جە لەندەن، مانچستەر و لیستستیرو شارەکا بەریتانیای و ئیدنبورغی پایتەختو سکۊچیای، دمایی بە ھورچنیەکا ١٤و ئایارو تورکیای و سەرنیشتوو کورڎسانی ئاما.

بەپاو دەزگا و کۊردیناسیۊنو ھورچنیەو پارتو چەپی سەوزی جە بەریتانیا، جە ھورچنیەکا ۋەڵتەری زیاتەر خەڵک بەشڎاریش کەرڎەن. رێژەو بەشڎاریکەرڎەی ٥٠٪ بیەن، جە وەختېنە کە رێژەو بەشڎاریکەرڎەی جە ساڵەو ٢٠١٨ینە ٤٨٪ بیەن.

چنی گرڎو حۊڵەکا دەسەڵاتی فاشیستی ئاکەپەی، چەمەڕا کریۊ رێژەو دەنگو پارتو چەپی سەوزی جە بەریتانیانە نېرە وارو رێژەو ٥٠٪ی.

رەنجەکە بە زایە مەلۊ

ئیبراهیم ئاڤجی نوێنەرو گیک – دەری بەنامۍ کۊردیناسیۊنو پارتو چەپی سەوزی جە بەریتانیا قسېش کەرڎە و ۋاتش، " سەرکۊتەی بە مەڵامەتو خەباتو هەڤاڵاشاوەن."

تورکان بوداک هامسەرۊکو ئەنجومەنو گەلوو کورڎی ئەرەیاۋناش،" هەڤاڵاما و بە تایبەتی ئەنڎاما جەمەکا هەرێمی، دەزگا شۊڕشگێڵ و چەپ و عەلەوییەکا و گەلەکەما رەنجێوە فرەشا کێشان. رەنجەکەشا بە زایە مەلۊ. قەناعەتم پاسەن کۊشیای دیموکراسی و ئازاڎیی سەرگنۊ. مبارەک بایی جە گرڎو هەڤاڵاما جە میدیای ئازاڎەنە کەرمۍ."

ھ . ش