جە ناوچەو سلۆپو شرناخینە، هرووژمو پۆلیسی جە وەراوەرو پەرلەمانتارو دەم پارتی شەرناخی، نەورۆز یوساڵ ئاسڵان، هامسەرۆکو شارەوانی وانی نازلیهان شەدالە و جەماوەرو گەلی جە وانەنە، شەرمەزار کریا. چالاکییەکە بە سەرمەشقایەتی تەڤگەرو ژەنا ئازادی (تەژەئا) ئەنجام دریا و پارتو هەرێمە دیموکراتیکەکا ڕێکوزیاکا شار-ناوچەکا دەم پارتی، هەرپاسە ڕێکوزیاکا گلێرگەی مەدەنی و چنین کەسێ بەشدارێ بیێ.

بەسەدان کەسێ وەردەمو وانینگەو ئامادەی جمهوریەتی جە سلۆپینە گلێرێ بیێوە و بە ڕاپیمای بەرەو بیناو دەم پارتی ناوچەکەی لوێ. جە چالاکییەکەنە لافیتێ بە نوسیتەو "دژو تنوتیژی پیاسالاری سەرکۆتەی پەی ژەنی، ژیوای، ئازادییا" هورگیریا و دروشمو "نەورۆز یوساڵ بە تەنیا نییا" بەرزکریاوە.

بە نامێ ئەندامو تەژەئای ئۆزلەم فەندکە ئەرەیاونێوەش واناوە و ئاماژەش پانەیە کەرد کە هرووژم جە دژو نەورۆز یوساڵ هرووژما جە وەراوەرو شوناسو تەژەئای و ئەکیدش کەردۆ جە دژو پیای-دۆڵەتی بە فەلسەفەو ژەنی، ژیوای، ئازادی مڏرامانما فراوانتەر مکەرمێ.

ئۆزلەم فەندکە واتش: "وەرگری جە دەسکەوتەکاما، مافەکاما و ژیوایما مکەرمێ. ژەنەی ڕێکوزیێ سەرە گنۆنە، مڏرامانەکاما سەرێ گنانە".

ئەرەیاوناکەی بە چەپڵە و هەلهەلە دمایش ئاما.