١٨ەمین کۆنفرانسی میان نەتەوەیی بەنامۍ "یۊبیەی ئەوروپای، تورکیا، ۋەرکەوتوو دلېڕاسەی و کورد"ی ملۆڕاوە. کۆنفرانسەکە جە ڕووان و ٦ و ٧و کانوونوو یوۋەم و ئېساڵی ملۊڕاوە.

بەشێوە فرە جە پەرلەمانتارا، سیاسەتمەدارا، ئەکادیمیستا، پارێزنەراو مافوو مرۆڤی، پارێزنەرا و ڕۆنامەنویسا بەشداری کۆنفرانسەکەی کەرا.

وتارەکۍ کۆنفرانسەکەی بە فرەو زۋانا دنیۍ هۊرگېڵنایشا پۍ کریۆ، یۆ چا زۋانایچە زۋانی کوردین. ئەرەنیشتەکاو ڕۊی یوۋەمی جە ٦و کانوونوو یوۋەمی جە بەینوو سەعات ١٦:٠٠ پۍ ٢٠:٠٠ ی ملاڕاوە.

سەرۆکوو کۆمیسیۆنوو هاموڵاتیا تورکیای جە نەرویج و ئەکادیمیست جە زانشتگەو بەرگەنی، کاریان وێسترهایم، یاگەگیروو سەرۆکوو پەرلەمانوو ئەوروپای جە گروپوو چەپی، دیمیتریۆس پاپادیمۆلیس، ئەنداموو پەرلەمانوو ئەوروپای جە نەمسا، ئەندریاس شیدەر، جە یۊبیەی وەڵېکۊتوازا دیموکراتی و سۆسیالیستەکا، جە سەرەتاو کۆنفرانسەکەینە وتارە پێشکەش کەرا.

مژارۍ کۆنفرانسەکەی ئینېنۍ؛ دمایین هۊرچنیەو گرڎی تورکیای و ڕووەدایەکا دماو هۊرچنیەی، ئاژەو ئۆپۆزسیۆنی، پەیوەندییەکاو بەینوو تورکیای و یۊبیەی ئەورووپای، نزیکبیەیۊ یۊبیەی ئەورووپای جە پرسوو کوردی، پەیماننامەو لۆزانی جە ١٠٠ ساڵەو ۋېشەنە، گۆشەگیری ئیمراڵی، قەیرانەو ناتۆی - سوید، پرسوو ژەنا، چارەسەروو کێشەو ئیکۆلۆژی و کوردا وزیانە ۋەروو باسی.