ئا رۆج دووە شەممە، جە بەردەوامی تراژیدیاو کۆڵبەرانە، ژمارێو کۆڵبەرێ کە کەلوپەشان جە سنورە کویسانیەکێ میانو پارێزگاکێ ئورمییەو وەراسانو کوردستانی و جۆلەمێرگ-و  سەرنیشت (باکور)و کوردستانیەنە،فاڕانەوە، تووشێ ڤییەری سروشتی بیێنێ و لانیکەم 5شان گیانشان جەدەستدان.
جەی ئی بارەوە کۆمەڵەو مافو مرۆڤی کوردستان وێنێ و نامێ هەر 5 قوربانیەکەی و زانیاریش سەبارەت بە ڤییەرەکەی وەڵاو کەردەنەوە و ئاشکراش کەردەن: "ژمارێو کۆڵبەرێ ورەراسانو کوردستانی کە جە سنورەکێ باکور و ڕۆژهەڵاتو کوردستانیەنە سەرقاڵێ کۆڵبەری بیێنێ، تووشێ هەرەسەو ڤەرڤێ بیێنێ و جە ئاکامشەنە لانی کەم 5شان گیانشان جەدەستدان کە نامەکێشان بەئی جۆرەنێ؛ (مەتین عوسمان ئەسلانی، یاوەر لوقمان ئەسلانی، بیلین سادق ئەحمەدی، ئەولایی حاتەم خودایی و فورات خورشید خودایی) کە سەرجەمشان ئەرنیشتێ دەگاو کورانی سەر بە ناوچەو سۆمای برادۆست-یەنێ".

کۆمەڵەکە ئاشکراش کەردەن: "هاوڵاتیێ باکورو کودستانی لوێنێ بەهاناو کۆڵبەرەکاوە و تەرمێ 5 قوربانیەکەیشان بەرئاوردێنێوە و دماتەر چەکدارەکێ ڕژێمو تورکیا شیێنێ ناوچەکەنە و تەرمەکێشان چەنی وێشان بەردێنێ".

سەبارەت بە کۆڵبەرەکێ تەرێ کۆمەڵەکە دەستنیشانش کەردەن: "ئیسە چەندین کۆڵبەرێ تەرێ چارەنویسشان نادیارەن و نەزانیان چێششان سەر ئاومان و گێڵای شۆنیشارە بەردەوانە".