بە دروشمۊو وەتەنی جە یاڎ نمەکەرمۍ ئارۊ مەردمو دەگا زەریفەکۍ گەچینەی جە ماواو ۋێشانە بە ئاماڎەبیەی ژمارێوە فرە جە کەسایەتیەکاو ئەرەنیشتا شارو هەڵەبجەی و خورماڵی و مەحاڵەکا تەرو هۊرامانی ڤیستیۋاڵو ڕۊدیارو دەگاو گەچینەیشا بەرد ڕاوە.
ئارۆ ڕۊو چوارشەممەی ڕێکەوتو ٩/٤/٢٠٢٥ کە ۋەرا ۋەرا بە یاڎو وڕای ڕژێمە فاشیستیەکەو سەدام حسێنی جە دەگاو گەچینەینە جە هۊرامانو لهۊنی بە دروشمۊو وەتەنی جە یاڎ نمەکەرمۍ ڕۊدیارو دەگاو گەچینەی لوواڕاوە.
جە ڤیستیۋاڵەکەنە ژمارێوە فرە جە مەردمو دەگاکۍ و ژمارێوە فرە جە مەردمو شارو هەڵەبجەی و خورماڵی و مەحاڵەکا تەرو هۊرامانی ئاماڎۍ بێنۍ.
سەرەتاو ڤیستیۋاڵەکەینە سەرپەرشتیارو مەراسیمەکەی ئیسماعیل موسا خێرئامای مێمانەکاش کەرڎو دماتەر چن سەرگوژشتێوە سەرو تاریخو دەگاو گەچینەی پېشکەش کریا.
هەر جە بەردەوامی ڤیستیۋاڵەکەینە هونەرمەڼ سەعدون گەچینەیی بە چن بەزمۍ سیاوچەمانۍ و گۊرانی خاوۍ سەڎاش ئاوێزانو سروشتە زەریفەکەو گەچینەی و قاسپەو ژەرەژا مەنتیقەکەی کەرڎ.
ڤیستیۋاڵەکە بە زەماۋنەو هۊرپڕای و کەیفو سەفاو گۊڕانیۍ هۊرامیێوە دمایش پنە ئاما.
