كانتۆنی گرێسپی: له دژی هێرشه‌كانی توركیا ده‌وه‌ستینه‌وه
ئه‌نجومه‌نی به‌ڕێوه‌به‌ری كانتۆنی گرێسپی لێدوانێكی ڕۆژنامه‌وانی دا و ڕایگه‌یاند، له به‌رانبه‌ر هێرشه‌كانی توركیا بێده‌نگ نابن.
ئه‌نجومه‌نی به‌ڕێوه‌به‌ری كانتۆنی گرێسپی به ئاماده‌بوونی ئه‌ندامانی ڕێكخراوه‌كانی كۆمه‌ڵگه‌ی سیڤیل و كه‌سایه‌تیی عه‌شیره‌ته‌كانی عه‌ره‌ب دژی هێرشی سوپای توركیای داگیركه‌ر بۆ سه‌ر كانتۆنی گرێسپی لێدوانێكی ڕۆژنامه‌وانی دا.
«ئێمه بێده‌نگ نابین»
هێڤین ئیسماعیل هاوسه‌رۆكی ئه‌نجومه‌نه‌كه لێدوانه‌كه‌ی دا و هێرشه‌كانی ده‌وڵه‌تی توركی بۆ سه‌ر ناوچه ئارامه‌كانی باكووری سووریا ئیدانه كرد و گوتی: «له ماوه‌ی چه‌ند ڕۆژی ڕابردوودا چه‌ندین هێرش له ڕێی مووشه‌ك و گوله‌بارانكردنه‌وه دژی چه‌ندین ناوچه‌ی باكووری سووریا كراون. له ئه‌نجامدا شه‌ڕڤانێك شه‌هید بووه و یه‌كێكی دیكه‌ش بریندار بووه.»
«ئێمه وه‌ك به‌ڕێوه‌به‌رایه‌تیی كانتۆنی گرێسپی به‌ڵێن ده‌ده‌ین كه ئه‌م هێرشه بێ وه‌ڵام نه‌مێنێته‌وه. ئاماده‌ین گه‌ل و ده‌ستكه‌وته‌كانمان بپارێزین كه له سایه‌ی خوێنی شه‌هیدان به‌ده‌ستمان هێناون.»
ئه‌نجومه‌نی به‌ڕێوه‌به‌ری كانتۆنی گرێسپی داوای له كۆمه‌ڵگه‌ی نێوده‌وڵه‌تی و ڕێكخراوه مرۆییه‌كان كرد له به‌رانبه‌ر ئه‌م هێرشانه بێده‌نگ نه‌بن و هه‌وڵه‌كانیان بخه‌نه‌گه‌ڕ بۆ وه‌ستاندنی هێرشه‌كان.
لێدوانه‌كه به درووشمه‌كانی به‌رخۆدان و سڵاوكردن له به‌رخۆدانی ڕێبه‌ری گه‌لی كورد عه‌بدوڵا ئۆجالان كۆتایی هات.
s.m
