کۊمەڵەو گەنجە وەڵاتپارێزناو کورڎسانی و ژەنە گەنجە کۊشەرا، پەی بەرزئرمانای یاڎوو گەشمەرڎاو مانگەو گوڵانی، هیزی زنجیرێوە چالاکیێشا ڕێکۍ وستۍ، کە پێکئامێبێنۍ جە گەشت و سەرڎای چند یاگێوە پێسە (مۊنۊمێنتوو گەشمەرڎا کیمیاویوارانوو هەڵەبجەی و ئەمنە سوورەکە)و سلێمانیی، حەرپاسە پێشکەشکەرڎەی سیمینارێوە سەبارەت بە گرنگیی مانگەو گوڵانی و ئا قوربانی و مدرامانە گەورەو گەشمەرڎاو مانگەو گوڵانی کە پێشکەشوو گەلیشا کەرڎۍ.

جە چالاکییەکەینە زیاڎتەر لە ٥٠ ئەنداماو هەرێمەکاو کەرکووک، گەرمیان، سلێمانی، هەولێر و شارەزووری بەرشدارۍ بێنۍ، ئەوەڵوو چالاکییەکەی بە سەرڎای بیناو (ئەمنە سوورەکە)ی جە سلێمانی دەسش پەنە کەرڎ تا ئا ستەمەیە وینا، کە ڕژێموو بەعسی دژوو میللەتوو کوردی کەرڎەنش، دماو سەرڎای (ئەمنە سورەکە)ی گەشتەکە بەرڎەوام بۍ بەرەوە شاروو هەڵەبجەی شەهیدی، چایچ سەرڎای مۊنۊمێنتوو شەهیدای هەڵەبجەت و مۊزەخانەو گەشمەرڎاو هەڵەبجەی کریا، ئامانج چی گەشتا وینای ئا کۊکوشییەی بۍ، کە دوژمنۍ دژ بە گەلەکەیما کەرڎەنشا و تا ئیساتێچ کۊکوشی و کیمیاویوارانکەرڎەی گەلوو کوردی نەمرڎان.

دماتەر کەوتۍ ڕا پەی سەیرانگاو ئەحماوای چند دەگێوە مەنتێقەو شارەزووریشا سەرۍ کەرڎێوە و جە دەگاو (شیرەمەڕ)ێنە سیمیناریوە پێشکەش کریا، سیمینارەکە محەمەد دانا ئەنداموو ئەنجوومەنوو کۊمەڵەو گەنجە وەڵاتپارێزناو کورڎسانی پێشکەش کەرڎ و واتش: "چی مانگێنە کورڎسان فرەتەرین گەشمەرڎێش دێنۍ، ئێمەیچ ئامانجما بۍ ئی یاڎی بەرز برمانمۍ بەتاتیبەت چی مەنتێقەنە، کە فرەتەرین کوردۍ گەشمەرڎۍ بیێنۍ، ساڵەو ١٩٨٨ ڕژێمی فاشست و شۊڤێنی بەعسی، گەلوو کوردیش هەڵەبجەنە کیمیاویواران کەرڎ، پێسە ئارۊی کە دەوڵەتوو ئەرەگیروو تورکی مەنتێقەکاو زاپی و ئاڤاشینی و مەتیناینە گەریلاکاو ئازاڎیی کیمیاویواران کەرۊ. دیما جە عەفرین و سەرێکانینە دەوڵەتی ئەرەگیر چەکی قەدەغەکریا و چەکوو فسفۊڕییش بەکار ئارڎ، بە هەمان نۊعوو کۊکوشییەکاو پانیشتوو کورڎسانی، گلێرگەی جیهانی و نەتەوە یۊگێرتەکۍ پێسە هەرمانەو گرڎ جارێشا بێدەنگییشا ورچنی ".

حەرپاسە ئا ئەندامەو گەنجا واتیچش: "خەتەو ئاپۊچێتی ئارۊنە سەرمەشقایەتیی خەتەو ئازاڎیوازیی گەلوو کوردی و تەماموو گەلاو مەنتێقەکەی کەرۊ، یۊ جە سەبەبەکاو درووسبییەی جمیەروو ئاپۊچێتی پارێزنای و هەقکەرڎەیۊ ونەو گەشمەرڎان، مانگەو گوڵانی جە کەسایەتیی گەشمەرڎا (حەقی قەرار، فەرهاد کورتای، ئەشرەف ئانیک، مەحمود زەنگین و نەجمی ئۊنەر)ی، کە کە گەشمەرڎۍ خەتەو مدرامانوو پەکەکەینۍ، ئینجا یتووەم فەرماندۍ ژەنی چی مانگێنە گەشمەرڎۍ بیێنە، کە فەرماندە (هۊزان مزگین)ەنە، کە ژەنە هونەرمەندەنە.  گەشمەرڎە مزگینە بە هونەر و گیانوو وێش خەباتش پەی گەلوو کوردی کەرڎەن، ئینجا جە کەسایەتیی گەشمەرڎا(شیرنی عەلەم هولی، مامۊستا فەرزاد کەمانگەر، فەرهاد وەکیلی، شەهید عەلی حەیدەریان و مەهدی ئیسلامیان)ی، کە جە مانگەو گوڵانوو ساڵەو ٢٠١٠ بە دەسوو دەوڵەتوو سێدارەی دریۍ قەنارە و گەشمەرڎۍ بیۍ، دیما کە گەشمەرڎۍ (شیرین عەلەم هولی)یە چێروو قورستەرین ئەشکەنجەینە مدرامانی بێوێنەش کەرڎ و درێژەش بە کولتووروو مدرامانوو جمیەروو ئاپۊیی دا، خەتەو خیانەتی وێدەسۊدایش جە زیندانەکەنە ئیدانە کەرڎ، بە گیانوو وێش وێش پەی گەلەکەیش کەرڎ بە قوربانی.

جە ئاخرۊ نامەبریا واتش: "ئێمە پێسە گەنجە ئاپۊییا درێژەدەرۍ ونەو خەباتینمۍ، ئا ونۍ کە گەشمەرڎا بەخشێنە بە گەلەکەیشا، وەعد مدەیمۍ کە هەقەشا بسانمۍ، گەنجۍ ئاپۊچیۍ گەنجاو خەتەو گەشمەرڎانۍ ئێمەیچ پێسە گەنجە وەلاتپارێزنا ژەنە گەنجە کۊشەرا خەتەو گەشمەرڎا بە بنەما گێرمۍ. چێگەوە ئەرەیاونمێش تا ونەو گەشمەرڎێوە ئی خاکەیە مەنۊ دەس جە خەباتی و کۊشیای وەرمەدەیمێ".

ئاخیرۊ گەنجە وەڵاتپارێزناو کورڎسانی و ژنئی گەنجۍ کۊشەرۍ، بە واتەیۊ دروشمەکاو (بژیوۊ ڕابەر ئاپۊ، گەشمەرڎۍ مەمرا) چالاکییەکەشا دمایی پەنە ئارڎ.

لاو وێشۊ سەفوان ئەحمەد ئەنداموو کۊمەڵەو گەنجە وەڵاتپارێزناو کورڎسانی سەبارەت بە چالاکییەکەی، پەی ئاژانسوو هەواڵوو فوراتی (ANF) واتش: "ئارۊ ئێمە پێسە کۊمەڵەو گەنجە وەڵاتپارێزناو کورڎسانی و ژەنە گەنجە کۊشەراچالاکیێوەما ڕێک وست پەی سەرڎای (ئەمنە سورەکە)و سلێمانی و (مۊنۊمێنتوو گەشمەرڎاو هەڵەبجە)ی تا گەنجەکێما ویرشا نەشۊ، کە گەلەکەما چ کۊکوشی و کارەساتێوەش ملەرە ئامان و ویرشا نەشۊوە، گرنگ بۍ ئی گەشتەیە کەرمۍ،  چوون چی مانگێنە کە مانگەو گوڵانینە کورد فرەتەرین گەشمەرڎێش دێنۍ،  پێسە گەنجا بەرڎەوامۍ بیمۍ سەروو ئا ڕێبازی، کە گەشمەرڎاو مانگەو گوڵانی پەیش گەشمەرڎۍ بیێ".

س.ز