وەزارەتی تەندروستی عێراق ئاماژەی بەوەکرد، لە ٢٤ کاتژمێردا، ٦٥ حاڵەتی نوێ تۆمارکراوە، هەروەها چوار کەس گیانیانلەدەستداوە و ١٨ نەخۆشیش چاکبوونەتەوە.

بەوەش ٦٩٤ حاڵەتی تووشبوون بە ڤایرۆسی کۆرۆنا لە عێراق تۆمارکراون و ٥٠ کەس گیانیان لەدەستداوە و ١٧٠ کەسیش چاکبوونەتەوە.

لە لایەکی ترەوە وەزارەتی تەندروستی حکومەتی هەرێمی کوردستان هەشت حاڵەتی نوێی تووشبوون بە کۆرۆنای ڕاگەیاند.

بەپێی ڕاگەیەندراوەکەی وەزارەتی تەندروستی، "پێنج لە تووشبووان لە شاری سلێمانی (چوار ئافرەت و یەک پیاو) کە چوار لەوان بەرکەوتەی تووشبووانی پێشوون و یەک لەوان حالەتی نوێیە، سێ لە تووشبووان دانیشتووی سلێمانی و دوو لە تووشبووان دانیشتووی دەربەندیخانن".

دەربارەی سێ حاڵەتەکەی دیکە تەندروستی ڕونیکردووەتەوە:"سێ لە تووشبووان لە شاری دهۆک (دوو پیاو و یەک ئافرەت) کە دوو لەوان دانیشتووی قەزای زاخۆ و یەک لەوان دانیشتووی قەزای ئامێدی یە".

بەپێی ئەم ئامارە، کۆی تووشبووانی کۆرۆنا لە هەرێمی کوردستان گەیشتە ١٧٠ کەس، لە نێویاندا ٦١ نەخۆش چاکبوونەتەوە و دووانیش گیانیانلەدەستداوە.

ف.ق