دادگا بە بانگەشەو "پروپاگەنڎەی پەی رێکوزیای" ٣ ساڵۍ سزاش پەی ئوفوق دەمیری بڕیوە، بەڵام سزاکێش پېسە ساڵێوە و ٢٤ مانگا ئەرەیاۋنا. وەڵتەر بەهەمان تۆمەت زینڎانەنە بیەن، پەی ئانەی سزاکۍ هۊرنەسپارۆ، پی جۆرە ئەرەیاۋییان.
یووەمین دادگاو سزا قورسەکا ئیدری جە دۆسیێوەنە کە بە بانگەشەو ئانەی کە "پڕوپاگەنڎەش پەی رێکوزیای کەردەن" سزاو ٣ ساڵا زینڎانیش سەروو سیاسەتمەداروو کوردی ئوفوق دەمیریرە سەپنا و ئا سزۍ پېسە ساڵێوە و ٢٤ مانگا ئەرەیاۋییا.
دەمیر باسش چانەی کەرد، کە وەڵتەر بە هەمان تۆمەت جە زینڎانەکا بارتینی و پاتنۆسینە مەنەبێوە، بەڵام ئا سزۍ ئەشیۍ هۊرگیریۍ سەرجەنۆ، بە سزاو زینڎانی دریاوە.
دادگا ساڵەکێش بە مانگ حسێب کەردەن و پی جۆرە کارێوەش کەردەن کە دەمیر ماوەو سزاکێش جە زینڎانەنە سەربەرۆ.
جە هەمان دۆسیەنە ٢ جارۍ سزا دریاوە
یوفوق دەمیر کاروەدایش ۋەرا ۋەر بە هەڵوێسوو دادگای نیشانەدا و واتش، 'من ساڵەو ٢٠١٨ ی بەمەڵامەتوو ئی دۆسیەیۆ زینڎانی کریانا. من جە زینڎانەکا پاتنۆسی و بارتینی زینڎانی بیەنا. دماتەر یاساو ئەرەیاۋنای بەرشی و من چا یاسۍ ئیسفاڎەم کەرد. جە دۆسیێوەتەرەنە سزا دریانی. دماو شش ساڵا جارێوەتەر ئا دۆسیەشا وستۆ ۋەروودەمیم. پەی ئانەی سزاکێشا بە مەڵامەتوو سزا وەڵینەکێوە هۊرنەگیریۆ، ساڵەشا سەروو مانگێرە بەش کەردەن. چنڎین ساڵێن سەردای دادگاکا مکەروو، ئەوەڵجارا مامەڵە و کارێوە پی جۆرەی بوینوو".
