"ڕاپیمای گەورەو ئازاڎیی" پەی ئازاڎیی جەستەیی ڕابەروو گەلوو کوردی عەبدوڵا ئۆجالانی و چارەسەروو پەرسەو کوردی، ٣ ڕۆێ بەردەواما. ڕاپیمەرێ قۆڵوو ڕاپیمای قەرسینە دمای کۆبییەیۆ مەنتێقەو بازیدوو ئاگرینە، یاوێ گیاڎین و بە چەپڵێ و جۆشوخرۆشۆ خێرامایشا کریا.  

پەرلەمانتارەو پارتوو یەکسانی و دیموکراسیی گەلا (دەم پارتی) سەباحەت ئەردۆگان ساریتاشە تیشکیش وستە سەروو  مدرامانی تاریخی و کۆشیای ئازاڎیی کوردی، ئەرەیاوناش نەبییەی یۆبییەی سەبەبوو نەیاواین بە ئامانجی و واتش: "ئەحمەدی خانی هەمیشە باسوو یۆبییەی کوردا کەرێ، زەروورا کوردەکێ یوێ با".

واوەی ساریتاشە تیشکەش وستە سەروو گۆشەگیریی ڕابەروو گەلوو کوردی عەبدوڵا ئۆجالانی و واتش: "گەلوو کوردی خاوەنداری جە پارادایموو یەکسانی کەرا و گەرەکشا نیا بێ سەرۆکی مەناوە. ئێمە پەی خاوەنداری وەنەو ئازاڎیی جەسەیی بەڕێز ئۆجالانی کەوتێنمێ ڕا. مەتاودێ بەڕێز ئۆجالانی یاڎوو گەلینە سڕدێوە. دژوو جەنگی تایبەتی قێزەونی ئێمە هەمیشە وەرگێری جە پارادایموو ئازاڎیی کەرمێ. شمە مەتاودێ دەنگوو بەڕێز ئۆجالانی کپ کەردێ، ئێمە سەرگنمێ".

ئەرەیاونایەکە بە بەرزکەردەیۆ درووشموو "بژیوۆ مدرامانوو ئیمراڵی" تەمامیا.

دمایی دوێ زارۆڵێ کرێکارێ محەمەد ئایدەمیر و ئۆرهان ئەرسەلان، کە ساڵەو ٢٠١٥ پۆلیسی کوشتێبێنێ وەردەموو وەردەموو ئا فڕنەینە دلێشنە کوشیی، یاڎێ کریێوە.