ئارۊ پەنجشەممە، ناوەندو دیالۊگینە شاروو کەرکوکو پانیشتوو کورڎسانینە، ئەنجوومەنو کوردو کەرکوکی، کە ژمارێوە کەسایەتیۍ ڕۊشنویرۍ، چالاکۍ، نویسەرۍ و ئەدیبۍ، سەرۊکعەشیرەتۍ و سیاسەتمەدارۍ شارەکەی، کۊنگرێوە ڕۊنامەوانییشا ساز کەرد، کە دلێشنە داوێوەشا ئاڕاستەو کورڎسانییاو شارو کەرکووکی کەرڎە و هۊشدارییشا دا جە هەستیاری و گرنگیی ئی ورچنیەیە، کە ماوەو ٣ ڕوا تەرینە کریۊ و دلێشنە ئەنجوومەنەکە جەختشا کەرڎۊ جە گرنگیی بەشداریی کورڎا "پەی ڕاگێریکەرڎەی جە بەرڎەوامیی پڕۊسەو بەعەرەبکەرڎەی شارەکەی و پارێزنای کورڎسانیبییەی کەرکووکی".

 بەیاننامەو ئەنجومەنو کوردو کەرکوکی محەمەد سەید کەریم کەسایەتیی ڕۊشنویرو شارو کەرکووکی واناوە و کە دلێشنە ئامابێ: "بانگەوازێوە پەی کورڎسانییاو ئەرەنیشتاو کەرکووکی

گێڵایوە پەی تاریخوو ١٠٢ساڵەو عومرو ئەرەمەرزیاو ئەنجوومەنوو کەرکوکی سەڕەڕاو ئانەیە، کە عوسمانییەکۍ چند سەدێوە حوکمڕانیی ئی مەنتێقەیشا کەرڎەن، کاریگەرییشا بییەن سەروو فاڕیای دیموگرافیاو مەنتێقەکەی، بەرگنۊ، کە پێکئاماو کوردی دایمە  فرەتەرینوو ئەرەنیشتاو کەرکوکی بییەن".

 هەرپاسە بەیاننامەکەنە ئاماروو ئەنداماو ئەنجومەنو پارێزگاو کەرکوکی وەڵۍ ١٠٢ ساڵانە وزیا ڕووە، کە دلێشەنە ئامابێ: " یوەم ئیدارەو ئەنجومەنو کەرکوکی کە ژمارەشا ١٢ ئەندامۍ بییەن ڕێژەو ئەنداماو کوردی ٥٠٪ بییەن، بە جۊروە کە ١٠٢ ساڵ چێوەڵتەر ژمارەو ئەنداماو ئەنجومەنو کەرکوکی پێسنە بییەن، کورد شش ئەندامۍ، تورکمان یەرۍ ئەندامۍ، کریستیان یۊ، جوولەکە یۊ و عەرەبیچ یۊ.  

کەچی پێکئاماو ئیساتۍ نوێنەراو پێکئامایەکاو  کەرکوکی ئەنجومەنوو نوێنەراو عێراقینە و ئەنجومەنو پارێزگاو کەرکوکینە بەراورد پا وەختی فاڕیایۍ فرەش بە قازانجو عەرەبی ملەرە ئامان، سەبەبی سەرەکیی ئی فاڕیایچە پڕۊسەو بەعەرەبکەرڎەی و فاڕیای دیموگرافیاو کەرکوکین".

 هەرپاسە محەمەد سەید کەریم ئاشکراش کەرد: "ئی فاڕیایە بە زەرەروو زیانی پێکئامایەکای تەری مەڕیانۊ، بەداخۊ سەیەو عەقڵیەتی نەتەوەپەرسیی دەسەڵاتوو  پێکئاماو عەرەبی عێراقی بەنامە فیدڕاڵ و دیموکراتنە دماو ٢٠ ساڵا جە نەمەنەی دەسەڵاتو ڕژێمو بەعسینە هەڵای پڕۊسەو بەعەرەبکەرڎەی بەرڎەواما و ستەم وەنەو پێکئامایەکای تەری کریۊ".

درێژەو بەیاننامەکەینە ئامابێ: "پەی ڕاگێریکەرڎەی ب ڕای یاسایۍ چی پرۊسە نەگریسەیە بەشداریکەرڎەین جە پڕۊسەو دەنگدای بە ئەنجومەنو پارێزگاو کەرکووکی، ئەنجومەنێوە بە سوودورگێرتەی جە غەڵەتەکاو وەڵۍ، بە گیانی پەڕ جە چەنەویەرڎەییوە لاێوە ئاشتی، تەبایی، بڕایەتی، کولتووری ڕەسەنوو کەرکوکی پارێزیۊ و لاێوە تەرۊ هەرمانە خزمەتگوزارییەکۍ بەبۍ جیاوازی کریا".

 ئاخرو بەیاننامەکەنە ئەنجومەنو کوردو کەرکوکی بانگەوازێوەشا ئاڕاستەو کورڎاو شارەکەی کەرد و واتشا: "کورڎسانییاو کەرکووکی، تا وەڵۍ پا ستەمە فرەیە کە وەنەما کریۊ نەگێرا، وەڵۍ بە پرۊسەو فاڕیای دیموگرافیای شاری گیریۊ، جە خزمەتگوزاری بێبەشۍ نەبیمۍ، داواتا وەنە کەرمۍ گلەییەکاتا وزدۍ دلۍ دووۍ نانە گەرما و  بەشداریی پرۊسەو دەنگدای کەرڎۍ، لیستە کورڎسانییەکۍ کەسۍ بەتوانۍ و شیاێشا هەنۍ دوور جە دەمارگیریی حزبی و زیادەلوای نەتەوەیی ورشا چندێ".