سەرۊكوو یەنەكەی جە میانەو بەشڎاریكەرڎەیش جە پانێڵێوە کۊڕبەنڎوو هەولێرینە داواش جە پەدەكەی كەرڎە، پێوە مشکیلەو كورڎی بە بەغڎای چارەسەرکەرا و یارڎەی وەرنیشتوو كورڎسانی بدا و بەینوو پەكەكەی و توركیاینە ئاشتیێوە وەرقەرار کەرا.
ئارۊ شارووهەولێرینە، کۊڕبەندوو هەولێری لوا ڕاوە، كۊڕبەندەکەنە بافڵ تاڵەبانی، سەرۊكوو یەنەكەی جە پانێڵێوەنە بەشڎارییش كەرد و ڕۊشناییش وست سەروو چن پەرسێوە ئارۊییانۍ هەرێموو كورڎسانی و عێراقی و مەنتێقەکەی.
"برێکێما وەرنیشتوو كورڎسانینە گرڎ ڕوۍ بۊردومانۍ کریا، با یارڎەیشا دەیمێ"
بافڵ تاڵەبانی واتش: با پارتی بۍ چەنیما پێوەرە مشکیلاو میللەتەكەیما حەل کەرمۍ، چەنی تاومۍ یارڎەی برایەكاما دەیمۍ وەرنیشتوو كورڎسانینە، كە گرڎ ڕوۍ ئینۍ چێروو فشارینە و بۊردومانۍ کریا، بەیدۍ با ڕاچارۍ وێزمێوە.
"با ئاشتەواییۍ وەش کەرمۍ بەینوو هەڤاڵاو پەكەكەی و توركیاینە"
درێژەو قسەکاشنە واتش: بەیدۍ با ئاشتیێوە وەش کەرمۍ بەینوو هەڤاڵەكاو پەكەكەی و توركیاینە، مام جەلال چی تاواش کەرۊش و ئێمە چی مەتاومێ! بەیدۍ با مەنتێقەکەو وێما ئارام کەرمێوە، جیاتیی ورگێرتەی عەلەمەو حیزبەکا با عەلەمەو کورڎایەتی ور کەرمۍ، پێوەرە ئینەما پەنە کریۊ.
"بەغڎا ئامادەن چەنیما ڕێک گنۊ"
سەرۊكوو یەنەكەی تاکیدش کەرڎۊ، بەغڎا ئامادەن چەنیما ڕێك گنۊ و واتش: ئاڎۍ ماچا ئێمە هەرمانەو وێما کەرمۍ و شمەیچ هەرمانەو وێتا.
" جە جادە خوڵینەکاو كەركووكیوە دۊلار یاوۊ سلێمانی و چاوە پەی هەولێری و چایچۊ پەی تورکیای "
جە جوابوو ئا پرسیارێنە کە وچیۊ دۊلار سلێمانیوە ملۊ جبەر، بافڵ تاڵەبانی، سەرۊكوو یەنەكەی واتش: كۊتا جار چنی لوجنێوە نیشتارە بەغڎاوە ئامێبێنۍ، ئیسەتۍ هامكارۍ ئا لوجنەینمۍ، داواو لوجنەکەی ئانێبۍ چەنی کیانای دۊلاری سلێمانیوە پەی جبەری مردنیۊ، وەلێم دمایین زانیاریی ئێمە و لوجنەکەی ئانە بۍ دۊلار جە ڕا خوڵینەکاو كەركووكیوە مۍ سلێمانی و چاوە ملۊ هەولێر و هەولێریچۊ بریۊ توركیا و چاگە دابەش کریۊ.
س.ز
