فه‌ڕه‌نسییه‌كان داوا له سی پی تی ده‌كه‌ن له‌پێناو هه‌ڵگرتنی گۆشه‌گیریی سه‌ر ئۆجالان هه‌وڵ بدات
پشتیوانییه‌كان بۆ مانگرتوان كه له دژی گۆشه‌گیریی سه‌ر عه‌بدوڵا ئۆجالان مانیان له خواردن گرتووه، ڕۆژ به ڕۆژ زیاتر ده‌بن.
ژماره‌یه‌كی زۆری هاوڵاتییانی فه‌ڕه‌نسا بۆ پشتیوانی له مانگرتوانی شاری ستراسبۆرگ به‌دیمه‌ن په‌یامی خۆیان له‌سه‌ر تۆڕه كۆمه‌ڵایه‌تییه‌كان بڵاوكرده‌وه و پشتیوانییان له چالاكانی مانگرتنه‌كه كرد. هه‌روه‌ها داوایان له كۆمیته‌ی به‌رگرتن له ئه‌شكه‌نجه (CPT) كرد ئه‌ركی خۆی جێبه‌جێ بكات.
Appel au @CoE_CPT et @CoE_fr pour la députée kurde @LeylaGuvenkcd qui est en grève de la faim depuis 69 jours pour rompre le régime d’isolement imposé au leader kurde, Abdullah Ocalan. pic.twitter.com/MGZ7JhwNNq
— Agit Polat (@agit_polat2) January 15, 2019
ئه‌م پشتیوانییانه دوای ئه‌وه په‌ره‌یان سه‌ند كه بزووتنه‌وه‌ی كۆمه‌ڵگه‌ی دیموكراتیی كورد له فه‌ڕه‌نسا كه‌مپینێكی ده‌ستپێكرد بۆ ڕاكێشانی سه‌رنجی ڕای گشتی بۆ سه‌ر گۆشه‌گیری. له په‌یامه‌كانیاندا فه‌ڕه‌نسییه‌كان ئاماژه بۆ ئه‌وه ده‌كه‌ن، گۆشه‌گیركردنی زیندانییه‌ك، تاوانی دژ به مرۆڤایه‌تییه. توركیا تاوانی دژ به مرۆڤایه‌تی ده‌كات.
ئه‌و كه‌سانه‌ی په‌یامه‌كانیان بڵاوكردووه‌ته‌وه ده‌ڵێن:
- گۆشه‌گیركردنی زیندانییه‌ك به‌شێوه‌یه‌كی هه‌میشه‌یی، ئه‌شكه‌نجه‌یه.
- گۆشه‌گیری نیشانه‌ی فاشیزم و زوڵمی ده‌وڵه‌ته.
- ڕژێمی توركی فاشیست زیندانییان گۆشه‌گیر ده‌كات.
- زیندانییانی سیاسی له مانگرتن له خواردندان.
- ڕێبه‌ری گه‌لی كورد عه‌بدوڵا ئۆجالان ٨ ساڵه گۆشه‌گیر كراوه. ٣ ساڵه هه‌واڵی نازانرێت.
- پێویسته كۆمیته‌ی به‌رگرتن له ئه‌شكه‌نجه (CPT)ی سه‌ر به كۆنسه‌ی ئه‌ورووپا هه‌وڵه‌كانی بخاته‌گه‌ڕ.
- سی پی تی كاری خۆت بكه، ڕێگری له ئه‌شكه‌نجه بكه و لای ئه‌شكه‌نجه‌كاران مه‌گره.
- سی پی تی ئه‌ركی خۆت جێبه‌جێ بكه، فاشیزم تێكبشكێنه، مرۆڤایه‌تی بژیه‌نه.
s.m
