بافڵ تاڵەبانی: بڕۍ مەنتێقۍ هەرێمی بیێنۍ مەکۊو کپکەرڎەی و بەندکەرڎەی دەنگی ئازاڎی
بافڵ تاڵەبانی، سەرۊکوو یۊبییەی نیشتمانیی کوردسان (یەنەکە)ی، بە بۊنەو ساڵیادوو ڕۊنامەگەریی کورڎی و بەرشییەی یووەم ڕۊنامەی کورڎی وەڵۍ ١٢٥ ساڵا مەبارەکبایی کەرۊ.
بە بۊنەو یادوو ١٢٥ ساڵەو ڕۊنامەگەریی کورڎی و بەرشییەی یوەمین ڕۊنامەی کورڎی جە قاهیرەنە بە نامۍ «کوردسان»یوە، سەرۊکوو یەنەکەی ئەرەیاوناێش پەی ڕای گرڎینی وەڵا کەرڎۊ و دلێشنە ئامان:
مەبارەکبایی جە ڕۊنامەنویساو کوردسانی کەروو بە بۊنەو ساڵیادوو ڕۊنامەگەریی کورڎییوە، هومێدوو بەرڎەوامی و سەرکەوتەیشا پەی وازوو.
«ئاشکران ڕۊنامەگەریی ئازاڎ و ڕەخسنای فەزاێوە پەی بەروستەی ڕای ئازاڎۍ، پاێوە گرنگە و سەرەکییەنە پەی دیموکراسی و ئاماژەو گەشەی و وەڵێکەوتەی وەڵاتین. بەداخۊ، بڕۍ مەنتێقۍ کوردسانی، نەک حەر جە ساڵانی ویەرڎەنە گەشەش بە وێشۊ نەدییەن چی ڕووەوە، بەڵکوم بییەن مەکۊو کپکەرڎەی و بەندکەرڎەی دەنگی ئازاڎی، ئانا تۊمەتۍ ناڕەوۍ پەی ڕۊنامەنویسا ورۍ بەسیا و ئینەیچ ڕسمێوە نەرێنی سەروو هەرێمی مدۊ گلێرگەی میاندەوڵەتی.
ئێمە بڕوێوە پتەوەما هەنە بە ڕۊنامەگەریی ئازاڎی و ڕۊنامەی یارای، حەرگیز وێما جە لای سەریی ڕەخنەیۊ مەوینمۍ، پەشتگیریی گرڎ حەوڵێوە کەرمۍ پەی دەسنیشانکەرڎەی غەڵەتەکاما و ئاڕاستەکەرڎەیما پەی ڕای ڕاسۍ، سەروو ئی بڕوۍ بەرڎەوامۍ بیمۍ و بیمۍ بە پاڵپشتوو ئەرەیاونای پیشەیی و گرڎوو دەنگە ئازاڎ و یارایەکا».
جە زیندانەکاو پارتوو دیموکراتی کوردسان (پەدەکە)ینە، چندین ڕۊنامەنویسۍ هەنۍ، بەتایبەت ڕۊنامەنویساو بادینانی، سەرباروو داواکارییەکا پەی بۊ ئازاڎکەرڎەیشا، کەچی پەدەکە بەرڎەواما جە وربەستەی تۊمەتە ناڕاسا وەراوەروو ئی ڕۊنامەنویسانە.
س.ز
