هامقسەکەروو دیوانوو کەجەدەکە-ئەی موراد جەیلان و نوێنەروو تەژەکە-ئە زۊزان سەرحەدە بەمەبەسوو بەشداربییەی چالاکییەکاو ٢٣ کانوونوو یوەمی و ٦ کانوونوو دووەمی پاریسنە بانگەوازێوەشا ئەرەیاونا.
کورد و دۊسەکێش ئینۍ ئامادەکاریینە تا ساڵیادوو هەردووە کۊکوشیەکاو پاریسی ٢٣ کانوونوو یوەمی و ششوو کانوونوو دووەمینە چالاکی و وێنیشانەدای کەرا و جەختیچ کەراوە، کە ئا کۊکوشییە ویر مەبەراوە و و داوایچ کەرا حکومەتوو فەڕەنسای پەی ڕۊشنۊکەرڎەی ئا کۊکوشییا هەنگامە بنیۊ.
پاریسنە ماوەو ٩ ساڵان دووۍ کۊکوشیۍ وەراوەروو گەلوو کوردیوە کریێنێ. وەنەو ئەرەمەرزنەراو پەکەکەی سەکینە جانسز (سارا)، نوێنەرەو کەنەکەی پاریسنە فیدان دۊغان (رۊژبین)ە و ئەندامەو جمیەروو گەنجا لەیلا شایلەمەز (رۊناهی)ییە، ٩و کانوونوو دووەموو ٢٠١٣ ئەنجاموو ئۊپراسیۊنێوە میتینە تیرۊرۍ کریێ. ئەڤین گۊیی-یە (ئەمینە کارا)، کە دژوو داعشی گژیێبێچ، هونەرمەندوو کوردی میر پەروەر (محەمەد شیرین ئایدن) و وڵاتپارێزنوو کوردی عەبدولرەحمان کزلیچ ٢٣ کانوونوو یوەموو ٢٠٢٢ تیرۊرۍ کریێ. جە ٢٣ کانوونوو یوەم و ششوو کانوونوو دووەمینە پاریسنە چالاکی کەرا.
هامقسەکەروو دیوانوو سەرۊکایەتیی کۊنگرەو گلێرگەی دیموکراتیکوو کوردستانییاو ئەورووپا (جەدەکە-ئە) موراد جەیلان و نوێنەرەو جمیەرەو ژەناو کوردی ئەورووپانە (تەژەکە-ئە) زۊزان سەرحەدە، جە ڕاو ئاژانسەکەیماوە بانگەوازێوەشا پەی بەشداری چا چالاکی و وێنیشانەدایانە ئەرەیاونا.
موراد جەیلان داواش وەنەو کورڎا و دۊساشا کەرڎە، کە چا شۊنانە مژیوا وەراوەر پا کۊکوشییا مرڎاوە و ناڕەزایەتی بە گرد لێوە و بەتایبەتی ئا هێزا کە چەمێشا سەروو کۊکوشیەکارە قووجنێنێ، نیشانە بدا. زۊزان سەرحەدیش داواش وەنەو گرد لێوە کەرڎە، کە مجیارە سەروو مەیدانەکا و پەیامێوە ش پێسە یانە بە فەڕەنسای: " شمە متاودۍ تیرۊرێما کەرڎێ، وەلۍ ئێمە هۊشما نمەشۊوە. ڕەنگای شمە بکوشاما دادگایی نەکەرڎێ، وەلۍ ئێمە شمە دادگایی کەرمێ، ئێمە بۊنەو تیرۊرکەرڎەی هامڕایاما و تیرۊرکەرڎەی ژەناو کوردیوە وەنەتا پێچـمێوە".
