبدوڵا ئۆجالانی ئازاڎ بکەرۆ."

سیناتۆر پاوڵ گاڤان سەرەنجش وست سەرو گۆشەگیری سەختو سەرو ڕابەروو گەلوو کوردی عەبدوڵا ئۆجالانی و جە بەردەوامینە واتش: "هەرجارێ ئەنجومەنو پەرلەمانینە بەشدار بوو، موینوو کوردەکۍ پەی ئازادی عەبدوڵا ئۆجالانی جە هەڵوێس هۆرگێرتەی و داواو ئازادی ئاڎیی مکەرا، گرڎ یاوێنمێنە چانەی کە ستەم و ئەشکەنجێوە فرە جە ئیمراڵینە ملۆڕاوە. پۊکەی مزانمۍ عەبدوڵا ئۆجالان پەی مسۆگەرکەردەی ئاشتی و دادپەروەری گەلا کورڎەسانی پێگێوە گرنگش هەن."

'ئازادی عەبدوڵا ئۆجالانی، داواکاری ئاشکرامانە'

جە دمادماینە سیناتۆر پاوڵ گاڤان باسش جە گرنگی پێگەو ڕابەرو گەلوو کوردی عەبدوڵا ئۆجالانی پەی ئاشتی و سەقامگیری کەرد و پی جۆرە دمایش بە قسەکاش ئاورد: "داواو من و پارتەکەیچم ڕۆشنا، مشۆم حکومەتو تورکیای عەبدوڵا ئۆجالانی ئازاڎ بکەرۆ. پەنەوازا ڕاش پنە بڎۆ سەرمەشقایەتی جە ئاشتی و دادپەروەری بکەرۆ. مشۆم بانگەوازو ئازادی ئاڎیی جە جەهانەنە دەنگبڎۆوە."