ئەفیخای ئەدرەعی، وتەبێژی سوپای ئیسرائیل لەسەر هەژماری ئێکسی خۆی ڕاگەیاندراوێکی بڵاوکردەوە و ئاشکرای کرد بارەگای گشتی سوپای حکومەتی کاتی سووریایان لە دیمەشق بوردوومان کردووە.

وتەبێژەکەی ئیسرائیل ئاماژەی بەوەشکرد، ئیسرائیل بەوردی چاودێری جموجوڵەکان دژی هاووڵاتیانی دروزی لە سووریا دەکات و لە بەرامبەر هەر جۆرە سیناریۆیەکدا ئامادەکاری دەکات.

هاوکات وەزیری بەرگری ئیسرائیل بەیانی ئەمڕۆ هۆشداری دابوو کە ئەگەر هێزەکانی دیمەشق لە شاری سوەیدا نەکشێنەوە، هێرشەکانی ئیسرائیل زیاتر دەبن و بۆ پاراستنی کەمینەی دروزییەکان هەنگاو دەنێت.

ئەمەش لە کاتێکدایە، ئیسرائیل بڕیاریداوە هێزەکانی لەسەر سنووری سوریا زیاد دەکات.