سەرۆکوو گرووپە فاشیستیەکا تورکیای ئەردۆغان، جەنگ دژوو کوردا چڕتەر کەرۊوە. ئا زۋانەی دژوو کوردی بەکارش مارۆ نەواخنۍ کاولکاری و تنوتیژیش هەن. جە وەختوو قسەکەرڎەی سەروو پرسوو فەلەستینیچ پی جۆرەنە. پەی فەلەستینی ئیسرائیلی کەرۊنە ئامانج، ماچۆ نەتانیاهۆ تاوانەو جەنگی و تاوانەی دژ بە مرۆڤایەتی ئەنجام مڎۆ و مشۊم حسابش چنی کریۆ. ماچۊ پێویسا فەلەستینەنە ئاێربەس بۆ، کوشتەی ئینسانی مەدەنی مردۊ. پۍ ئینەیچ داوا جە ڕای گرڎی جەهانی کەرۆ، و گرڎوو نوێنەرایەتییە دیپلۆماسییەکاش چالاک کەرۆ. بەڵام وەختۍ باس جە کوردی کریۆ، دەس کەرۆ بە شاتە شاتوو ماچۆ دەسکۊت و شۊنیرەلووای مافەکاشا پەسەنڎ مەکەروو.

ئەردۆغان ماچۆ، پێویسا جە هەرێمەکە و جەهانەنە ئاشتی بەدی بۍ. بەڵام ۋېش حەجگیز باسوو ئاشتی چنی کوردی مەکەرۆ. تەنیا ڕاچارە پۍ کوردی "چۆک داین" و پاکتاوکاری گرڎین. بەڵام کێشەو کوردی جە کێشەو فەلەستین قەڎیمیتەرا. کۊکوشی دێرسیمی کە ئەردۆغانی قبوڵکەرڎەن، جە ساڵەکا ١٩٣٧ و ١٩٣٨. چا سەردەمەنە فڕۆکەی جەنگی و چەکی کیمیاۋیی دژ بە کوردی بەکارئاما. ساڵەو ١٩٢٥ شێخ سەعید و هەڤاڵەکېش دریۍ قەنارە، ئەشکەنجەدای یۊبۍ جە کردەوە کلاسیکەکاو کۆماری دژوو کوردی. ئەردۆغان ماچۆ، پەکەکە، کەجەکە، یەپەگە، پەیەدە و هتد، ڕێکوستە کوردییەکۍ تیرۆریستېنۍ، دلېنەبەرڎەی و پاکتاوکاری مسەپنۆ. گەرەکشا بە کەلیمۍ تیرۆریستی بەهانۍ پۍ سیاسەتەکا پاکتاوکاری و کۊکوشیەکاش بارۊوە. ساڵەو ١٩٢٥ و ١٩٣٧ خۆ پەکەکە نەبیەن. ئەگەر کێشەکە پەکەکەن، پۍ چی چا وەختەنە نکوڵی جە کوردی کریۍ، کۊکوش کریا؟ دیارا کێشەکە پەکەکە نییا. کێشەکە بیەو کوردین. ڕاوەبەرا ئا سەردەمەیە، پېسە ئەردۆغانی، جیای کەلیمۍ تیرۆریستی، واچېنۍ "جوداخواز، یاخی، ڕاگیرۍ" واتە بەردەوام زۋانوو نکوڵی و کاولکاری و تنوتیژی دژ بە کوردی بەکار مۍ. ئەردۆغان ئارۆ حیچ چېوۍ تازەش نەکەرڎەن، ئانەی "باوانش" کەردەنشا، بەردەوامیش پنە مڎۊ. بە قسۍ ۋېش حیچ کێشېوەش چنی کوردی نییا، بەڵام گەرەکش نیا جە مېڎانی میان نەتەوەیینە پەشتیوانی جە کوردی کریۆ، کورد هاییش نەبۊوە چا وەرمەنە و دەس بە کۊشیای نەکەرۆ. جە هەمان وەختەنە هێزەکا پېسە پەدەکەی پۍ ماڕای مدرامانوو کوردی بەکار مارۆ. گەرەکشا ڕای گرڎیی جەهانی جە پەشتیوانی کەرڎەی جە قاعیدەی و نوسرەی و داعشی کە پېسە تیرۆریستی ئشناسیېنۍ پێچەوانە کەرۆوە. تورکیا سنوورەکېش ڕووەو ئا هێزە تێروریستیارە و دەیان هەزار چەتا تەریرە کەردۆ و پۍ سوریا و عێراقی ڕوانەش کەرڎۍ. پا مەڵامەتۆ سوریا وڕا و ملۋېنان کەسۍ خاکوو ۋېشانە ئاوارۍ بیۍ و سەڎان هەزار کەسۍ عەمرەو خوڎایشا کەرڎە.

ئەردۆغان پینەیچۆ نەمردا. سوپاو تورکیچش کیاست دلۍ خاکوو سوریای و هەرێمەکا پېسە عەفرین، عەزاز، باب و گرێسپی و سەرێکانیش ئەرەگیرکەرڎۍ. کورد چا هەرێمانە بەرکریا. بە شێوېوە ئاشکرا کۊکوشیش ئەنجامدا، ئیسەیچ بنەیانەو چەتە بیانییەکا مارۆ پۍ ئا هەرێما و ئەرەنیشتېشا کەرۆ. بە ئەرەگیرکەرڎەو سوریای ڕازی نییا، گەمە بە ئەرەنیشتا و پېکئاماکاش کەرۆ. دەیان هەزار چا چەتاشە پېسە سوپاو نیشتیمانی سوریای مەرزنېرە و دەسەڵاتێوە مەودا کوڵ و سوریایش پنە وەشکەردۍ.

ئەردۆغان ئی چەتا جە ۋەرکەوتوو دلېڕاسەینە پېسە ئامرازێوە هەڕەشا دژوو گرڎوو دەوڵەتا عەرەبی بەکار مارۆ. بە هەزاران سەروازېش بەردېنۍ دلۍ خاکوو عێراقی و دەیان بنکۍ سەروازیېش وەش کەردېنۍ. ڕووانە فڕۆکەکېش هجوم کەرا سەروو عێراقی. بە چەکی کیمیاۋی جە بەروو دلۍ تورکیاینە هجوم کەرا سەروو کوردا. ئارۆ ڕەخنە جە ئیسرائیلی گېرۆ، ۋېش زیاتەر و زیاتەرش  سەروو کوردیرە ئاردەن.

ئەردۆغان جە پەیوەندییە دلېینە و پەیوەندیەکا بەریشەنە بە ئاشکرا مەدح و وەرگیری چا کۊکوشی و تاوانەکا دژ بە گەلوو کوردی کەرۆ، بە ئاشکرا ماچۆ بەردەوام بۆ جە هجومەکاش. ئەگەر نەتانیاهۆ بە تاوانەو ئەرەگیری و دلېنەبەرڎەی ژیۋای مرۆڤەکا و کۊکوشی داڎگایی کریۆ، ئەردۆغان چېشش سەرمۍ؟ پێویسا ۋنەپەرسایۆ چا هێزا کریۊ کە ۋەران ۋەروو تاوانەکا دژ بە کوردی بێدەنگێنۍ. تا ئیسە کەس خۊتانکەرڎەیش جە کوردی نەکەرڎەن و ۋنەپەرسایشا جە سەرۆکە تاوانکارەکاو تورکیای نەکەرڎەن. پۊکەی ئەردۆغان کوردش ڕووبەڕوو کۆکوشی و دەربەدەری کەرڎەنۆ.

 سەرچەمە: ڕۆنامەو ڕووناهی